ರಾಮ ಮಂದಿರ ಲೋಕಾರ್ಪಣೆ, ಗೋಕರ್ಣದಲ್ಲಿ ಸಂಭ್ರಮ

ಗೋಕರ್ಣ: ಶ್ರೀರಾಮ ಜನ್ಮಭೂಮಿಯಲ್ಲಿ ಶ್ರೀರಾಮ ಮಂದಿರ ಲೋಕಾರ್ಪಣೆಯ ದಿನವಾದ ಇಂದು ಪುಣ್ಯ ಕ್ಷೇತ್ರದಲ್ಲಿ ಅಹೋರಾತ್ರಿ ಕಾರ್ಯಕ್ರಮ ಏರ್ಪಡಿಸಲಾಗಿದೆ.

ಇನ್ನೂ ಉಪಾಧಿವಂತ ಮಂಡಳ, ಸಾಂಸ್ಕೃತಿಕ ಪ್ರತಿಷ್ಠಾನ, ಶ್ರೀಕೃಷ್ಣ ವೇದ ಪ್ರತಿಷ್ಠಾನದಿಂದ ಒಟ್ಟೂ ಹದಿನೈದು ದೇವಾಲಯಗಳಲ್ಲಿ ವಿಶೇಷ ಪೂಜೆ ಆಯೋಜಿಸಿದೆ. ಮಹಾಬಲೇಶ್ವರ ಮಂದಿರದಲ್ಲಿ ಈಗಾಗಲೇ ಶಿವಪದ ವೇದಿಕೆಯಲ್ಲಿ ಭವ್ಯ ರಾಮನ ಭಾವಚಿತ್ರಕ್ಕೆ ಆಕರ್ಷಕ ಅಲಂಕರ ಮಾಡಲಾಗಿದೆ. ಎಲ್ಲೆಡೆ ಕೇಸರಿ ಪತಾಕಿ ಹಾಕಿದ್ದು, ಎಲ್ಲರನ್ನು ಆಕರ್ಷಿಸುತ್ತಿದೆ. ಸಂಜೆ ದೀಪೋತ್ಸವ, ಭಕ್ತರಿಗೆ ಸಿಹಿ ವಿತರಣೆ ನಡೆಯಲಿದೆ. ಎಲ್‌ಇಡಿ ಪರದೆ ಅಳವಡಿಸಿ ಕಾರ್ಯಕ್ರಮದ ನೇರ ಪ್ರಸಾರ ವೀಕ್ಷಿಸಲು ಅವಕಾಶ ಕಲ್ಪಿಸಲಾಗಿದೆ.ಇದರಂತೆ ಮೇಲಿನಕೇರಿ ಮಾರುತಿ ದೇವಸ್ಥಾನದಲ್ಲಿ ಪವಮಾನ ಶಾಂತಿ ಹಾಗೂ ವಿಶೇಷ ಪೂಜೆ, ಭದ್ರಕಾಳಿ ದೇವಸ್ಥಾನ ಚಂಡಿ ಹೋಮ ಹಾಗೂ ವಿಶೇಷ ಪೂಜೆ, ಶ್ರೀ ರಘೂತ್ತಮ ಮಠದಲ್ಲಿ ರಾಮ ತಾರಕ ಹವನ ಯಜ್ಞ, ಕೋಟಿತೀರ್ಥದ ಕೋಟೇಶ್ವರ ರುದ್ರಾಭಿಷೇಕ, ತೀರ್ಥ ಗಣಪತಿಯಲ್ಲಿ ವಿಶೇಷ ಪೂಜೆ, ಬಟ್ಟೆ ಗಣಪತಿ ದೇವಸ್ಥಾನದಲ್ಲಿ ಸಹಸ್ರಾಧಿಕ ಸಂಖ್ಯೆಯಲ್ಲಿ ಅಥರ್ವಶೀರ್ಷ ಹವನ ಹಾಗೂ ವಿಶೇಷ ಪೂಜೆ, ವರದೇಶ್ವರ ಮಂದಿರದಲ್ಲಿ ಕ್ಷೀರಾಭಿಷೇಕ ಹಾಗೂ ವಿಶೇಷ ಪೂಜೆ, ಕೃಷ್ಣಾಪುರದಲ್ಲಿ ವಿಷ್ಣು ಸಹಸ್ರನಾಮ ಹಾಗೂ ತುಳಸಿ ಅರ್ಚನೆ, ನರಸಿಂಹ ದೇವಸ್ಥಾನ ಮತ್ತು ಕಾಲ ಭೈರವ ದೇವಸ್ಥಾನದಲ್ಲಿ ವಿಶೇಷ ಪೂಜೆ, ಹನುಮಂತೇಶ್ವರ ಏಕಾದಶ ರುದ್ರ, ಸುಡುಗಾಡು ಸುಬ್ರಹ್ಮಣ್ಯ ಮಂದಿರದಲ್ಲಿ ಫಲ ಪಂಚಾಮೃತ ಅಭಿಷೇಕ, ಶ್ರೀ ಮಹಾಗಣಪತಿ ದೇವಸ್ಥಾನ ಮಂದಿರದಲ್ಲಿ ಗಣಹವನ ಶ್ರೀ ರಾಮ ದೇವರಿಗೆ ವಿಶೇಷ ಪೂಜೆ, ಬಲಮುರಿ ಗಣಪತಿ ಮಂದಿರದಲ್ಲಿ ಸಕ್ಕರೆ ಕಣಜ, ಪಿತೃಸ್ಥಾಲೀಶ್ವರ ದೇವರಲ್ಲಿ ವಿಶೇಷ ಪೂಜೆ ಹಾಗೂ ಕಮಲ ಪುಷ್ಪಾರ್ಚನೆ, ಹನುಮ ಜನ್ಮಭೂಮಿಯಲ್ಲಿ ಸುಂದರ ಕಾಂಡ ಪಾರಾಯಣ ನಡೆಯಲಿದೆ.ಶೃಂಗಾರಗೊಂಡಿದೆ ಪುಣ್ಯ ಕ್ಷೇತ್ರ:ಮೇಲಿನಕೇರಿ ಮಾರುತಿ ಕಟ್ಟೆಯಿಂದ ಮುಖ್ಯಕಡಲತೀರದ ರಾಮ ಮಂದಿರದ ವರೆಗೆ ಕೇಸರಿ ಪತಾಕಿ, ವಿದ್ಯುತ್ ದೀಪಾಲಂಕರ ಮಾಡಲಾಗಿದ್ದು, ಪುಣ್ಯಕ್ಷೇತ್ರ ಸಂಪೂರ್ಣ ಕೇಸರಿಮಯವಾಗಿ ಎಲ್ಲೆಡೆ ಭಕ್ತಿ ಭಾವದ ಸೆಲೆ ಎದ್ದು ಕಾಣುತ್ತಿದೆ. ಇದರಂತೆ ಕೋಟಿತೀರ್ಥಕ್ಕೆ ಸಾಗುವ ಮಾರ್ಗ ಹಾಗೂ ಕೋಟಿತೀರ್ಥ ಕಟ್ಟೆಯನ್ನು ವಿದ್ಯುತ್ ದೀಪಾಲಂಕಾರ ಮಾಡಲಾಗಿದೆ. ಎಲ್ಲ ಮಂದಿರಗಳನ್ನು ವಿಶೇಷವಾಗಿ ಶೃಂಗರಿಸಲಾಗಿದ್ದು, ಪರಶಿವನ ಆತ್ಮಲಿಂಗವಿರುವ ಸ್ಥಳ ವಿಶೇಷವಾಗಿ ಆಕರ್ಷಿಸುತ್ತಿದೆ. ಬಹುತೇಕ ಎಲ್ಲ ವಾಹನದಲ್ಲಿ ಜೈ ಶ್ರೀರಾಮ ಎಂದು ಬರೆದ ಕೇಸರಿ ಪತಾಕೆ ರಾರಾಜಿಸುತ್ತಿದೆ.