ಹಾವೇರಿ ಜಿಲ್ಲೆಯಲ್ಲಿ ವಿಸ್ತಾರವಾಗುತ್ತಿರುವ ಚೆಂಡು ಹೂವಿನ ಬೆಳೆ

ವಿಶೇಷ ವರದಿ

ಉತ್ತಮ ಇಳುವರಿ ಮತ್ತು ದರವೂ ಸಿಗುತ್ತಿರುವುದರಿಂದ ರೈತರು ಚೆಂಡು ಹೂ ಬೆಳೆಯಲು ಆಸಕ್ತಿ ತೋರುತ್ತಿದ್ದು, ವರ್ಷದಿಂದ ವರ್ಷಕ್ಕೆ ಬೆಳೆ ಪ್ರದೇಶ ವಿಸ್ತರಣೆಯಾಗುತ್ತಿದೆ.

ಮರುಕೊಳ್ಳುವಿಕೆಯ ಒಪ್ಪಂದ: ಜಿಲ್ಲೆಯಲ್ಲಿ ಹತ್ತಾರು ಖಾಸಗಿ ಕಂಪನಿಗಳು ನೈಸರ್ಗಿಕ ಬಣ್ಣಗಳ ತಯಾರಿಕೆಯಲ್ಲಿ ತೊಡಗಿಕೊಂಡಿವೆ. ಈ ಕಂಪನಿಯವರು ರೈತರಿಗೆ ಪ್ರತಿ ವರ್ಷ ಚೆಂಡು ಹೂವಿನ ಬೀಜ, ಅಗತ್ಯ ಗೊಬ್ಬರ, ಔಷಧ ಕೊಟ್ಟು ಮರು ಖರೀದಿಯ ಒಪ್ಪಂದ ಮಾಡಿಕೊಳ್ಳುತ್ತಿವೆ. ಕೆಲವು ಕಂಪನಿಯವರು ರೈತರ ಜತೆಗಿನ ಸತತ ಒಡನಾಟ, ವಹಿವಾಟಿನ ಬಳಿಕ ಬೆಳೆ ಬೆಳೆಯಲು ಮುಂಗಡ ಸಹ ಕೊಡುತ್ತಿವೆ. ರೈತರು ಶ್ರಮ ವಹಿಸಿ ಬೆಳೆ ಬೆಳೆದರೆ ಸಾಕು. ಖರ್ಚು ಮಾಡುವ ಅಗತ್ಯವಿಲ್ಲದೆ ಬೆಳೆ ಸಿಗುತ್ತದೆ. ಮಾರುಕಟ್ಟೆಯ ಜಂಜಾಟವೂ ಇಲ್ಲದಂತೆ ಕಂಪನಿಯವರೇ ಖರೀದಿಯನ್ನೂ ಮಾಡುವುದರಿಂದ ರೈತರಿಗೆ ಒತ್ತಡವೂ ಕಡಿಮೆಯಾಗಿದೆ. ಎಷ್ಟೇ ಇಳುವರಿ ಬಂದರೂ ನಷ್ಟವಂತೂ ಆಗುವುದಿಲ್ಲ. ಇದರಿಂದ ರೈತರು ಹೂವಿನ ಕೃಷಿಯತ್ತ ಒಲವು ತೋರುತ್ತಿದ್ದಾರೆ.

ದರ ಏರಿಕೆ-ಬೆಳೆ ಹೆಚ್ಚಳ: ಮೂರು ವರ್ಷಗಳ ಹಿಂದೆ ಖಾಸಗಿ ಕಂಪನಿಗಳು ರೈತರಿಂದ ಪ್ರತಿ ಕಿಲೋಗೆ ₹6 ದರದಲ್ಲಿ ಚೆಂಡು ಹೂವನ್ನು ಖರೀದಿಸುತ್ತಿದ್ದವು. ಪ್ರಸಕ್ತ ವರ್ಷ ₹9ಗಳಿಂದ ₹9.50 ವರೆಗೂ ಖರೀದಿಯಾಗುತ್ತಿದೆ.

ಅಂತರ ಬೆಳೆಯಾಗಿ ಚೆಂಡು ಹೂವು: ಕ್ಯಾಬೇಜ್, ಹೂಕೋಸು ಮೊದಲಾದ ತರಕಾರಿ ಬೆಳೆಗಳ ನಡುವೆ ಅಂತರ್ ಬೆಳೆಯಾಗಿ ಚೆಂಡು ಹೂವು ಬೆಳೆಯುವಂತೆ ತೋಟಗಾರಿಕಾ ಇಲಾಖೆ ಸಲಹೆ ನೀಡುತ್ತ ಬಂದಿದೆ. ತರಕಾರಿ ತೋಟದ ಗಡಿ ಭಾಗದಲ್ಲಿ ಚೆಂಡು ಹೂವು ಬೆಳೆಯುವುದರಿಂದ ಕೀಟಬಾಧೆ ನಿಯಂತ್ರಣಕ್ಕೆ ಬರುತ್ತದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದರು.ಹಳದಿ ಹೂವು ಬೀದಿಗೆ: ಕೇಸರಿ ಹೂವನ್ನು ಖರೀದಿಸುವ ಖಾಸಗಿ ಕಂಪನಿಗಳು ರೈತರು ಬೆಳೆಯುವ ಹಳದಿ ಚೆಂಡು ಹೂವನ್ನು ಖರೀದಿಸುತ್ತಿಲ್ಲ. ಹಬ್ಬದ ದಿನಗಳಲ್ಲಿ ಭಾರೀ ಬೇಡಿಕೆ ಬರುತ್ತದೆ ಎಂದು ರೈತರು ಬೆಳೆಯುವ ಚೆಂಡು ಹೂವಿಗೆ ಮಾರುಕಟ್ಟೆಯಲ್ಲಿ ಬೆಲೆ ಸಿಗುತ್ತಿಲ್ಲ. ಕಂಪನಿಗಳೊಂದಿಗೆ ಒಡಂಬಡಿಕೆ ಮಾಡಿಕೊಳ್ಳದೇ ಮಾರುಕಟ್ಟೆಗೆ ನೇರವಾಗಿ ತರುವ ಚೆಂಡು ಹೂವಿಗೆ ಬೆಲೆಯಿಲ್ಲದೇ ರಸ್ತೆ ಬದಿಯಲ್ಲಿ ಎಸೆಯುತ್ತಿದ್ದಾರೆ. ದೀಪಾವಳಿ ಹಬ್ಬಕ್ಕೆಂದು ಬೆಳೆದಿದ್ದ ರೈತರು ಈಗಲೇ ಕಟಾವಿಗೆ ಬಂದಿದ್ದರಿಂದ ಮಾರುಕಟ್ಟೆಗೆ ತಂದು ಕೂಲಿ ಖರ್ಚು ಕೂಡ ಸಿಗದೇ ರಸ್ತೆಗೆ ಚೆಂಡು ಹೂವು ಚೆಲ್ಲುತ್ತಿರುದ್ದಾರೆ. ದೀಪಾವಳಿ ಹಬ್ಬಕ್ಕಾದರೂ ಉತ್ತಮ ಬೆಲೆ ಸಿಗಬಹುದು ಎಂಬ ನಿರೀಕ್ಷೆಯಲ್ಲಿ ರೈತರಿದ್ದಾರೆ.