ಹೆಚ್ಚುತ್ತಿರುವ ಕಳ್ಳತನಕ್ಕೆ ಬೆಚ್ಚಿಬಿದ್ದ ಜನತೆ

ಈರಣ್ಣಾ ಬುಡ್ಯಾಗೋಳ

ಕತ್ತಲೆ ಆವರಿಸಿದರೆ ಸಾಕು ರಾಮದುರ್ಗ ಪಟ್ಟಣದಲ್ಲಿ ಯಾರ ಮನೆಗೆ ನುಗ್ಗಿ ಕಳ್ಳತನ ಮಾಡುತ್ತಾರೆ ಎಂಬ ಜನರನ್ನು ಆವರಿಸಿಕೊಂಡು ಬಿಟ್ಟಿದೆ. ಪೊಲೀಸ್‌ ಇಲಾಖೆ ಕೂಡ ದುಷ್ಕರ್ಮಿಗಳನ್ನು ಪತ್ತೆ ಮಾಡಲು ಪ್ರಯತ್ನ ನಡೆಸಿದೆಯಾದರೂ ಅದು ಇನ್ನೂ ಯಶಸ್ವಿಯಾಗುತ್ತಿಲ್ಲ. ರಾತ್ರಿ ವೇಳೆ ಹೆಚ್ಚು ಗಸ್ತು ತಿರುಗಬೇಕು ಎಂದು ಸಾರ್ವಜನಿಕರು ಆಗ್ರಹಿಸುತ್ತಿದ್ದಾರೆ. ಇದರಿಂದ ಕಳ್ಳರಲ್ಲಿ ಸ್ವಲ್ವವಾದರೂ ಭಯವಾಗುತ್ತದೆ ಎನ್ನುತ್ತಾರೆ.ಈಗಾಗಲೇ ಹಲವಾರು ಮನೆಗಳು, ಅಂಗಡಿಗಳಲ್ಲಿ ದುಷ್ಕರ್ಮಿಗಳು ತಮ್ಮ ಕೈ ಚಳಕವನ್ನು ತೋರಿಸಿದ್ದಾರೆ. ಇಷ್ಟಾದರೂ ಪೊಲೀಸರ ಕೈಗೂ ಸಿಗದೆ ಅವರನ್ನು ಯಾಮಾರಿಸುತ್ತಿದ್ದಾರೆ. ಇದು ಕೂಡ ಜನರ ಆತಂಕಕ್ಕೆ ಕಾರಣವಾಗಿದೆ. ಆಗೊಂದು, ಈಗೊಂದು ಕಳವು ಪ್ರಕರಣಗಳು ನಡೆಯುತ್ತಿದ್ದರೂ ದುಷ್ಕರ್ಮಿಗಳ ಕೈಚಳಕ ಮಾತ್ರ ಗೊತ್ತಾಗದಂತೆ ನಡೆಯುತ್ತಿರುವುದು ಮಾತ್ರ ವಿಪರ್ಯಾಸವೇ ಸರಿ.ಎಲ್ಲೆಲ್ಲಿ ಕಳ್ಳತನವಾಗಿವೆ?:

ಕಳ್ಳರು ಕಿಟಕಿ, ಬಾಗಿಲು ಒಡೆದು ಮನೆ ಒಳಗೆ ಹೋಗಿ ಕಳ್ಳತನ ಮಾಡುವುದು ಮಾಮೂಲಿ. ಆದರೆ, ಈ ಕಳ್ಳರು ಕೆಲವು ಸಂದರ್ಭದಲ್ಲಿ ಬೇರೆ ತಂತ್ರಗಳನ್ನೇ ಬಳಸುತ್ತಿದ್ದಾರೆ. ಪಟ್ಟಣ ಮುಖ್ಯರಸ್ತೆಗೆ ಹೊಂದಿಕೊಂಡಿರುವ ಗಡದಕೇರಿಯಲ್ಲಿ ಕೆಲವು ಮನೆಗಳಿಗೆ ರಾತ್ರಿ ಒಂದು ಗಂಟೆಯ ನಂತರ ಮನೆ ಬಾಗಿಲು ಬಡಿಯುತ್ತಾರೆ. ನಮಗೆ ಹಸಿವಾಗಿದೆ, ತಿನ್ನಲು ಅನ್ನ ನೀಡಿ ಎಂದು ಕೂಗುತ್ತಾರೆ ಎಂದು ಸಾರ್ವಜನಿಕರೇ ಹೇಳುತ್ತಿದ್ದಾರೆ. ಇದು ಸಾರ್ವಜನಿಕರು ಬೆಚ್ಚಿಬೀಳಲು ಮತ್ತೊಂದು ಕಾರಣವಾಗಿದೆ. ಒಂದು ವೇಳೆ ಮನೆಯೊಳಗೆ ಇರುವವರು ಬಾಗಿಲು ತೆರೆದು ಹೊರ ಬಂದರೆ ನಾಲ್ಕೈದು ಜನರ ತಂಡ ಮುಸುಕುಧಾರಿಗಳು ಮನೆ ಒಳಗೆ ಓಡಿ ಹೋಗುತ್ತಾರೆ. ಹೀಗಾಗಿ ಜನರು ಕೂಡ ಮುಗ್ದರಾಗಿರುವುದರಿಂದ ಇಂತಹ ದುಷ್ಕರ್ಮಿಗಳ ಮಾತನ್ನು ಕೇಳಿದರೆ ಅಪಾಯ ತಪ್ಪಿದ್ದಲ್ಲ. ಹೀಗಾಗಿ ಪೊಲೀಸರು ಇಂತಹ ದುಷ್ಕರ್ಮಿಗಳ ಹೆಡೆಮುರಿ ಕಟ್ಟಬೇಕಾದ ಅನಿವಾರ್ಯತೆ ಎದುರಾಗಿದೆ. ಮಾತ್ರವಲ್ಲ, ಸಾರ್ವಜನಿಕರಲ್ಲಿಯೂ ಈ ಕುರಿತಾಗಿ ಜಾಗೃತಿ ಮೂಡಿಸಬೇಕಿದೆ.