ಪೋಸ್ಟರ್‌ ವಿವಾದ, ಶಾಸಕರ ಭೂಮಿಪೂಜೆ ಕಾರ್ಯಕ್ರಮಕ್ಕೆ ಅಡ್ಡಿ

ಬ್ಯಾಡಗಿ: ಮುಖ್ಯರಸ್ತೆ ಅಗಲೀಕರಣ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಪೋಸ್ಟರ್‌ ಹರಿದಾಡಿದ ಬೆನ್ನಲ್ಲೇ ಅಗಲೀಕರಣ ಹೋರಾಟ ಸಮಿತಿ ಸದಸ್ಯರು ಶಾಸಕ ಬಸವರಾಜ ಶಿವಣ್ಣನವರ ಭೂಮಿಪೂಜೆ ಕಾರ್ಯಕ್ರಮಕ್ಕೆ ನುಗ್ಗಿ ಘೇರಾವ್‌ ಹಾಕಿ ಅಡ್ಡಿಪಡಿಸಿದ ಘಟನೆ ಪಟ್ಟಣದಲ್ಲಿ ಮಂಗಳವಾರ ನಡೆಯಿತು.

ಪೋಸ್ಟರ್‌ ತಂದ ಕುತ್ತು: ನಗರ ಆಶ್ರಯ ಸಮಿತಿ ಸದಸ್ಯ ಗಿರೀಶ ಇಂಡಿಮಠ ಎಂಬ ವ್ಯಕ್ತಿ ಶಾಸಕರ ಭಾವಚಿತ್ರ ಬಳಸಿ, ಗಜೇಂದ್ರಗಡ - ಸೊರಬ-136 ರಾಜ್ಯ ಹೆದ್ದಾರಿ ರಸ್ತೆ ಅಭಿವೃದ್ಧಿ ಕಾಮಗಾರಿ ಕಿ.ಮೀ. 237.97ರಿಂದ 238.90 ಹಾಗೂ 249.20 ರಿಂದ 249.40 ಎಂದು ನಮೂದಿಸಿದ್ದೇ ಅಗಲೀಕರಣ ಹೋರಾಟ ಸಮಿತಿ ಸೇರಿದಂತೆ ಸಾರ್ವಜನಿಕರನ್ನು ಕೆರಳುವಂತೆ ಮಾಡಿತು.

ಯಾರು ಶಾಸಕರು?: ಶಾಸಕರ ಮಾತಿನ ಮೇಲೆ ವಿಶ್ವಾಸವಿಟ್ಟು ಅಗಲೀಕರಣ ಹೋರಾಟ ಸಮಿತಿ ಸಂಪೂರ್ಣ ಸಹಕಾರ ನೀಡುತ್ತಾ ಬಂದಿದೆ. ಆದರೆ ಇವತ್ತಿನ ಘಟನೆ ಹೋರಾಟ ಸಮಿತಿ ಸದಸ್ಯರು ದಿಗ್ಭ್ರಮೆ ಮೂಡುವಂತೆ ಮಾಡಿದ್ದಲ್ಲದೇ ನಮ್ಮನ್ನು ಕೆರಳುವಂತೆ ಮಾಡಿದೆ. ಅಗಲೀಕರಣ ವಿಷಯದಲ್ಲಿ ಕಾಂಗ್ರೆಸ್ ಕಾರ್ಯಕರ್ತರ ಉದ್ದೇಶ ತಿಳಿಯುತ್ತಿಲ್ಲ, ಪ್ರತಿ ಪೋಸ್ಟರಗಳಲ್ಲಿಯೂ ಶಾಸಕರಿಗಿಂತ ತಮ್ಮದೇ ಪೋಟೋಗಳನ್ನು ದೊಡ್ಡದು ಮಾಡಿ ಹಾಕಿಕೊಳ್ಳುತ್ತಿರುವುದು ಸ್ಥಳೀಯ ಶಾಸಕರು ಯಾರೆಂಬ ಅನುಮಾನ ಮೂಡುವಂತಾಗಿದೆ. ಕೂಡಲೇ ಇಂತಹ ಘಟನೆಗಳಿಗೆ ಬ್ರೇಕ್ ಹಾಕದಿದ್ದಲ್ಲಿ ಶಾಸಕರು ಮುಜುಗುರಕ್ಕೆ ಒಳಗಾಗಲಿದ್ದಾರೆ ಎಂದರು.

ನೀವು ಅನುಮತಿ ನೀಡಿದರೆ ಮಾತ್ರ ಭೂಮಿಪೂಜೆ ನೆರವೇರಿಸುತ್ತೇನೆ. ಇಲ್ಲವಾದಲ್ಲಿ ಇಲ್ಲಿಂದ ನಿರ್ಗಮಿತ್ತೇನೆ, ನನ್ನ ಮಾತುಗಳ ಮೇಲೆ ವಿಶ್ವಾಸವಿಟ್ಟು ಭೂಮಿಪೂಜೆಗೆ ಅವಕಾಶ ಮಾಡಿಕೊಡುವಂತೆ ಹೋರಾಟಗಾರರ ಮನವೊಲಿಸಿದರಲ್ಲದೇ ಭೂಮಿ ಫೂಜೆ ನೆರವೇರಿಸಿ ಅಲ್ಲಿಂದ ನಿರ್ಗಮಿಸಿದರು.