ಬೆಳೆಹಾನಿ ಪರಿಹಾರ ಧನ ಬಿಡುಗಡೆಗೆ ಆಗ್ರಹಿಸಿ ಪ್ರತಿಭಟನೆ

ಶಿಗ್ಗಾಂವಿ: ತಾಲೂಕಿನಲ್ಲಿ ನಿರಂತರ ಮಳೆಯಿಂದ ಬೆಳೆಗಳು ಹಾನಿಯಾಗಿವೆ. ಗೋವಿನಜೋಳ, ಸೋಯಾಬೀನ್, ಹತ್ತಿ ಇತ್ತೀಚಿಗೆ ಎಡಬಿಡದೇ ಸುರಿದ ಮಳೆಯಿಂದ ಬಹುತೇಕ ಕಡೆ ಹಾನಿಯಾಗಿವೆ. ಬೆಳೆ ಹಾನಿ ಹಾಗೂ ಬೆಳೆ ವಿಮೆ ನೀಡಬೇಕು ಎಂದು ಆಗ್ರಹಿಸಿ ರೈತರು ಪ್ರತಿಭಟನೆ ನಡೆಸಿ ಹಾವೇರಿ ಜಿಲ್ಲಾಧಿಕಾರಿಗೆ ತಹಸೀಲ್ದಾರ್‌ ಮೂಲಕ ಮನವಿ ಸಲ್ಲಿಸಿದರು.ಪ್ರಾರಂಭ ಹಂತದಲ್ಲಿ ಮಳೆ ಪ್ರಾರಂಭವಾಗಿ ಬಿತ್ತಿದ ಬೀಜಗಳು ಮಳೆ ಹೋಗಿ ಮೊಳಕೆ ಒಡೆಯದೇ ಹಾಳಾಗಿದ್ದು, ಮರು ಬಿತ್ತನೆ ಮಾಡಿದ ಉದಾಹರಣೆ ತಾಲೂಕಿನಲ್ಲಿ ಹಲವು ಕಡೆ ಆಗಿದೆ. ಬಿತ್ತನೆ ಮಾಡಿದ ರೈತರು ಕಳೆಯನ್ನು ತೆಗೆಸಲಿಕ್ಕೆ ಹೋದರೆ ಎಡೆಬಿಡದೇ ಮಳೆ ಪ್ರಾರಂಭವಾಗಿ ಎಡೆ ಕುಂಟೆ ಹೊಡೆಯಲು ಆಗದೇ ರೈತ ಹೈರಾಣಾಗಿದ್ದಾನೆ. ಬೆಳೆಗಳಿಗಿಂತ ಕಸವೇ ಹೆಚ್ಚಾಗಿದ್ದು ಬೆಳೆಯುವ ಹಂತದಲ್ಲಿ ಪೈರು ಕ್ಷೀಣಗೊಂಡಿದ್ದು ಇಳುವರಿ ಸಹಿತ ಬರುವ ಲೆಕ್ಕಕ್ಕೆ ಬೆಳೆಗಳು ಕಾಣದಂತಾಗಿದೆ.