ಮಾಗಳ ಹೂವಿನಹಡಗಲಿ ರಸ್ತೆ ಒತ್ತುವರಿಗೆ ಆಕ್ರೋಶ

ಹೂವಿನಹಡಗಲಿ: ತಾಲೂಕಿನ ಮಾಗಳ-ಶಿವಪುರ-ಹೂವಿನಹಡಗಲಿಗೆ ಸಂಪರ್ಕ ಕಲ್ಪಿಸುವ ಜಿಪಂ ಮುಖ್ಯ ರಸ್ತೆ ಒತ್ತುವರಿಯಾಗಿದೆ. ಈ ಬಗ್ಗೆ ಸಂಬಂಧಿಸಿ ಅಧಿಕಾರಿಗಳು ಗಮನಹರಿಸದಿರುವುದು ಆಕ್ರೋಶಕ್ಕೆ ಕಾರಣವಾಗಿದೆ.

ಮಾಗಳದಿಂದ ತಾಲೂಕು ಕೇಂದ್ರ ಹೂವಿನಹಡಗಲಿಗೆ ಸಂಪರ್ಕ ಕಲ್ಪಿಸುವ ಶಿವಪುರ ಮಾರ್ಗದ ನೇರ ರಸ್ತೆ 80 ಅಡಿ ಇದೆ. ರಸ್ತೆ ಅಭಿವೃದ್ಧಿಗೆ ಮೀಸಲಿರಿಸಿದ ಜಮೀನುಗಳನ್ನು ಸಹ ರೈತರು ಸಂಪೂರ್ಣ ಒತ್ತುವರಿ ಮಾಡಿದ್ದಾರೆ.

ಕಂದಾಯ ಇಲಾಖೆ ಈಗಾಗಲೇ ಸರ್ಕಾರಿ ಜಮೀನು, ರಸ್ತೆ, ಸ್ಮಶಾನ, ಹಳ್ಳ, ನದಿ ಸೇರಿದಂತೆ ಎಲ್ಲ ಸರ್ಕಾರದ ಆಸ್ತಿ ಒತ್ತುವರಿ ತೆರವಿಗೆ ಈಗಾಗಲೇ ಲ್ಯಾಂಡ್‌ ಬೀಟ್‌ ಆ್ಯಪ್‌ ಮಾಡಿದ್ದಾರೆ. ಇದರಿಂದ ಎಲ್ಲ ಕಡೆಗೂ ಸರ್ವೇ ನಡೆಯುತ್ತಿದೆ. ಈ ಮೂಲಕ ಮಾಗಳ-ಶಿವಪುರ ರಸ್ತೆಯನ್ನು ಸರ್ವೇ ಮಾಡಿದರೆ ರಸ್ತೆ ಒತ್ತುವರಿಯಾಗಿರುವುದು ದೃಢವಾಗಲಿದೆ. ಈ ನಿಟ್ಟಿನಲ್ಲಿ ಸಂಬಂಧಪಟ್ಟ ಅಧಿಕಾರಿಗಳು ದಿಟ್ಟ ನಿರ್ಧಾರ ಕೈಗೊಂಡು, ಒತ್ತುವರಿಯಾಗಿರುವ ರಸ್ತೆಯನ್ನು ತೆರವು ಮಾಡಿ ಸುಗಮ ಸಂಚಾರಕ್ಕೆ ಅವಕಾಶ ಮಾಡಬೇಕೆಂದು ಸಾರ್ವಜನಿಕರು ಒತ್ತಾಯಿಸುತ್ತಿದ್ದಾರೆ.

ಮರ ಕಡಿದರೆ ಶಿಸ್ತು ಕ್ರಮ: ರಸ್ತೆಯ ಇಕ್ಕೆಲದಲ್ಲಿ ಸಾಮಾಜಿಕ ಅರಣ್ಯ ಇಲಾಖೆ ಗಿಡ-ಮರ ಬೆಳೆಸಿದ್ದಾರೆ. ಅವುಗಳನ್ನು ರೈತರು ಒತ್ತುವರಿ ನೆಪದಲ್ಲಿ ಕಡಿದು ಹಾಕುವಂತಿಲ್ಲ. ರಸ್ತೆ ಬದಿಯಲ್ಲೇ ಮರಗಳು ಇದ್ದರೇ ಅಲ್ಲಿ ಜಮೀನು ಹೊಂದಿರುವ ರೈತರ ಹೆಸರಿನಲ್ಲಿ ಅರಣ್ಯ ಇಲಾಖೆ ಮೂಲಕ ಮರಗಳ ಪಟ್ಟ ನೀಡಲಾಗುತ್ತಿದೆ. ರಸ್ತೆ ಅಗಲೀಕರಣ ಬಂದಾಗ ಮರವನ್ನು ತೆರವು ಮಾಡಬೇಕಾದ ಸಂದರ್ಭ ಬಂದರೆ ಆ ಮರಗಳ ಮೌಲ್ಯ ಹೊಂದಿರುವಷ್ಟು ಹ‍ಣವನ್ನು ರೈತರೇ ಪಡೆದುಕೊಳ್ಳಬಹುದು. ಯಾವುದೇ ರೈತರು ಮರಗಳನ್ನು ಕಡಿದು ಹಾಕಿದರೆ, ಅಂತಹವರ ವಿರುದ್ಧ ಶಿಸ್ತು ಕ್ರಮ ಕೈಗೊಳ್ಳುತ್ತೇವೆ ಎನ್ನುತ್ತಾರೆ ಹೂವಿನಹಡಗಲಿ ವಲಯ ಅರಣ್ಯಾಧಿಕಾರಿ ರೇಣುಕಾ.