ಬತ್ತದ ಗದ್ದೆ ಜಲಾವೃತ, ಮನೆಗಳಿಗೆ ಹಾನಿ

ಗಂಗಾವತಿ ತಾಲೂಕಿನಾದ್ಯಂತ ಧಾರಾಕಾರ ಮಳೆ

ನಗರ ಸೇರಿದಂತೆ ತಾಲೂಕಿನಾದ್ಯಂತ ಸೋಮವಾರ ರಾತ್ರಿ ಧಾರಾಕಾರ ಮಳೆ ಸುರಿದ ಪರಿಣಾಮವಾಗಿ ಬತ್ತದ ಗದ್ದೆಗಳು ಜಲಾವೃಗೊಂಡಿವೆ. ಅಲ್ಲದೆ ಗಂಗಾವತಿ, ವೆಂಕಟಗಿರಿ ಮತ್ತು ಮರಳಿ ಗ್ರಾಮಗಳಲ್ಲಿ ಮನೆಗಳಿಗೆ ಹಾನಿಯಾಗಿದೆ.

200ಕ್ಕೂ ಹೆಚ್ಚು ಎಕರೆ ಬತ್ತದ ಗದ್ದೆಗಳಲ್ಲಿ ನೀರು ತುಂಬಿದ್ದರಿಂದ ಈಚೇಗೆ ನಾಟಿ ಮಾಡಿದ ಸಸಿಗಳು ಹಾನಿಯಾಗಿವೆ.

ನಗರದ ಜೈ ಭೀಮನಗರ 5, ಹಿರೇಜಂತಗಲ್ 1, ವೆಂಕಟಗಿರಿ ಹೋಬಳಿಗಳಲ್ಲಿ 4, ಮರಳಿ ಹೋಬಳಿಗಳಲ್ಲಿ 6 ಮನೆಗಳು ಸೇರಿದಂತೆ 16 ಮನೆಗಳಿಗೆ ಹಾನಿಯಾಗಿದೆ. ಅಲ್ಲದೆ ಕೆಲ ವಾರ್ಡುಗಳ ಗುಡಿಸಲುಗಳಲ್ಲಿ ನೀರು ನುಗ್ಗಿವೆ. ಸ್ಥಳಕ್ಕೆ ಪೌರಾಯುಕ್ತ ವಿರೂಪಾಕ್ಷಮೂರ್ತಿ ಭೇಟಿ ನೀಡಿ ಪರಿಶೀಲನೆ ಮಾಡಿದರು.

ಧಾರಾಕಾರ ಮಳೆ ಪರಿಣಾಮವಾಗಿ ನಗರದ ಕೆಲ ಶಾಲೆಗಳ ಆವರಣದಲ್ಲಿ ನೀರು ನುಗ್ಗಿದೆ. ಲಿಟಲ್ ಹಾರ್ಟ್ಸ್ ಆಂಗ್ಲ ಮಾಧ್ಯಮ ಶಾಲೆಯ ಆವರಣ ಮತ್ತು ರಸ್ತೆಯಲ್ಲಿ ನೀರು ತುಂಬಿದ್ದರಿಂದ ವಿದ್ಯಾರ್ಥಿಗಳು ಹೋಗಿ ಬರಲು ತೊಂದರೆಯಾಗುತ್ತಿದೆ ಎಂಬ ಕಾರಣಕ್ಕೆ ರಜೆ ಘೋಷಿಸಲಾಗಿತ್ತು.

ಇಡೀ ರಾತ್ರಿ ಸುರಿದ ಮಳೆಯಿಂದಾಗಿ ಗ್ರಾಮೀಣ ಪ್ರದೇಶಗಳಲ್ಲಿರುವ ರಸ್ತೆಗಳು ಕಿತ್ತು ಹೋಗಿವೆ. ತಾಲೂಕಿನ ಮರಳಿ, ಶ್ರೀರಾಮನಗರ, ಡಣಾಪುರ, ಜಂಗಮರ ಕಲ್ಗುಡಿ ಕ್ಯಂಪ್, ಹೊಸಕೇರಾ ಕ್ಯಾಂಪ್ ಗಳಿಗೆ ಹೋಗುವ ರಸ್ತೆಗಳು ಮಳೆಯ ನೀರಿನ ರಭಸಕ್ಕೆ ಕಿತ್ತು ಹೋಗಿವೆ. ಇದರಿಂದ ವಾಹನಗಳ ಸಂಚಾರಕ್ಕೆ ತೊಂದರೆಯಾಗಿದ್ದಲ್ಲದೆ, ಗ್ರಾಮೀಣ ಪ್ರದೇಶದಿಂದ ನಗರಕ್ಕೆ ಬರುವ ಶಾಲಾ-ಕಾಲೇಜು ವಿದ್ಯಾರ್ಥಿಗಳು ಬಸ್‌ಗಾಗಿ ಪರದಾಡಿದರು.