ರಾಮಾನುಜಾಚಾರ್ಯರ 1007ನೇ ತಿರುನಕ್ಷತ್ರ ಮಹೋತ್ಸವ

ಕನ್ನಡಪ್ರಭ ವಾರ್ತೆ ಮೇಲುಕೋಟೆ

ತತ್ಸಂಬಂಧದ ಧಾರ್ಮಿಕ ಕಾರ್ಯಕ್ರಮಗಳು ಮೇ 3ರ ಇಂದಿನಿಂದ ಆರಂಭವಾಗಿ ಮೇ 12 ರ ದಶಾವತಾರ ಮಹಾಶಾತ್ತು ಮೊರೈಯೊಂದಿಗೆ ಸಂಪನ್ನಗೊಳ್ಳಲಿದೆ. ತಿರುನಕ್ಷತ್ರ ಮಹೋತ್ಸವದ ಅಂಗವಾಗಿ ಆಚಾರ್ಯ ರಾಮಾನುಜರಿಗೆ ವಿವಿಧ ವಾಹನೋತ್ಸವಗಳು, ಅಭಿಷೇಕ, ಪಲ್ಲಕ್ಕಿ ಉತ್ಸವಗಳು, ವಿಶೇಷ ಅಲಂಕಾರಗಳು, ನೈವೇಧ್ಯ ಸಮರ್ಪಣೆ, ನೇಮಿಸೇವೆಗಳು, ಮುಡಿಉತ್ಸವ, ಸ್ಥಾನಿಕರ ಭಿಕ್ಷಾ ಕೈಂಕರ್ಯ, ರಥೋತ್ಸವ ನೆರವೇರಲಿದೆ.

ತಿರುನಕ್ಷತ್ರ ಮಹೋತ್ಸವದ ಅಂಗವಾಗಿ ಮೇ 3 ರಿಂದ 12 ರವರೆಗೆ ಪ್ರತಿದಿನ ಬೆಳಿಗ್ಗೆ 8ಕ್ಕೆ ವಿವಿಧ ವಾಹನೋತ್ಸವ ನೆರವೇರಲಿದೆ. ರಾಮಾನುಜರಿಗೆ ಕ್ರಮವಾಗಿ ಮಂಟಪವಾಹನ, ಹಂಸವಾಹನ, ಅಶ್ವವಾಹನ, ಗಜವಾಹನ, ಚಂದ್ರಮಂಡಲವಾಹನ, ಸೂರ್ಯ ಮಂಡಲವಾಹನ ನೆರವೇರಲಿದೆ.

ಪ್ರಮುಖ ದಿನವಾದ ಮೇ 12 ರ ರಾಮಾನುಜರ ಜಯಂತ್ಯುತ್ಸವದಂದು ಬೆಳಿಗ್ಗೆ 7 ಗಂಟೆಗೆ ಮಂಟಪ ವಾಹನೋತ್ಸವ, 8 ಗಂಟೆಗೆ ಕಲ್ಯಾಣಿಯಿಂದ ಅಭಿಷೇಕ ತೀರ್ಥಮೆರವಣಿಗೆ, 10ಗಂಟೆಗೆ ದ್ವಾದಶಾರಾಧನೆಯೊಂದಿಗೆ ಅಭಿಷೇಕ ಮಹಾಶಾತ್ತುಮೊರೈ, ಸಂಜೆ ರಾಮಾನುಜರಿಗೆ ಶ್ರೀಗಂಧದ ಅಲಂಕಾರದಲ್ಲಿ ಬೆಳ್ಳಿಯ ಪಲ್ಲಕ್ಕಿಯಲ್ಲಿ ಉತ್ಸವ, ರಾತ್ರಿ 10ಗಂಟೆಗೆ ಚೆಲುವನಾರಾಯಣಸ್ವಾಮಿಗೆ ದಶಾವತಾರ ಉತ್ಸವ ನಡೆಯಲಿದೆ.

ರಾಮಾನುಜರು ಮೇಲುಕೋಟೆಯಲ್ಲಿ ನೆಲೆಸಿದ್ದ ವೇಳೆ ತಮ್ಮ ನಾಲ್ಕುಮಂದಿ ಆಪ್ತ ಶಿಷ್ಯರಾದ ಸ್ಥಾನಿಕರಿಂದ ಮಾತ್ರ ಸರದಿಯಂತೆ ಭಿಕ್ಷೆ ಸ್ವೀಕರಿಸುತ್ತಿದ್ದರು. ಈ ಐತಿಹಾಸಿಕ ವಿಶೇಷದ ಪ್ರತೀಕವಾಗಿ ಸ್ಥಾನಿಕರ ಗುರುಪೀಠಗಳು ತಿರುನಕ್ಷತ್ರದ ವೇಳೆ ಇಂದಿಗೂ ಭಿಕ್ಷಾಕೈಂಕರ್ಯ ಸಮರ್ಪಿಸುತ್ತಿವೆ.