ದಾವಣಗೆರೆ ಬಸವ ಜಯಂತಿಯ ನಗರಿಯಾಗಲಿ ಎಂದಾಗಲಿ: ವಿರಕ್ತಮಠದ ಡಾ.ಬಸವಪ್ರಭು ಸ್ವಾಮೀಜಿ

ಬಸವ ಜಯಂತಿ । ಅಭಿನಂದನಾ ಸಮಾರಂಭ । ಶಾಮನೂರು, ರವೀಂದ್ರನಾಥ್‌ಗೆ ಸನ್ಮಾನ

ದಾವಣಗೆರೆಯ ವಿರಕ್ತಮಠದಲ್ಲಿ ಮೊಟ್ಟಮೊದಲ ಬಾರಿಗೆ 1913ರಲ್ಲಿ ಬಸವ ಜಯಂತಿ ಆಚರಣೆಯನ್ನು ಕರ್ನಾಟಕದ ಗಾಂಧಿ ಹರ್ಡೇಕರ ಮಂಜಪ್ಪನವರು ಅಂದಿನ ವಿರಕ್ತಮಠದ ಮಠಾಧೀಶ ಮೃತ್ಯುಂಜಯ ಸ್ವಾಮೀಜಿ ಸೇರಿ ಪ್ರಾರಂಭ ಮಾಡಿದ್ದು ಇತಿಹಾಸವಾಗಿದೆ. ಇನ್ನು ಮುಂದೆ ದಾವಣಗೆರೆಗೆ ಬೆಣ್ಣೆ ನಗರಿ ಎಂದು ಗುರುತಿಸುವ ಬದಲು ಬಸವ ಜಯಂತಿಯ ನಗರಿ ಎಂದು ಗುರುತಿಸಬೇಕು ಎಂದು ವಿರಕ್ತಮಠದ ಡಾ.ಬಸವಪ್ರಭು ಸ್ವಾಮೀಜಿ ಹೇಳಿದರು.

ಸಮಾಜದಲ್ಲಿ ಇವತ್ತು ಜಾತಿ, ಧರ್ಮಗಳ ಸಂಘರ್ಷ ತುಂಬಾ ಜೋರಾಗಿದೆ. ಅದಕ್ಕೆ ಔಷಧಿ ಎಂದರೆ ಬಸವಣ್ಣನವರಾಗಿದ್ದಾರೆ. ಬಸವಣ್ಣ ಎಂದರೆ ಕೂಡುವುದು. ಇಂದಿನ ವೇದಿಕೆಯಲ್ಲಿ ಗಮನಿಸಿ ಸರ್ವ ಪಕ್ಷ, ಸರ್ವ ಜನಾಂಗದವರು ಸೇರಿಕೊಂಡು ಒಂದಾಗಿ ಆಚರಣೆ ಮಾಡುತ್ತಿರುವುದೇ ಸಾಕ್ಷಿಯಾಗಿದೆ ಎಂದರು.

ಅಭಾವೀಲಿಂ ಮಹಾಸಭಾ ರಾಷ್ಟ್ರೀಯ ಅಧ್ಯಕ್ಷ ಡಾ.ಶಾಮನೂರು ಶಿವಶಂಕರಪ್ಪ ಮಾತನಾಡಿ, ಇಂದಿನ ಪಾರ್ಲಿಮೆಂಟ್ ಮತ್ತು ಅಸೆಂಬ್ಲಿ ವ್ಯವಸ್ಥೆಯು 12ನೇ ಶತಮಾನದಲ್ಲೇ ಅನುಭವ ಮಂಟಪದಲ್ಲಿತ್ತು ಎಂದರು.

ಅಭಾವೀಲಿಂ ಮಹಾಸಭಾ ರಾಷ್ಟ್ರೀಯ ಅಧ್ಯಕ್ಷರಾಗಿ 3ನೇ ಬಾರಿಗೆ ಆಯ್ಕೆಯಾದ ಡಾ.ಶಾಮನೂರು ಶಿವಶಂಕರಪ್ಪ ಹಾಗೂ ದಾವಣಗೆರೆ ವಿವಿಯಿಂದ ಗೌರವ ಡಾಕ್ಟರೇಟ್ ಪಡೆದ ಮಾಜಿ ಸಚಿವ ಡಾ.ಎಸ್.ಎ.ರವೀಂದ್ರನಾಥ್‌ರಿಗೆ ಸನ್ಮಾನಿಸಿ ಅಭಿನಂದಿಸಲಾಯಿತು.