ಮಕ್ಕಳ ಬೆಳವಣಿಗೆಯಲ್ಲಿ ತಾಯಿಯ ಪಾತ್ರ ಹೆಚ್ಚು: ಡಾ.ನಿರ್ಮಲಾನಂದನಾಥಶ್ರೀ

ಕನ್ನಡಪ್ರಭ ವಾರ್ತೆ ಶಿಡ್ಲಘಟ್ಟ

ನಗರದ ಹೊರ ವಲಯದ ಬಾಲಾಜಿ ಕನ್ವೆಂಕ್ಷನ್ ಹಾಲ್‌ನಲ್ಲಿ ಮಂಗಳವಾರ ಸಂಜೆ ಹಮ್ಮಿಕೊಂಡಿದ್ದ ಗುರು ಪೂರ್ಣಿಮಾ ಹಾಗೂ ಸತ್ಸಂಗ ಕಾರ್ಯಕ್ರಮದ ದಿವ್ಯ ಸಾನ್ನಿಧ್ಯ ವಹಿಸಿ ಮಾತನಾಡಿದ ಶ್ರೀಗಳು, ಸಮಾಜದಲ್ಲಿ ಅಪ್ಪಂದಿರಿಗಿಂತ ತಾಯಂದಿರು ಸ್ವಲ್ಪ ಸಂಸ್ಕಾರವಂತರಾಗಿದ್ದರೆ ಮಕ್ಕಳು ಕೂಡ ಸಮಾಜದಲ್ಲಿ ಸಂಸ್ಕಾರವಂತರಾಗಿ ಬೆಳೆದು ಉತ್ತಮ ಸ್ಥಾನಮಾನ ಪಡೆಯಲು ಸಾಧ್ಯವಾಗುತ್ತದೆ ಎಂದರು.

ಚಿಕ್ಕಬಳ್ಳಾಪುರದ ಆದಿಚುಂಚನಗಿರಿ ಮಹಾ ಸಂಸ್ಥಾನ ಮಠದ ಶಾಖೆಯಲ್ಲಿ ಸುಮಾರು 33 ಸಾವಿರ ಮಕ್ಕಳು ವಿದ್ಯೆ ಪಡೆಯುತ್ತಿದ್ದಾರೆ. ಇಂದು ಸಾಮಾನ್ಯ ಕೂಲಿ ಮಾಡುವ ವ್ಯಕ್ತಿಗೂ ಕೂಡ ಶಿಕ್ಷಣದ ಮಹತ್ವ ಅರ್ಥ ಆಗಿರುವುದರಿಂದ ಮಾಡಿದ ಕೂಲಿ ಹಣವನ್ನು ಮಕ್ಕಳ ಶಿಕ್ಷಣಕ್ಕೆ ಹೆಚ್ಚು ಬಳಕೆ ಮಾಡುತ್ತಿದ್ದಾರೆಯೇ ವಿನಹಃ ಯಾವುದಕ್ಕೂ ಅನವಶ್ಯಕವಾಗಿ ಖರ್ಚು ಮಾಡುತ್ತಿಲ್ಲ ಎಂದರು.

ಸಮುದ್ರ ಅಥವಾ ನದಿ ದಾಟಲು ಯಾವ ರೀತಿ ನಮಗೆ ದೋಣಿ ಅಥವಾ ಹಡಗು ಮುಖ್ಯವೋ, ಅದೇ ರೀತಿ ನಮ್ಮ ಬದುಕಿನ ಸಂಸಾರ ಸಾಗಬೇಕಾದರೆ ಗುರುಗಳ ಪಾದುಕೆಗಳ ಮೇಲೆ ಭಕ್ತಿ ಇಡುವುದು ಬಹಳ ಮುಖ್ಯ ಎಂದರು, ಚಿಕ್ಕಬಳ್ಳಾಪುರ ಅನೇಕ ಸಾಧು, ಸಂತರು, ಶರಣರು ತಪಸ್ಸು ಮಾಡಿ ಹೋಗಿರುವ ಪುಣ್ಯ ಭೂಮಿ. ಆಧ್ಯಾತ್ಮಿಕತೆಯ ವಿಚಾರದಲ್ಲಿ ಅನೇಕ ಸಂಗತಿಗಳು ಜಿಲ್ಲೆಯಲ್ಲಿ ಮೇಳೈಸಿವೆ ಎಂದು ಹೇಳಿದರು.