ಸರ್ಕಾರದಿಂದ ನಾಚಿಕೆಗೇಡಿನ ಕಾರ್ಯ: ಕೋಟ ಶ್ರೀನಿವಾಸ ಪೂಜಾರಿ

ಕುಮಟಾ: ಕೆಲವೇ ದಿನಗಳಲ್ಲಿ ಬರುವ ಲೋಕಸಭಾ ಚುನಾವಣೆಗೆ ಸಕಲ ಸಿದ್ಧತೆ ನಡೆಯುತ್ತಿದೆ. ಈ ಚುನಾವಣೆಯಲ್ಲಿ ಹೋರಾಟ ನಡೆಯುತ್ತಿರುವುದು ಕೇವಲ ಬಿಜೆಪಿ ಮತ್ತು ಕಾಂಗ್ರೆಸ್ ಗಳ ನಡುವೆ ಅಲ್ಲ. ಈ ಚುನಾವಣೆ ರಾಮ ಭಕ್ತರು ಮತ್ತು ಟಿಪ್ಪು ಭಕ್ತರ ನಡುವೆ ನಡೆಯುವ ಹೋರಾಟ. ಅದಲ್ಲದಿದ್ದರೆ ಎಲ್ಲ ಪರವಾನಗಿ ಪಡೆದು, ಅಧಿಕೃತವಾಗಿ ಭಗವಾಧ್ವಜ ಹಾರಿಸಿದರೆ ಪೊಲೀಸರ ಮೂಲಕ ಅದನ್ನು ತೆಗೆಸುವ ಕಾರ್ಯ ಮಾಡಿದ ಸರ್ಕಾರ ನಾಚಿಕೆಗೇಡಿನದ್ದು ಎಂದು ವಿಧಾನ ಪರಿಷತ್ ವಿರೋಧ ಪಕ್ಷದ ನಾಯಕ ಕೋಟಾ ಶ್ರೀನಿವಾಸ ಪೂಜಾರಿ ಹೇಳಿದರು.

ಲೋಕಸಭಾ ಚುನಾವಣೆ ಹನುಮನ ಭಕ್ತರಿಗೂ, ಟಿಪ್ಪು ಭಕ್ತರಿಗೂ ನಡೆಯುವ ಹೋರಾಟ:

ಕುಮಟಾದಲ್ಲಿ ಸೋಮವಾರ ನಡೆದ ನೂತನ ಜಿಲ್ಲಾಧ್ಯಕ್ಷರ ಪದಗ್ರಹಣ ಕಾರ್ಯಕ್ರಮದಲ್ಲಿ ಮಾತನಾಡಿ, ಮಂಡ್ಯ ಜಿಲ್ಲೆಯ ಕೆರಗೋಡು ಗ್ರಾಮದಲ್ಲಿ ಅನುಮತಿ ಪಡೆದು ಭಗವಾಧ್ವಜ ಹಾರಿಸಲಾಗಿತ್ತು. ಸಾರ್ವಜನಿಕರಿಂದ ದೇಣಿಗೆ ಸಂಗ್ರಹಿಸಿ ನಿರ್ಮಿಸಿದ ಕಟ್ಟೆಯ ಮೇಲೆ ಧ್ವಜ ಹಾರಿಸಿದ್ದನ್ನು ಪೊಲೀಸರು, ಜಿಲ್ಲಾಧಿಕಾರಿ ಒತ್ತಾಯಪೂರ್ವಕವಾಗಿ ಕೆಳಗಿಳಿಸಿದ್ದಾರೆ. ಪೊಲೀಸರನ್ನು ಬಳಸಿಕೊಂಡು ಧ್ವಜ ಕೆಳಗಿಳಿಸಿ ರಾಜ್ಯ ಸರ್ಕಾರ ಭಗವಾಧ್ವಜಕ್ಕೆ ಅಪಮಾನ ಮಾಡಿದೆ. ಇದಕ್ಕಿಂತ ನಾಚಿಕೆಗೆಟ್ಟ ವ್ಯವಸ್ಥೆಗಳಿಲ್ಲ ಎಂದು ವಾಗ್ದಾಳಿ ನಡೆಸಿದರು.ಸರ್ಕಾರಿ ಧ್ವಜಕಂಬವಲ್ಲದಿದ್ದರೂ ಪೊಲೀಸರನ್ನು ಬಳಸಿ ಭಗವಾಧ್ವಜ ಕೆಳಗಿಳಿಸಿದ್ದಾರೆ. ಧ್ವಜ ಕೆಳಗಿಳಿಸದಂತೆ ಪ್ರತಿಭಟಿಸಿದವರ ಮೇಲೆ ಲಾಠಿಚಾರ್ಜ್ ಮಾಡಲಾಗಿದೆ. ಆ ಕಾರಣಕ್ಕೆ ಮುಂಬರುವ ಲೋಕಸಭಾ ಚುನಾವಣೆ ಹನುಮ ಭಕ್ತರು, ಟಿಪ್ಪುಭಕ್ತರ ನಡುವಿನ ಹೋರಾಟ ಎನ್ನುವ ಅನಿರ್ವಾಯತೆ ಎದುರಾಗಿದೆ ಎಂದರು.