ತೆರಿಗೆ ವಸೂಲಾತಿಯಲ್ಲಿ ಜಿಲ್ಲೆಗೆ ಮುಂಡರಗಿ ಪುರಸಭೆ ಪ್ರಥಮ, ಡಿಸಿಯಿಂದ ಅಭಿನಂದನೆ

ಮುಂಡರಗಿ:ಮುಂಡರಗಿ ಪುರಸಭೆಗೆ 2024-25ನೇ ಸಾಲಿನ ಆಸ್ತಿ ತೆರಿಗೆ, ನೀರಿನ ತೆರಿಗೆ, ಮಳಿಗೆ ತೆರಿಗೆ, ಉದ್ದಿಮೆ ತೆರಿಗೆ ಸಂಗ್ರಹಿಸಲು ಗುರಿ ನಿಗದಿ ಪಡಿಸಲಾಗಿತ್ತು. ಇಲ್ಲಿನ ಮುಖ್ಯಾಧಿಕಾರಿ ಮಾರ್ಗದರ್ಶನದಲ್ಲಿ ಅಧಿಕಾರಿಗಳು ಹಾಗೂ ಸಿಬ್ಬಂದಿ ನವಂಬರ್ ಅಂತ್ಯದ ವೇಳೆಗೆ ಸಂಪೂರ್ಣ ತೆರಿಗೆ ವಸೂಲಿ ಮಾಡುವ ಮೂಲಕ ಗುರಿ ತಲುಪಿದ್ದು, ಮುಂಡರಗಿ ಪುರಸಭೆಗೆ ಮಂಗಳವಾರ ಗದಗನಲ್ಲಿ ಜಿಲ್ಲಾಧಿಕಾರಿಗಳಿಂದ ಮುಖ್ಯಾಧಿಕಾರಿಗೆ ಅಭಿನಂದನಾ ಪತ್ರ ದೊರೆತಿದೆ ಎಂದು ಪುರಸಭೆ ಅಧ್ಯಕ್ಷೆ ನಿರ್ಮಲಾ ಕೊರ್ಲಹಳ್ಳಿ ಹೇಳಿದರು.

ಪುರಸಭೆ ಉಪಾಧ್ಯಕ್ಷ ನಾಗೇಶ ಹುಬ್ಬಳ್ಳಿ ಮಾತನಾಡಿ, ಪ್ರತಿ ವರ್ಷ ಶೇ.70 ರಿಂದ 75ರಷ್ಟು ಆಗುತ್ತಿದ್ದ ಕರವಸೂಲಾತಿ ಪ್ರಸ್ತುತ ವರ್ಷ ಪಟ್ಟಣದ ಜನತೆ ಹಾಗೂ ವ್ಯಾಪಾರಸ್ಥರ ಸಹಕಾರದಿಂದ ಮುಂಡರಗಿ ಪುರಸಭೆ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ 100ಕ್ಕೆ 100 ರಷ್ಟು ಕರವಸೂಲಾತಿ ಆಗಿದೆ. ಹೀಗಾಗಿ ಪಟ್ಟಣದ ಅಭಿವೃದ್ಧಿಗೆ ಬರುವ ಎಲ್ಲ ಯೋಜನೆಯ ಅನುದಾನಗಳು 100ಕ್ಕೆ 100ರಷ್ಟು ಬರುತ್ತವೆ. ಇದರಿಂದ ಪಟ್ಟಣದಲ್ಲಿ ವಿವಿಧ ಕಾಮಗಾರಿ ಮಾಡಲು ಸಾಧ್ಯವಾಗುತ್ತದೆ. ಪುರಸಭೆಯೊಂದಿಗೆ ಸಾರ್ವಜನಿಕರ ಸಹಕಾರ ಹೀಗೆ ಇರಬೇಕು ಎಂದರು.

ಪುರಸಭೆ ಮುಖ್ಯಾಧಿಕಾರಿ ಶಂಕರ್ ಹುಲ್ಲಮ್ಮನವರ ಮಾತನಾಡಿ, 2024-25ನೇ ಸಾಲಿನ ಕರವಸೂಲಾತಿ ನಿಗದಿತ ಸಮಯಕ್ಕಿಂತ 6 ತಿಂಗಳ ಮೊದಲೇ ಪೂರ್ಣಗೊಂಡಿರುವುದಕ್ಕೆ ನಮ್ಮ ಆಡಳಿತ ಮಂಡಳಿ ಮತ್ತು ಪಟ್ಟಣದ ಜನತೆ ಹಾಗೂ ವ್ಯಾಪಾರಸ್ಥರು ಕಾರಣರಾಗಿದ್ದಾರೆ. ಹೀಗಾಗಿ ಎಲ್ಲರಿಗೂ ಇಲಾಖೆ ಪರವಾಗಿ ಅಭಿನಂದಿಸುವೆ. 100ಕ್ಕೆ 100 ಕರ ವಸೂಲಾಗುವುದರಿಂದ ಕೇಂದ್ರ ಸರ್ಕಾರದಿಂದ ಬರುವ 15ನೇ ಹಣಕಾಸು ಯೋಜನೆಯ ₹ 5 ಕೋಟಿ ಅನುದಾನ ಹಾಗೂ ರಾಜ್ಯ ಸರ್ಕಾರದಿಂದ ಬರುವ ಎಸ್.ಎಫ್.ಸಿ.ಅನುದಾನ ಸಂಪೂರ್ಣವಾಗಿ ಬರುತ್ತದೆ ಎಂದರು.