ಅಧಿಕಾರಿಗಳು ರೈತರೊಂದಿಗೆ ಸೌಜನ್ಯದಿಂದ ವರ್ತಿಸಲಿ: ಶಾಸಕ ಮಾನೆ ಸೂಚನೆ

ಹಾನಗಲ್ಲ: ಬೆಳೆ ಉಳಿಸಿಕೊಳ್ಳಬೇಕು ಎನ್ನುವ ಧಾವಂತದಲ್ಲಿ ರೈತ ಸಮೂಹವಿದೆ. ರೈತರು ಫೋನ್ ಮಾಡಿದಾಗ ರಿಸೀವ್ ಮಾಡಿ. ವಸ್ತುಸ್ಥಿತಿ ತಿಳಿಸಿ, ವಾಸ್ತವದ ಬಗ್ಗೆ ಮನವರಿಕೆ ಮಾಡಿಕೊಡಿ. ವಿನಾಕಾರಣ ಅವರನ್ನು ಕೆರಳಿಸುವ ಕೆಲಸ ಮಾಡಬೇಡಿ. ಸೌಜನ್ಯದಿಂದ ವರ್ತಿಸಿ ಸಹಕಾರ ಪಡೆದುಕೊಳ್ಳಿ ಎಂದು ಶಾಸಕ ಶ್ರೀನಿವಾಸ ಮಾನೆ ಅವರು ಹೆಸ್ಕಾಂ ಎಇಇ ಆನಂದ ಅವರಿಗೆ ಸೂಚಿಸಿದರು.ಇಲ್ಲಿನ ತಾಪಂ ಸಭಾಂಗಣದಲ್ಲಿ ನಡೆದ ತ್ರೈಮಾಸಿಕ ಕೆಡಿಪಿ ಮುಂದುವರಿದ ಸಭೆಯಲ್ಲಿ ಮಾತನಾಡಿದರು.

ಕೃಷಿ ಇಲಾಖೆಯಲ್ಲಿ ಏಜೆಂಟರ ಹಾವಳಿ ಹೆಚ್ಚಾಗಿದೆ. ಕಂಪನಿಗಳೊಂದಿಗೆ ಒಳ ಒಪ್ಪಂದ ಮಾಡಿಕೊಂಡು ರೈತರಿಗೆ ನೀಡುವ ಬೀಜ ಕೃಷಿ ಸಾಮಗ್ರಿ ವಿತರಣೆಯಲ್ಲಿ ಮೋಸ ಮಾಡುತ್ತಿದ್ದೀರಿ. ಕೃಷಿ ಸೌಲಭ್ಯಗಳ ಮಾಹಿತಿ ಜನರಿಗೆ ನೀಡುತ್ತಿಲ್ಲ. ನೀವು ವಿತರಿಸುವ ಸ್ಪಿಂಕ್ಲರ್, ಹನಿ ನೀರಾವರಿ, ತಾಡಪತ್ರಿಗಳು ಗುಣಮಣ್ಣದವುಗಳಿಲ್ಲ. ಕೃಷಿ ಮಾರಾಟ ಕೇಂದ್ರಗಳಲ್ಲಿ ಬೆಲೆ ಸೂಚಕೆ ಹಾಕದಿದ್ದರೂ ಸುಮ್ಮನಿದ್ದೀರಿ ಎಂದು ಕೃಷಿ ಅಧಿಕಾರಿ ವಿರುದ್ಧ ಗ್ಯಾರಂಟಿ ಅನುಷ್ಠಾನ ಸಮಿತಿ ಅಧ್ಯಕ್ಷ ವಿಜಕುಮಾರ ದೊಡ್ಡಮನಿ ಹರಿಹಾಯ್ದರು.ಬಮ್ಮನಹಳ್ಳಿ ಕೆಎಸ್‌ಆರ್‌ಟಿಸಿ ಬಸ್ ನಿಲ್ದಾಣದಲ್ಲಿ ಖಾಸಗಿ ವಾಹನ ನಿಲ್ಲುವುದು ಮಾತ್ರವಲ್ಲ, ಬಸ್‌ಗಳಿಗೆ ನಿಲ್ಲಲು ಅವಕಾಶ ನೀಡುತ್ತಿಲ್ಲ. ಅಲ್ಲಿನ ಶೌಚಾಲಯ ಅವ್ಯವಸ್ಥೆ ನಾಚಿಕೆ ತರುತ್ತಿದೆ. ಹಳೆ ಬಸ್ ನಿಲ್ದಾಣದ ದುರುಪಯೋಗವಾಗುತ್ತಿದೆ ಎಂದು ಸದಸ್ಯರು ದೂರಿದರು. ಕೃಷಿ ಸಖಿಯರು ಹಾಗೂ ಪಶು ಸಖಿಯರ ಆಯ್ಕೆಯಲ್ಲಿ ನಿಯಮಗಳನ್ನು ಪಾಲಿಸಿಲ್ಲ. ಇವರ ಕೆಲಸದ ನಿರ್ವಹಣೆ ಸಮರ್ಪಕವಿಲ್ಲ ಎಂದು ಕೂಡ ದೂರಿದರು.