ಮೆಚ್ಚುಗೆಗೆ ಪಾತ್ರರಾದ ಸ್ಕೌಟ್ಸ್ ಗೈಡ್ಸ್ ವಿದ್ಯಾರ್ಥಿಗಳು

ಕನ್ನಡಪ್ರಭ ವಾರ್ತೆ ಹಾಸನ

ರಾಜ್ಯ ಮುಖ್ಯ ಆಯುಕ್ತರಾದ ಪಿ.ಜಿ.ಆರ್. ಸಿಂಧ್ಯಾ ಅವರ ನಿರ್ದೇಶನದಂತೆ, ರಾಜ್ಯ ಸಹ ಕಾರ್ಯದರ್ಶಿ ಎಲ್.ಟಿ. ಲೋಕೇಶ್ ಅವರ ಮಾರ್ಗದರ್ಶನದಲ್ಲಿ ಹಾಗೂ ಜಿಲ್ಲಾ ಕಾರ್ಯದರ್ಶಿ ಪ್ರಿಯಾಂಕ, ಸಂಘಟಕ ಆರ್.ಜಿ. ಗಿರೀಶ್ ಹಾಗೂ ಇತರ ಜಿಲ್ಲಾ ಸ್ಕೌಟ್ಸ್ ಅಂಡ್ ಗೈಡ್ಸ್ ನಾಯಕರ ಸಹಕಾರದೊಂದಿಗೆ ಈ ರಾಜ್ಯ ಮಟ್ಟದ ಸೇವಾ ಶಿಬಿರ ಯಶಸ್ವಿಯಾಗಿ ನಡೆಯುತ್ತಿದೆ. ಈ ಶಿಬಿರದಡಿಯಲ್ಲಿ ಎರಡು ಪಾಳಿಗಳಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ವಿದ್ಯಾರ್ಥಿಗಳು ದೇವಾಲಯದ ಸುತ್ತಮುತ್ತ ಭಕ್ತರಿಗೆ ಅತ್ಯವಶ್ಯಕ ಸೇವೆಗಳನ್ನು ಸಲ್ಲಿಸುತ್ತಿದ್ದಾರೆ. ಭಕ್ತರು ಸರತಿ ಸಾಲಿನಲ್ಲಿ ಸಾಗುವಾಗ ಅವರಿಗೆ ಕುಡಿಯುವ ನೀರು ವಿತರಿಸುವುದು, ವಿಶೇಷ ಚೇತನರು ಹಾಗೂ ವಯೋವೃದ್ಧರನ್ನು ಗಾಲಿ ಕುರ್ಚಿಗಳಲ್ಲಿ ಕೂರಿಸಿ ದೇವಿಯ ದರ್ಶನ ಮಾಡಿಸುವುದು, ಸಾಲಿನಲ್ಲಿ ಕಾಯುವ ಭಕ್ತರನ್ನು ಸಮಾಧಾನಪಡಿಸುವುದು, ಪ್ರಸಾದ ಕೌಂಟರ್‌ನಲ್ಲಿ ಪ್ರಸಾದ ವಿತರಿಸುವುದು, ಆಹಾರ ಪೋಲಾಗದಂತೆ ನಿಯಂತ್ರಿಸುವುದು ಮುಂತಾದ ಕೆಲಸಗಳಲ್ಲಿ ಅವರು ಅಪಾರ ಉತ್ಸಾಹದಿಂದ ತೊಡಗಿದ್ದಾರೆ.