ಶುಶ್ರೂಷಕ ವೃತ್ತಿ ಉದ್ಯೋಗವಲ್ಲ, ಇದೊಂದು ಸೇವೆ: ರಾಮಕೃಷ್ಣ ರೆಡ್ಡಿ ಅಭಿಮತ

ಕನ್ನಡಪ್ರಭ ವಾರ್ತೆ ಚಿಕ್ಕಬಳ್ಳಾಪುರ

ತಾಲೂಕಿನ ಪೆರೇಸಂದ್ರ ಗ್ರಾಮದಲ್ಲಿ ಶಾಂತಾ ವೈದ್ಯಕೀಯ ಆರೋಗ್ಯ ಶಿಕ್ಷಣ ಕೋರ್ಸುಗಳ ವಿದ್ಯಾರ್ಥಿಗಳ ಪ್ರಮಾಣ ವಚನ, ದೀಪ ಬೆಳಗಿಸುವ ಕಾರ್ಯಕ್ರಮ ಹಾಗೂ ಶ್ವೇತ ಉಡುಪು ಧರಿಸುವ ಕಾರ್ಯಕ್ರಮದಲ್ಲಿ ಪ್ರಮಾಣ ವಚನ ಬೋಧಿಸಿ ಮಾತನಾಡಿದ ಅವರು, ಅರೆ ವೈದ್ಯಕೀಯ ಶಿಕ್ಷಣ ಕೋರ್ಸುಗಳು ಆರೋಗ್ಯವಂತ ರಾಷ್ಟ್ರ ನಿರ್ಮಾಣದಲ್ಲಿ ಅತ್ಯಂತ ಮುಖ್ಯ ಪಾತ್ರವಹಿಸುತ್ತವೆ. ಕೇವಲ ಜ್ಞಾನವನ್ನು ತುಂಬಿಸುವುದರಿಂದ ಸಮರ್ಥ ಹಾಗೂ ಸಂವೇದನಾಶೀಲ ಶುಶ್ರೂಷಕರು ರೂಪುಗೊಳ್ಳಲಾರರು. ಮಾನವನ ಶರೀರ ವಿಜ್ಞಾನದ ಬಗ್ಗೆ ಆಳವಾದ ಜ್ಞಾನಪಡೆಯುವ ಜೊತೆಗೆ ರೋಗಿಗಳ ತಪಾಸಣೆ, ಪರೀಕ್ಷೆ, ಚಿಕಿತ್ಸೆ ಹಾಗೂ ಆರೋಗ್ಯಕರ ಜೀವನ ಕೌಶಲಗಳ ಬಗ್ಗೆ ಚಿಕಿತ್ಸೆ ಮತ್ತು ಆರೈಕೆಗಳಲ್ಲಿ ರೋಗಿಗಳ ಹತ್ತಿರವಿದ್ದು ಆತ್ಮವಿಶ್ವಾಸ ಮೂಡಿಸಿ ಅವರ ಪ್ರೀತಿ, ಗೌರವಗಳಿಗೆ ಪಾತ್ರರಾಗುವರೇ ನಿಜವಾದ ಶುಶ್ರೂಷಕರಾಗುತ್ತಾರೆ ಎಂದರು.

ಗ್ರಾಮೀಣ ಭಾಗದಲ್ಲಿ ಇಂತಹ ಒಂದು ಸುಸಜ್ಜಿತ ಹಾಗೂ ಆಧುನಿಕ ಸೌಲಭ್ಯಗಳುಳ್ಳ ಆರೋಗ್ಯ ವಿಜ್ಞಾನ ಕೋರ್ಸುಗಳ ಕಾಲೇಜು ಸ್ಥಾಪಿಸಿರುವ ಡಾ.ಕೆ. ಸುಧಾಕರ್ ಕಾರ್ಯ ಸಾರ್ಥಕವಾಗಿದೆ ಎಂದು ಪ್ರಶಂಸಿಸಿದರು. ಇಲ್ಲಿ ಜ್ಞಾನ ಸಂಪಾದಿಸುವ ಜೊತೆಗೆ ಕೌಶಲ್ಯಗಳು, ಸಾಮಾಜಿಕ ಕಾಳಜಿ ಹಾಗೂ ಮಾನವೀಯತೆ ಮೈಗೂಡಿಸಿಕೊಳ್ಳಬೇಕೆಂದು ಸಲಹೆ ನೀಡಿದರು.

ಕಾರ್ಯಕ್ರಮದಲ್ಲಿ ಬೆಂಗಳೂರಿನ ಆರ್ ಆರ್ ನರ್ಸಿಂಗ್ ಕಾಲೇಜಿನ ಪ್ರಾಂಶುಪಾಲ ಹಾಗೂ ಭಾರತೀಯ ತರಬೇತಿ ಪಡೆದ ಶುಶ್ರೂಷಕರ ಸಂಘದ ಕರ್ನಾಟಕ ಶಾಖೆಯ ಉಪಾಧ್ಯಕ್ಷ ಡಾ.ಕೆ.ರಾಮು, ಶಾಂತಾ ಶಿಕ್ಷಣ ಸಂಸ್ಥೆಗಳ ನಿರ್ದೇಶಕ ಡಾ.ಕೋಡಿರಂಗಪ್ಪ, ಪ್ರಾಂಶುಪಾಲರು ಡಾ.ನವೀನ್ ಸೈಮನ್, ಉಪಪ್ರಾಂಶುಪಾಲೆ ಡಯಾನ, ಬೋಧಕರಾದ ಡಾ.ನರೇಶ್, ಜಾಯಿದ್, ಗೀತಾ, ವ್ಯಾಲಂಟೇನ್, ಡಾ.ಆಯಿಷಾ, ಡ್ಯಾನಿಯಲ್, ಅನ್ವೇಷ, ಸುಪ್ರಿತಾ, ಸುಭಿಕ್ಷಾ, ವಿವಿಧ ಆರೋಗ್ಯ ಕೋರ್ಸುಗಳ ತರಬೇತಿ ವಿದ್ಯಾರ್ಥಿಗಳು ಇದ್ದರು. ರೋಗಿಗಳಲ್ಲಿ ಆತ್ಮವಿಶ್ವಾಸ ಮೂಡಿಸಿ: ಡಾ.ಪ್ರೀತಿ ಸುಧಾಕರ್: ಶಾಂತಾ ಸಂಸ್ಥೆಯ ಮ್ಯಾನೆಜಿಂಗ್ ಟ್ರಸ್ಟಿ ಡಾ. ಪ್ರೀತಿ ಸುಧಾಕರ್ ಮಾತನಾಡಿ, ನರ್ಸಿಂಗ್ ಶಿಕ್ಷಣ ತರಬೇತಿ ಹೊಂದುವ ನೀವು, ವೃತ್ತಿಯ ಬಗ್ಗೆ ಪ್ರಮಾಣ ವಚನ ಮಾಡಿ ಇಂದು ದೀಪ ಬೆಳಗಿದ್ದೀರಿ, ನಾಳೆ ಶುಶ್ರೂಷಕರಾದ ನಂತರ ಪ್ರತಿ ರೋಗಿಯಲ್ಲಿ ಆತ್ಮವಿಶ್ವಾಸ ಮೂಡಿಸಿ ಅವರಲ್ಲಿ ಅರಿವಿನ ಬೆಳಕನ್ನು ಮೂಡಿಸಬೇಕು. ಸಮರ್ಥ ಶುಶ್ರೂಷಕರು ಸಂವೇಧನಾಶೀಲರಾಗಿರಬೇಕಲ್ಲದೆ, ನರ್ಸಿಂಗ್ ವೃತ್ತಿಯಲ್ಲಿ ಪರಿಣಿತಿ, ಕೌಶಲಗಳೊಂದಿಗೆ ಸೇವಾ ಸಂಹಿತೆಯನ್ನು ಬೆಳೆಸಿಕೊಂಡಾಗ ಮಾತ್ರ ನರ್ಸಿಂಗ್ ಸೇವೆಗೆ ನ್ಯಾಯ ಒದಗಿಸಿ ಧನ್ಯತೆ ಪಡೆಯಬಲ್ಲಿರಿ. ಜ್ಞಾನ ಮತ್ತು ಕೌಶಲ್ಯಗಳ ಜೊತೆಗೆ ಕಾರುಣ್ಯ, ಅನುಭೂತಿ, ಸಮರ್ಪಣಾ ಭಾವ ಮತ್ತು ರೋಗಿಗಳ ಬಗ್ಗೆ ಕಾಳಜಿ ಹೊಂದಿ ಕರ್ತವ್ಯ ನಿರ್ವಹಿಸಬೇಕೆಂದು ಕರೆನೀಡಿದರು.

ನಿಮ್ಮ ಸಾಮರ್ಥ್ಯದ ಜೊತೆ ತಾಂತ್ರಿಕ ಕೌಶಲ್ಯಗಳು, ಸಂವೇದನಾಶೀಲತೆ ಅತ್ಯಂತ ಮುಖ್ಯವಾಗಿದ್ದು ನಿಮ್ಮ ವೃತ್ತಿಯಲ್ಲಿ ಪರಿಣಿತಿ ಮತ್ತು ಮಾನವೀಯತೆ ಸಮನ್ವಯಗೊಳ್ಳುವಂತೆ ನಿಮ್ಮನ್ನು ರೂಪಿಸಿಕೊಳ್ಳಬೇಕೆಂದು ಕಿವಿಮಾತು ಹೇಳಿದರು.