ಕನ್ನಡ ನಾಡು-ನುಡಿ ಸೇವೆಗಾಗಿ ಬಣಗಳ ಪೈಪೋಟಿ!

ಧಾರವಾಡ: ಸಮಾಜ ಸೇವೆ ಮಾಡಲು ರಾಜಕಾರಣಿಗಳು ಚುನಾವಣೆಗೆ ಹೇಗೆ ಪೈಪೋಟಿ ನಡೆಸುತ್ತಾರೆಯೋ ಅದೇ ಮಾದರಿಯಲ್ಲಿ ಧಾರವಾಡದ ಐತಿಹಾಸಿಕ ಕರ್ನಾಟಕ ವಿದ್ಯಾವರ್ಧಕ ಸಂಘದ ಮೂಲಕವೇ ಕನ್ನಡದ ಸೇವೆಗೆ ಅಣಿಯಾಗಲು ಇದೀಗ ದೊಡ್ಡ ದೊಡ್ಡ ಪಡೆಗಳು ಸಂಘದ ಸದಸ್ಯರುಗಳ ಎದುರು ಪರೇಡ್‌ ನಡೆಸುತ್ತಿವೆ.

ಮಾಜಿ ಶಾಸಕ, ಸಂಘದ ಹಾಲಿ ಅಧ್ಯಕ್ಷ ಚಂದ್ರಕಾಂತ ಬೆಲ್ಲದ, ಹಾಲಿ ಪ್ರಧಾನ ಕಾರ್ಯದರ್ಶಿ ಶಂಕರ ಹಲಗತ್ತಿ ನೇತೃತ್ವದ ಒಂದು ತಂಡ, ಹಿರಿಯ ರಾಜಕಾರಣಿ, ಅಧ್ಯಕ್ಷ ಸ್ಥಾನದ ಆಕಾಂಕ್ಷಿ ಮೋಹನ ಲಿಂಬಿಕಾಯಿ, ಪ್ರಧಾನ ಕಾರ್ಯದರ್ಶಿ ಆಕಾಂಕ್ಷಿ, ಮಾಜಿ ಪ್ರಧಾನ ಕಾರ್ಯದರ್ಶಿ ಪ್ರಕಾಶ ಉಡಿಕೇರಿ ನೇತೃತ್ವದಲ್ಲಿ ಮತ್ತೊಂದು ತಂಡ ಚುನಾವಣೆಗೆ ಏನೆಲ್ಲಾ ಸಿದ್ಧತೆ ನಡೆಸಬೇಕೋ ಅದೆಲ್ಲಾ ಸಿದ್ಧತೆಗಳನ್ನು ಕೈಗೊಂಡಿದ್ದು, ಸಂಘದ ಮತದಾರರ ಮನವೊಲಿಸಲು ಭಗೀರಥ ಪ್ರಯತ್ನ ನಡೆಸುತ್ತಿದ್ದಾರೆ.

9ರಿಂದ ಚುನಾವಣಾ ಕಾರ್ಯ: ಇದೇ ಮೇ 25ರಂದು ಚುನಾವಣೆ ನಡೆಯಲಿದ್ದು, ಚುನಾವಣಾಧಿಕಾರಿಯಾಗಿ ಸಿ.ಎಸ್. ನೇಗಿನಹಾಳ ಅವರನ್ನು ನೇಮಿಸಲಾಗಿದೆ. ಮೇ 9ರಿಂದ ಅಧಿಕೃತವಾಗಿ ಚುನಾವಣಾ ಕಾರ್ಯಗಳು ಶುರುವಾಗಲಿವೆ.

ಮೇ 9 ರಿಂದ ನಾಮಪತ್ರ ಸಲ್ಲಿಕೆ ಪ್ರಾರಂಭವಾಗಲಿದ್ದು, ಮೇ 13 ನಾಮಪತ್ರ ಸಲ್ಲಿಕೆಗೆ ಕೊನೆಯ ದಿನ. ಮೇ 14 ಸಂಜೆ 4.30 ರಿಂದ 7ರ ವರೆಗೆ ನಾಮಪತ್ರ ಪರಿಶೀಲನೆ ಕಾರ್ಯ ನಡೆಯಲಿದ್ದು, ಮೇ 16 ರಂದು ನಾಮಪತ್ರ ಹಿಂಪಡೆಯಲು ಕೊನೆ ದಿನವಾಗಿದೆ. ಮೇ 17 ರ ಬೆಳಗ್ಗೆ 10ಕ್ಕೆ ಅಂತಿಮವಾಗಿ ಕಣದಲ್ಲಿದ್ದವರ ಪಟ್ಟಿ ಪ್ರಕಟವಾಗಲಿದ್ದು ಮೇ 25 ಮುಂಜಾನೆ 7 ರಿಂದ ಸಂಜೆ 5ರ ವರೆಗೆ ಚುನಾವಣೆ ಸಂಘದ ಕಟ್ಟಡಗಳಲ್ಲಿ ನಡೆಯಲಿದೆ. ಮೇ 26 ಬೆಳಗ್ಗೆ 9 ರಿಂದ ಮತ ಎಣಿಕೆ ಕಾರ್ಯ ಸಂಘದ ಸಭಾಭವನಗಳಲ್ಲಿಯೇ ನಡೆಯಲಿದ್ದು, ಮತಗಳ ಎಣಿಕೆ ಪೂರ್ಣಗೊಳ್ಳುತ್ತಿದ್ದಂತೆ ಫಲಿತಾಂಶಗಳನ್ನು ಪ್ರಕಟಿಸಲಾಗುವುದು.