ಏಕ ಕಾಲದಲ್ಲಿ 10 ಸಾವಿರ ಜನರಿಂದ ಸಾಮೂಹಿಕ ವಚನ ಗಾಯನ

ಕನ್ನಡಪ್ರಭ ವಾರ್ತೆ ಚಿತ್ರದುರ್ಗ

೧೦ ಸಾವಿರ ಜನರು ಭಾಗಿಯಾಗಿ ಒಟ್ಟಿಗೆ ವಚನಗಳನ್ನು ಹಾಡುವ ಹೊಸ ಪ್ರಯೋಗಕ್ಕೆ ಶರಣ ಸಂಸ್ಕೃತಿ ಆಚರಣೆ ಸಮಿತಿ ಮುಂದಾಗಿದೆ. ಇಷ್ಟೊಂದು ಬೃಹತ್‌ ಸಂಖ್ಯೆಯ ಗಾಯಕರು ಒಟ್ಟಿಗೆ ಸೇರಿ ವಚನಗಳನ್ನು ಹಾಡಿ ಅದರ ಕಂಪನ್ನು ನಾಡಿಗೆ ಪಸರಿಸಿದರೆ ಈ ಕಾರ್ಯಕ್ರಮ ದಾಖಲೆಗೆ ಸೇರಲಿದೆ.

ಪೂರ್ವಾಭ್ಯಾಸದ ನೇತೃತ್ವ ವಹಿಸಿದ್ದ ಡಾ.ಬಸವಕುಮಾರ ಸ್ವಾಮೀಜಿ ಮಾತನಾಡಿ, 12ನೇ ಶತಮಾನದ ವಚನಗಳು ಅನರ್ಘ್ಯ ರತ್ನಗಳು. ಅಂದು ರಚಿಸಿದ ವಚನಗಳು ಇಂದಿಗೂ ಜನಮಾನಸದಲ್ಲಿ ನೆಲೆ ನಿಂತಿವೆ. ಜನರ, ಸಾಹಿತ್ಯಪ್ರಿಯರ, ಬಸವಾಭಿಮಾನಿಗಳ ಸದಾ ನೆನಪಿನಲ್ಲಿವೆ. ಈಗಿನ ಆಧುನಿಕ ದಿನಮಾನದಲ್ಲಿ ಇಂದಿನ ಮಕ್ಕಳಿಗೆ ಅವುಗಳು ಅಭ್ಯಾಸವಾಗಬೇಕೆಂಬ ಮತ್ತು ದೊಡ್ಡವರಿಗೂ ಅವುಗಳ ಮನನ ಅಗತ್ಯವಾಗಿದೆ. ವಚನಗಳು ನಡೆ-ನುಡಿಗಳ ಅನುಭವದ ಸಾರಾಮೃತ. ಅವು ನಮ್ಮ ಮನಸ್ಸಿನೊಳಗೋದರೆ ಅವು ಶಾಶ್ವತವಾಗಿ ಉಳಿಯುವವೆಂಬ ಕಾರಣದಿಂದ ಶರಣಸಂಸ್ಕೃತಿ ಉತ್ಸವದ ಸದಾಶಯವೂ ಅದೇ ಆಗಿರುವ ಹಿನ್ನೆಲೆಯಲ್ಲಿ ಕಳೆದ ವರ್ಷದಿಂದ ಇಂತಹ ಪ್ರಯತ್ನ ಮಾಡಲಾಗಿದೆ ಎಂದು ನುಡಿದ ಅವರು ಇದಕ್ಕೆ ಸಾರ್ವಜನಿಕರ ಸಹಭಾಗಿತ್ವ ಅಗತ್ಯ. ಜಿಲ್ಲೆಯ ಎಲ್ಲ ಭಾಗಗಳ ಆಸಕ್ತರನ್ನು ಸೇರಿಸಿಕೊಂಡು ಬೇರೆಯವರಿಗೆ ಪ್ರೇರೇಪಿಸಿ ಇದರಲ್ಲಿ ತೊಡಗಿಸಿಕೊಳ್ಳುವಂತೆ ಮಾಡಲಾಗುತ್ತಿದೆ. ಈಗಾಗಲೇ ಚಿತ್ರದುರ್ಗದ ಅನೇಕರು ಇದರಲ್ಲಿ ಭಾಗಿಗಳಾಗಿದ್ದಾರೆನ್ನುವುದಕ್ಕೆ ನೀವೇ ಸಾಕ್ಷಿ. ಇಂತಹದೇ ಒಂದು ಸಮೂಹ ಗಾಯನ ವಚನ ನಾದ ಎನ್ನುವ ಹೆಸರಿನಲ್ಲಿ ದಾವಣಗೆರೆಯ ಮಹಾ ಜನತೆಯ ಸಹಕಾರದೊಂದಿಗೆ ಲಿಂಗಾಯತ ಮಠಾಧೀಶರ ಒಕ್ಕೂಟವು ನಾಳೆ ಸೆ.30ರ ಸಂಜೆ 6 ಗಂಟೆಗೆ ಏರ್ಪಡಿಸಿದ್ದಾರೆ. ಅದರಲ್ಲಿ ಮಕ್ಕಳಿಂದ ಹಿಡಿದು 78-80ರ ವಯೋಮಾನದ ಹಿರಿಯರೂ ಭಾಗವಹಿಸಿದ್ದಾರೆ. ಚಿತ್ರದುರ್ಗದ ಜನತೆಯೂ ಸಹ ಇಲ್ಲಿ ನಡೆಯುವ ಸಂದರ್ಭದಲ್ಲಿ ಭಾಗವಹಿಸಿ ಯಶಸ್ವಿಗೊಳಿಸಬೇಕೆಂದು ಕರೆ ನೀಡಿದರು.

ಈ ಸಂದರ್ಭದಲ್ಲಿ ಹಲವಾರು ವಚನಗಳ ಗಾಯನ ನಡೆಯಿತು. ನಗರದ ವಿವಿಧ ಸಮಾಜ, ಸಂಘ-ಸಂಸ್ಥೆಗಳ ಪದಾಧಿಕಾರಿಗಳು ಹಾಗೂ ಎಸ್‌ಜೆಎಂ ವಿದ್ಯಾಪೀಠದ ಶಾಲಾ ಕಾಲೇಜುಗಳ ಸಿಬ್ಬಂದಿಗಳು ಭಾಗವಹಿಸಿದ್ದರು. ಅದರಂತೆ ಗಾಯನ ಸಂದರ್ಭದಲ್ಲಿ ಮಹಿಳೆಯರಿಗೆ ಇಳಕಲ್ ಸೀರೆ ಹಾಗೂ ಪುರುಷರಿಗೆ ರಾಮರಾಜ್ ಉಡುಪುಗಳನ್ನು ರಿಯಾಯಿತಿ ದರದಲ್ಲಿ ಒದಗಿಸಲಾಗುವುದೆಂದು ತಿಳಿಸಲಾಯಿತು.