ವನ್ಯಜೀವಿಗಳ ರಕ್ಷಣೆ, ನಮ್ಮೆಲ್ಲರ ಸಂವಿಧಾನ ಬದ್ಧ ಕರ್ತವ್ಯ

ಧಾರವಾಡ: ಭಾರತೀಯ ಸಂವಿಧಾನ ಮೂಲಭೂತ ಕರ್ತವ್ಯಗಳ ಪರಿಚ್ಛೇದ 51(ಎ)(ಜಿ) ಅಡಿ, ನಮ್ಮ ನೈಸರ್ಗಿಕ ಪರಿಸರದ ಭಾಗವಾದ ಅರಣ್ಯ,ಕೆರೆ,ಸರೋವರ, ನದಿ ಹಾಗೂ ವನ್ಯಜೀವಿಗಳನ್ನು ಸಂರಕ್ಷಿಸಿ,ಅಭಿವೃದ್ಧಿ ಪಡಿಸುವ ಹೊಣೆ, ಪ್ರತಿಯೊಬ್ಬ ಪ್ರಜೆಗೆ ಕಡ್ಡಾಯಗೊಳಿಸಿದೆ ಎಂದು ಖ್ಯಾತ ಸಂಶೋಧಕ, ಬೆಂಗಳೂರಿನ ಹೊಳೆಮತ್ತಿ ನೇಚರ್ ಫೌಂಡೇಶನ್ ಸಂಸ್ಥಾಪಕ ಡಾ.ಸಂಜಯ ಗುಬ್ಬಿ ಹೇಳಿದರು.

1996ರ ವರೆಗೆ ಅರಣ್ಯ ಎಂಬ ಪದಕ್ಕೆ ನಿರ್ಧಿಷ್ಟ ವ್ಯಾಖ್ಯೆ ಅಥವಾ ಅರ್ಥ ಶಾಸನಬದ್ಧ ರೂಪದಲ್ಲಿ ಇರಲಿಲ್ಲ.ಗೋದಾವರ್ಮನ್ ಪ್ರಕರಣದಲ್ಲಿ, ಅರಣ್ಯದ ಅರ್ಥ ವ್ಯಾಪ್ತಿ ನಿರ್ಧರಿಸಲಾಯಿತು.1927 ರಲ್ಲಿ ಬ್ರಿಟಿಷ ಆಳ್ವಿಕೆಯ ಭಾರತದಲ್ಲಿ, ಇಂಡಿಯಾ ಫಾರೆಸ್ಟ್ ಆಕ್ಟ್ ಜಾರಿಗೆ ಬಂದಿತು. ಸ್ವಾತಂತ್ರ್ಯದ ಬಳಿಕ 1952 ರಲ್ಲಿ ಇಂಡಿಯಾ ಫಾರೆಸ್ಟ್ ಪಾಲಸಿ ಹಾಗೂ 1963 ರಲ್ಲಿ ಕರ್ನಾಟಕ ಫಾರೆಸ್ಟ್ ಆಕ್ಟ್ ಜಾರಿಗೊಳಿಸಲಾಯಿತು. ವನ್ಯಜೀವಿ ಸಂರಕ್ಷಣಾ ಕಾಯ್ದೆ 1972 ರಲ್ಲಿ ಜಾರಿಗೊಂಡ ಬಳಿಕ, ಕಾಡಿನ ಪ್ರಾಣಿ, ಅವುಗಳ ಆವಾಸಸ್ಥಾನ ಮತ್ತು ಆಹಾರ-ವಿಹಾರ ಪ್ರದೇಶಗಳ ಸಂರಕ್ಷಣೆಗೆ, ಸಾಮುದಾಯಿಕ ಸಹಭಾಗಿತ್ವದಲ್ಲಿ ಒತ್ತು ನೀಡಲಾಯಿತು ಎಂದು ಮಾಹಿತಿ ನೀಡಿದರು.

ನೇಚರ್ ರಿಸರ್ಚ್ ಸೆಂಟರ್ ಸಂಸ್ಥಾಪಕ ಕಾರ್ಯಾಧ್ಯಕ್ಷ ಪಂಚಾಕ್ಷರಿ ಹಿರೇಮಠ ಅಧ್ಯಕ್ಷತೆ ವಹಿಸಿ,ಮಾನವ ಮತ್ತು ವನ್ಯಜೀವಿಗಳ ಮಧ್ಯದ ಸಂಘರ್ಷಕ್ಕೆ ಪರ್ಯಾಯ ಪರಿಹಾರ ಕ್ರಮಗಳನ್ನು ಕಂಡುಕೊಳ್ಳಲು, ಯುವ ವಿಜ್ಞಾನಿಗಳಿಗೆ ಫೆಲೋಶಿಪ್ ಮತ್ತು ಸಂಶೋಧನಾ ಕಾರ್ಯಕ್ಕೆ ಆರ್ಥಿಕ ಸಹಾಯ ಒದಗಿಸಲು ಯೋಜಿಸಲಾಗಿದೆ. ಕ್ಷೇತ್ರ ಮಟ್ಟದ ಶ್ರೇಷ್ಠ ತಜ್ಞರ ಸಮಿತಿ ಮಾರ್ಗದರ್ಶನ ನೀಡಲಿದೆ ಎಂದರು.