ಕಾರಾಗೃಹದಲ್ಲಿ ಶಿಕ್ಷಣ ಮುಂದುವರಿಸಲು ಕೈದಿಗಳಿಗೆ ಅವಕಾಶ

ಧಾರವಾಡ:

ಬುಧವಾರ ಇಲ್ಲಿಯ ಕೇಂದ್ರ ಕಾರಾಗೃಹಕ್ಕೆ ಭೇಟಿ ನೀಡಿದ ನಂತರ, ಸುದ್ದಿಗಾರರೊಂದಿಗೆ ಮಾತನಾಡಿ, ಸಾಕಷ್ಟು ಕೈದಿಗಳು ಶಿಕ್ಷಣದಿಂದ ವಂಚಿತರಾಗಿರುತ್ತಾರೆ. ಕೆಲವರು ಅನಕ್ಷರಸ್ಥರು, ಮತ್ತೆ ಕೆಲವರು 5ನೇ ತರಗತಿ, ಎಸ್ಸೆಸ್ಸೆಲ್ಸಿ ಅಥವಾ ಪಿಯುಸಿ ಮುಗಿಸಿರುತ್ತಾರೆ. ವರ್ಷಗಟ್ಟಲೇ ಕಾರಾಗೃಹದಲ್ಲಿ ಇರುವ ಕಾರಣದಿಂದ ಅವರಿಗೆ 1ನೇ ತರಗತಿಯಿಂದ ಪದವಿ ವರೆಗೂ ಶಿಕ್ಷಣ ನೀಡಲಾಗುವುದು. ಅದಕ್ಕಾಗಿ ರಾಷ್ಟ್ರೀಯ ಮುಕ್ತ ಶಾಲೆ ಹಾಗೂ ರಾಜ್ಯ ಮುಕ್ತ ವಿವಿ ಜತೆಗೆ ಮಾತುಕತೆ ಸಹ ನಡೆದಿದೆ. ಒತ್ತಡಕ್ಕೆ ಒಳಗಾಗಿ ಧಾರವಾಡ ಸೇರಿದಂತೆ ಹಲವು ಕಾರಾಗೃಹದಲ್ಲಿ ಆತ್ಮಹತ್ಯೆ ಸಹ ಮಾಡಿಕೊಂಡಿದ್ದಾರೆ. ಈ ನಿಟ್ಟಿನಲ್ಲಿ ಶಿಕ್ಷಣ ಹಾಗೂ ಅವರ ಕೈಗೆ ಕೆಲಸ ನೀಡುವ ಮೂಲಕ ಅವರ ಮನಸ್ಸು ಉತ್ತಮ ಮಾರ್ಗದತ್ತ ಹೊರಳಲು ಇಲಾಖೆ ಹಲವು ಕ್ರಮಗಳನ್ನು ಸಹ ತೆಗೆದುಕೊಳ್ಳುತ್ತಿದೆ ಎಂದರು.

ರಾಜ್ಯದ ಎಲ್ಲ ಕಾರಾಗೃಹಗಳಲ್ಲಿ ತೀವ್ರ ತಪಾಸಣೆ ನಂತರವೂ ಕದ್ದು ಮುಚ್ಚಿ ಮಾದಕ ದ್ರವ್ಯ ಉಪಯೋಗ, ಮೊಬೈಲ್‌ ಬಳಕೆ ಅಂತಹ ಕೃತ್ಯಗಳನ್ನು ಮಾಡಲಾಗುತ್ತಿದೆ ಎಂಬ ಮಾಹಿತಿ ಇದೆ. ಈ ಬಗ್ಗೆ ಇಲಾಖೆಯು ತೀವ್ರ ಕಠಿಣ ಕ್ರಮಕೈಗೊಳ್ಳುತ್ತಿದೆ. ಕಾರಾಗೃಹಕ್ಕೆ ಬರುವ ಕೈದಿ ಸೇರಿದಂತೆ ಪ್ರತಿಯೊಬ್ಬರನ್ನು ಭೌತಿಕ ತಪಾಸಣೆ ಜತೆಗೆ ಹೊಸ ಕೈದಿಗಳಿಗೆ ವೈದ್ಯರಿಂದ ಮಾದಕ ದ್ರವ್ಯ ತಪಾಸಣೆ ಸಹ ಮಾಡಿಸಲಾಗುತ್ತಿದೆ. ಇದರೊಂದಿಗೆ ಸಂಶಯಾಸ್ಪದ ಕೈದಿಗಳಿಗೂ ಈ ರೀತಿ ತಪಾಸಣೆ ಮಾಡಲಾಗುತ್ತಿದೆ. ಕಾರಾಗೃಹಗಳಲ್ಲಿ ಯಾವುದೇ ಗದ್ದಲ-ಗೊಂದಲ ಆಗದಂತೆ ಯುವ ಅಪರಾಧಿಗಳು, ಹೊಸ ಕೈದಿಗಳನ್ನು ಪ್ರತ್ಯೇಕ ಕೋಣೆಯಲ್ಲಿ ಇರಿಸಲಾಗುತ್ತಿದೆ ಎಂದು ಪ್ರಶ್ನೆಯೊಂದಕ್ಕೆ ಅಲೋಕಕುಮಾರ ಉತ್ತರಿಸಿದರು.

ಇನ್ನು, ಧಾರವಾಡ ಕಾರಾಗೃಹ ಭೇಟಿಯ ವೇಳೆ ಕೈದಿಗಳ ಪರಿಶೀಲನೆ ಮಾಡಿಲ್ಲ. ಇಲ್ಲಿಯ ವ್ಯವಸ್ಥೆ ಬಗ್ಗೆ ಮಾಹಿತಿ ಪಡೆದಿದ್ದೇನೆ. ನಿರಂತರವಾಗಿ ಕಾರಾಗೃಹ ಅಧಿಕಾರಿಗಳು ತಪಾಸಣೆ ಕೈಗೊಳ್ಳುವುದು, ಸ್ವಚ್ಛವಾಗಿಟ್ಟುಕೊಳ್ಳುವ ಕಾರ್ಯ ಮಾಡುತ್ತಾರೆ. ಕಾಯಂ ವೈದ್ಯರೊಬ್ಬರ ಬೇಡಿಕೆ ಹೊರತುಪಡಿಸಿ ಮತ್ತಾವ ಸಮಸ್ಯೆಗಳು ಇಲ್ಲಿ ಕಂಡು ಬಂದಿಲ್ಲ ಎಂದು ಅಲೋಕಕುಮಾರ ತಿಳಿಸಿದರು.