ಎಐ ಸೃಷ್ಟಿಸಿದ ಫೋಟೋ ನೋಡಿ ಜನರು ಕಂಗಾಲು; ಅರಣ್ಯ ಇಲಾಖೆ ಹೈರಾಣು..!

ಕನ್ನಡಪ್ರಭ ವಾರ್ತೆ ಮಂಡ್ಯ

ಒಂದು ಎಐ ಫೋಟೋ ಸೃಷ್ಟಿಸಿದ ಅವಾಂತರದಿಂದ ಪಟ್ಟಣದ ಜನರನ್ನು ಕೆಲ ಗಂಟೆಗಳ ಕಾಲ ಭಯದ ವಾತಾವರಣದಲ್ಲಿರುವಂತೆ ಮಾಡಿತ್ತು. ಎಐ ಫೋಟೋ ಹಾವಳಿಯಿಂದ ಜನರ ಜೊತೆಗೆ ಅರಣ್ಯ ಇಲಾಖೆ ಅಧಿಕಾರಿಗಳು ಬೆಸ್ತುಬಿದ್ದಿದ್ದು ಸುಳ್ಳಲ್ಲ.

ಸಾಮಾಜಿಕ ಜಾಲ ತಾಣದಲ್ಲಿ ಹರಿದಾಡುತ್ತಿರುವ ಕಪ್ಪು ಚಿರತೆ ಫೋಟೋ ನೋಡಿ ಪಟ್ಟಣದ ಜನರಲ್ಲಿ ಆತಂಕ ಸೃಷ್ಟಿಯಾಯಿತು. ಎಲ್ಲರೂ ಆ ಫೋಟೋ ನೋಡಿ ಭಯಗೊಂಡರು. ತೋಟಗಾರಿಕೆ ಇಲಾಖೆ ಸುತ್ತಮುತ್ತಲ ಜನರು ಅರಣ್ಯ ಇಲಾಖೆಗೆ ಸುದ್ದಿಮುಟ್ಟಿಸಿದರು. ವಿಚಿತ್ರವೆಂದರೆ, ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದ ಕಪ್ಪು ಚಿರತೆ ಫೋಟೋವನ್ನೂ ಅರಣ್ಯ ಇಲಾಖೆ ಅಧಿಕಾರಿಗಳೂ ನಿಜವೆಂದು ನಂಬಿದರು. ಕಪ್ಪು ಚಿರತೆ ಈ ಭಾಗದಲ್ಲಿ ಕಂಡುಬರುವುದಿಲ್ಲ ಎಂದು ಕೆಲ ಅಧಿಕಾರಿಗಳು ಹೇಳಿದರೂ ಜನರು ನಂಬಲಿಲ್ಲ. ಚಿರತೆ ಸೆರೆ ಹಿಡಿಯುವುದಕ್ಕೆ ಜನರಿಂದ ಒತ್ತಡ ಹೆಚ್ಚಾಯಿತಲ್ಲದೆ, ಅಧಿಕಾರಿಗಳ ವಿರುದ್ಧ ಜನರೂ ಆಕ್ರೋಶ ವ್ಯಕ್ತಪಡಿಸಲಾರಂಭಿಸಿದರು.

ಡ್ರೋನ್ ತಪಾಸಣೆಯಿಂದ ಕಪ್ಪು ಚಿರತೆ ಕಂಡುಬರಲಿಲ್ಲವಾದ್ದರಿಂದ ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದ್ದ ಫೋಟೋವನ್ನು ಚಿರತೆ ಸೆರೆ ಕಾರ್ಯಪಡೆ ತಂಡ ಸೂಕ್ಷ್ಮವಾಗಿ ಪರಿಶೀಲನೆ ನಡೆಸಿತು. ಕೊನೆಗೆ ಇದು ಎಐ ಬಳಸಿ ಸೃಷ್ಟಿಸಲಾಗಿರುವ ಫೋಟೋ. ಇದಕ್ಕೆ ಆತಂಕಪಡುವ ಅಗತ್ಯವಿಲ್ಲ ಎಂದು ವರದಿ ಕೊಟ್ಟು ಮೈಸೂರು ಕಡೆಗೆ ತೆರಳಿತು.