ಹಾನಗಲ್ಲ ತಾಲೂಕಿನಲ್ಲಿ ರೈತರಿಗೆ ಆತಂಕ ತಂದ ಮುಂಗಾರು ಪೂರ್ವ ಮಳೆ

ಹಾನಗಲ್ಲ: ಮುಂಗಾರು ಪೂರ್ವ ಮಳೆಯಿಂದಾಗಿ ತಾಲೂಕಿನ ಶೇ. ೯೦ರಷ್ಟು ಬೇಸಿಗೆ ಪೈರಿನ ಕೊಯಿಲು ಸ್ಥಗಿತಗೊಂಡಿದ್ದು, ರೈತರು ಕೊಯಿಲು ಇಲ್ಲದೆ, ಮುಂಗಾರು ಬಿತ್ತನೆಗೆ ಭೂಮಿಯೂ ಸಿದ್ಧ ಮಾಡಿಕೊಳ್ಳಲಾಗದೆ ಆತಂಕದಲ್ಲಿದ್ದಾರೆ.

ಬೆಂಬಿಡದ ಮಳೆಯಿಂದಾಗಿ ಅಲ್ಲಿಯೇ ಗೋವಿನ ಜೋಳದ ರಾಶಿಗಳನ್ನು ಮುಚ್ಚಿದ ತಾಡಪಾಲುಗಳನ್ನು ತೆಗೆದು ಗಾಳಿಯಾಡಿಸಿ ಮತ್ತೆ ಮುಚ್ಚುತ್ತಿದ್ದಾರೆ. ಇದರಿಂದ ಬಹುಪಾಲು ಗೋವಿನ ಜೋಳ ಕೂಡ ಕಪ್ಪಾಗಿ ಮಾರುಕಟ್ಟೆಯ ಬೆಲೆಗೂ ಮಾರಕವಾಗಿದೆ. ಇದರಿಂದ ರೈತ ತೀರ ಸಂಕಷ್ಟ ಎದುರಿಸಬೇಕಾಗಿದೆ.

ಪ್ರಕೃತಿಯೊಂದಿಗೆ ಹೋರಾಟ: ಭತ್ತ ನಾಟಿಯ ಜಮೀನುಗಳು ಹೆಚ್ಚು ಕೊಯಿಲಿಗೆ ಉಳಿದಿವೆ. ಗೋವಿನ ಜೋಳ ಶೇ. ೮೦ರಷ್ಟಾಗಿದೆ. ಈ ಬಾರಿ ಮುಂಗಾರು ಪೂರ್ವ ಮಳೆ ಹೆಚ್ಚು ಕಾಲ ಹಾಗೂ ವಾಡಿಕೆಗಿಂತ ಹೆಚ್ಚು ಬಿದ್ದಿರುವುದರಿಂದ ರೈತರಿಗೆ ತೊಂದರೆಯಾಗಿದೆ. ಪ್ರಕೃತಿಯೊಂದಿಗೆ ಹೋರಾಟ ರೈತರಿಗೆ ಅನಿವಾರ್ಯ ಎನ್ನುವಂತಾಗಿದೆ ಎಂದು ಸಹಾಯಕ ಕೃಷಿ ನಿರ್ದೇಶಕ ಮಾರುತಿ ಅಂಗರಗಟ್ಟಿ ತಿಳಿಸಿದರು.