ಹೇಮಾವತಿ ನದಿಗೆ ಹೆಚ್ಚಿನ ನೀರು ಬಿಡುಗಡೆ: ಮಂದಗೆರೆ ಪಾತ್ರದ ಜಮೀನುಗಳಿಗೆ ಜಲಕಂಟಕ

ಕನ್ನಡಪ್ರಭ ವಾರ್ತೆ ಕಿಕ್ಕೇರಿ

ಹೇಮಾವತಿ ನದಿಗೆ ಹೆಚ್ಚಿನ ಹೊರಹರಿವು ಇರುವುದರಿಂದ ನದಿ ಪಾತ್ರದ ಜಮೀನುಗಳಿಗೆ ಅಪಾರ ಪ್ರಮಾಣದಲ್ಲಿ ನೀರು ನುಗ್ಗಿ ನೂರಾರು ಎಕರೆಯಲ್ಲಿ ಬೆಳೆದಿದ್ದ ಬೆಳೆಗಳು ಹಾನಿಯಾಗಿ ರೈತರಿಗೆ ಅಪಾರ ನಷ್ಟವಾಗಿದೆ.

ಚಿಕ್ಕಮಂದಗೆರೆಯ ಮಂಜುನಾಥ್‌ ಅವರ ತೋಟಕ್ಕೆ ನೀರು ನುಗ್ಗಿರುವುದಲ್ಲದೆ ಇವರ ಮನೆಯ ಕೊಟ್ಟಿಗೆ ಅರ್ಧ ಭಾಗ ಮುಳುಗಡೆಯಾಗಿದೆ. ರಾತ್ರಿಯಾದ ಕಾರಣ ರೈತ ಮಂಜುನಾಥ್‌ ಅವರ ಜಾನುವಾರುಗಳನ್ನು ಸುರಕ್ಷಿತ ಸ್ಥಳಕ್ಕೆ ರವಾನಿಸಲು ಪರದಾಡಿದ್ದಾರೆ.

ಹಳೆಮಾದಾಪುರದ ರಾಮಲಿಂಗೇಶ್ವರ ದೇವಸ್ಥಾನದ ಮೆಟ್ಟಲಿನ ಪಾದದವರಿಗೆ ಹೇಮೆ ನೀರು ಆವರಿಸಿದೆ. ಪವಿತ್ರ ಗೋವಿನಕಲ್ಲು ಸಂಪೂರ್ಣ ಮುಳುಗಡೆಯಾಗಿದೆ. ಮಾದಾಪುರದ ಸನ್ಯಾಸಿ ಮಂಟಪ ಮುಳುಗಿದ್ದು, ನದಿಪಾತ್ರದ ರೈತರು ಜಮೀನುಗಳಿಗೆ ತೆರಳಲು ಪರದಾಡಿದರು.

ದಬ್ಬೇಘಟ್ಟ ಎಲ್ಲೆಯ ಬೋಜೇಗೌಡರ ಅಡಿಕೆ ತೋಟಕ್ಕೆ ನೀರು ನುಗ್ಗಿ ಅಡಿಕೆ ಸಸಿಗಳಿಗೆ ಹಾನಿಯಾಗಿವೆ. ಚಿಕ್ಕಮಂದಗೆರೆಯ ರೈತ ಗುಂಡ, ಪಟೇಲರ ಶಿವಣ್ಣ, ಕುಮಾರ್, ಮಂಜು, ಮೊಗಣ್ಣಗೌಡ, ಮಂಜೇಗೌಡ, ಹೊನ್ನೇಗೌಡ, ರಾಮಚಂದ್ರ, ಬಸವೇಗೌಡ, ಬೋರೇಗೌಡ, ಮಹದೇವಯ್ಯನ ಮಂಜು, ಚಂದ್ರಶೇಖರ್, ಧರಣಿ, ಕೆಂಪೇಗೌಡ, ನಂಜೇಗೌಡ ಅವರ ಕಬ್ಬು, ತೆಂಗು, ಅಡಿಕೆ ತೋಟಗಳಿಗೆ ಅಪಾರ ಪ್ರಮಾಣದಲ್ಲಿ ನೀರು ನುಗ್ಗಿದೆ.

ಮಂದಗೆರೆ ಬಳಿಯ ಕುರಾವು(ದ್ವೀಪ) ಸುತ್ತ ಹೇಮೆ ಸುತ್ತುವರಿದಿದೆ. ಈ ಸ್ಥಳದಲ್ಲಿ ವಾಸವಾಗಿದ್ದ ನಾಲ್ಕೈದು ಕುಟುಂಬಗಳು ಹೇಮಾವತಿ ನದಿ ನೀರು ಹೆಚ್ಚುವ ಕಾರಣ ಮುಂಜಾಗ್ರತೆಯಾಗಿ ನದಿ ಗಡ್ಡೆ ಪ್ರದೇಶದಿಂದ ಹೊರಗಡೆ ಸುರಕ್ಷಿತ ಪ್ರದೇಶಕ್ಕೆ ತೆರಳಿದ್ದಾರೆ.