ಸಭಿಕರೊಂದಿಗೆ ಸಂವಾದಿಯಾಗಿ ಭರ್ಜರಿ ಮತ ಬೆಳೆಯ ಕೊಯ್ಲು ಮಾಡಿದ ಮೋದಿ

ಶಿರಸಿ: ಇದ್ದದ್ದು ಚುನಾವಣೆ ಪ್ರಚಾರ ಸಭೆ. ಭಾಷಣ ಮಾಡಬೇಕಿದ್ದ ಪ್ರಧಾನಿ ನರೇಂದ್ರ ಮೋದಿ ನೆರೆದಿದ್ದ ಜನಸ್ತೋಮದ ಉತ್ಸಾಹ ಕಂಡು ಅವರೊಂದಿಗೆ ಸಂವಾದಿಯಾದರು. ಮಾತು ಮಾತಿಗೆ ಮೋದಿ ಮೋದಿ ಎನ್ನುತ್ತಿದ್ದವರ ಮಧ್ಯೆ ಭರ್ಜರಿ ಮತ ಕೊಯ್ಲು ಮಾಡಿದರು.

ಉತ್ತರ ಕನ್ನಡ ಲೋಕಸಭಾ ಕ್ಷೇತ್ರದ ಚುನಾವಣೆ ಪ್ರಚಾರದ ಬಹಿರಂಗ ಸಭೆಗೆ ಸೇನಾ ಹೆಲಿಕ್ಯಾಪ್ಟರ್‌ನಲ್ಲಿ ಪ್ರಧಾನಿ ಮೋದಿ ಬಂದಿಳಿದಾಗ ಏರುಬಿಸಿಲು.

ಜನಸ್ತೋಮ ಉತ್ಸಾಹ ಕಂಡು ಇದು ಚುನಾವಣೆ ಪ್ರಚಾರ ಸಭೆಯ ಬದಲು, ವಿಜಯೋತ್ಸವ ಅನಿಸುತ್ತಿದೆ ಎಂದು ಬಣ್ಣಿಸಿದಾಗ ಚಪ್ಪಾಳೆ ಮುಗಿಲು ಮುಟ್ಟಿ ಮಾರ್ದನಿಸಿತು.

ಹೀಗೆ ೪೭ ನಿಮಿಷಗಳ ಕಾಲ ಅಬ್ಬರದ ಭಾಷಣದ ಬದಲು ಮುಸ್ಲಿಂ ಓಲೈಕೆ, ದೇಶದ ಸುರಕ್ಷತೆ , ಆಸ್ತಿ ಹಂಚಿಕೆ, ರಾಮಮಂದಿರ ವಿರೋಧಿಸಿದವರು... ಹೀಗೆ ಕಾಂಗ್ರೆಸ್ ಧೋರಣೆಯನ್ನು ಕಟುವಾಗಿ ಖಂಡಿಸುತ್ತ ಇಂಥ ಕಾಂಗ್ರೆಸ್ ದೇಶಕ್ಕೆ ಬೇಕಾ? ಎನ್ನುವ ಪ್ರಶ್ನೆಯನ್ನು ಸಭಿಕರತ್ತ ಪುನಃ ಪುನಃ ಎಸೆದು ಅವರಿಂದ ಬೇಡ ಎನ್ನುವ ಉತ್ತರವನ್ನು ಪಡೆದರು.

ಕೊನೆಯಲ್ಲಿ ನೀವು ಮತ ಬೆಂಬಲದ ಗ್ಯಾರಂಟಿ ನೀಡಿದರೆ ನಾನು ನಿಮಗೆ ನಿಮ್ಮ ಸುರಕ್ಷತೆ, ವಿಕಾಸ, ಸಮೃದ್ಧಿಯ ಗ್ಯಾರಂಟಿ ನೀಡುತ್ತೇನೆ. ಇದು ಈ ದೇಶಕ್ಕೆ ನೀಡುವ ಮೋದಿ ಗ್ಯಾರಂಟಿ ಎಂದಾಗ ಎರಡು ನಿಮಿಷಗಳ ಕಾಲ ಕಿವಿ ಗಡಚಿಕ್ಕುವ ಚಪ್ಪಾಳೆ ಮತ್ತೆ ಮಾರ್ದನಿಸಿತು.