ಸಂಘಟನೆಗಳು ಅನಾಥ, ಚಳವಳಿಗಳಿಗೆ ಮಂಕು: ಜನ್ನಿ

ಕನ್ನಡಪ್ರಭ ವಾರ್ತೆ ಬೆಂಗಳೂರು

ಶನಿವಾರ ಕನ್ನಡ ಭವನದ ಕರ್ನಾಟಕ ನಾಟಕ ಅಕಾಡೆಮಿಯ ರಂಗ ಚಾವಡಿಯಲ್ಲಿ ಆಯೋಜಿಸಿದ್ದ ‘ರಂಗ ಸಂವಾದ-04’ರಲ್ಲಿ ಅತಿಥಿಯಾಗಿ ಅವರು ಮಾತನಾಡಿ, 1970-80ರ ದಶಕದಲ್ಲಿ ಸಂಘಟನೆಗಳ ನಾಯಕರು ಬೇಟೆ ನಾಯಿಗಳಂತೆ ಶೋಷಿತರಿಗೆ, ದಲಿತರಿಗೆ ಅನ್ಯಾಯ ಮಾಡಿದವರ ವಿರುದ್ಧ ವ್ಯವಸ್ಥಿತವಾಗಿ ಪ್ರಬಲ ಹೋರಾಟ ಮಾಡುತ್ತಿದ್ದರು. ಪ್ರಗತಿಪರ, ಜನಪರವಾಗಿ ಕೆಲಸ ಮಾಡುತ್ತಿದ್ದ ನಾಯಕರು ಯುವಕರನ್ನು ಹುರಿದುಂಬಿಸಿ ಎಲ್ಲಿಯೂ ಬಲಹೀನರಾಗದಂತೆ ನೋಡಿಕೊಳ್ಳುತ್ತಿದ್ದರು. ಹೋರಾಟದ ಸಣ್ಣ ಬೀಜ ಬಿತ್ತಿದರೆ ಸಾವಿರಾರು ಸಂಖ್ಯೆಯಲ್ಲಿ ಜನರು ಪ್ರತಿಭಟನೆಗೆ ಬರುತ್ತಿದ್ದರು. ಇಂದು ಪಟ್ಟಭದ್ರ ಹಿತಾಸಕ್ತಿ ಹೊಂದಿರುವವರು ಸಂಘಟನೆಗೆ ಸೇರಿಕೊಳ್ಳುತ್ತಿರುವುದರಿಂದ ಚಳವಳಿಗಳು ಸೊರಗುತ್ತಿವೆ ಎಂದರು.

ನಂತರ ದಲಿತ ಕವಿ ಪ್ರೊ.ಸಿದ್ದಲಿಂಗಯ್ಯ ಅವರ ಒಡನಾಟದಲ್ಲಿ ಸಾಕಷ್ಟು ಹೋರಾಟ, ಚಳವಳಿಗಳಲ್ಲಿ ಪಾಲ್ಗೊಂಡಿದ್ದೇನೆ. ‘ಸಮುದಾಯ’ ಸಾಂಸ್ಕೃತಿಕ ಸಂಘಟನೆಯಲ್ಲಿ ಹಲವಾರು ಬೀದಿ ನಾಟಕ ಸೇರಿದಂತೆ ದೊಡ್ಡ ನಾಟಕಗಳ ಮೂಲಕ ಜನರತ್ತ ರಂಗಭೂಮಿಯನ್ನು ಕೊಂಡೊಯ್ಯಲಾಯಿತು. ವೃತ್ತಿ ರಂಗ ಭೂಮಿಯ ಕಲಾವಿದರ ಗೋಳು, ಬದುಕು, ನೋವು, ಎಲ್ಲವನ್ನೂ ಅರಗಿಸಿಕೊಂಡಿದ್ದೇವೆ. ಅದರ ಆಧಾರದ ಮೇಲೆ ಆಧುನಿಕ ರಂಗಭೂಮಿಯಲ್ಲಿ ಕೆಲಸ ಮಾಡಲು ಪ್ರಯತ್ನ ಮಾಡುತ್ತಿದ್ದೇವೆ ಎಂದು ಹೇಳಿದರು.