ಗೋಸ್ವರ್ಗದಲ್ಲಿ ನಾಳೆಯಿಂದ ಶಂಕರ ಪಂಚಮಿ ಕಾರ್ಯಕ್ರಮ

ಸಿದ್ದಾಪುರ: ಶ್ರೀ ರಾಮಚಂದ್ರಾಪುರ ಮಠಾಧೀಶರಾದ ಶ್ರೀ ರಾಘವೇಶ್ವರ ಭಾರತೀ ಮಹಾಸ್ವಾಮಿಗಳ ಸಾನ್ನಿಧ್ಯದಲ್ಲಿ ತಾಲೂಕಿನ ಭಾನ್ಕುಳಿಯ ಶ್ರೀ ರಾಮದೇವಮಠ ಹಾಗೂ ಗೋಸ್ವರ್ಗದಲ್ಲಿ ಮೇ ೧ರಿಂದ ೪ರ ವರೆಗೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳೊಂದಿಗೆ ಶಂಕರ ಪಂಚಮಿ ಉತ್ಸವ ನಡೆಯಲಿದೆ ಎಂದು ಶಂಕರ ಪಂಚಮಿ ಉತ್ಸವ ಸಮಿತಿ ಗೌರವಾಧ್ಯಕ್ಷ ಜಿ.ಕೆ. ಹೆಗಡೆ ಗೋಳಗೋಡ ಹೇಳಿದರು.

ಮೇ ೨ರಂದು ಶಂಕರ ಪಂಚಮಿ ಪ್ರಯುಕ್ತ ಸ್ವರ್ಣಮಂಟಪಾಲಂಕೃತ ಶ್ರೀಕರಾರ್ಚಿತ ಪೂಜೆ, ಸ್ವರ್ಣಭಿಕ್ಷೆ, ಸಂಧ್ಯಾಮಂಗಲ ಕಾರ್ಯಗಳು ನಡೆಯಲಿವೆ. ಕೃಷಿಕರ ಸಂಕಷ್ಟ ನಿವಾರಣೆಗಾಗಿ ೧೦೦೮ ತೆಂಗಿನ ಕಾಯಿ, ವೀಳ್ಯದೆಲೆ, ಅಡಕೆ ಹಾಗೂ ವಿವಿಧ ಪುಷ್ಪಗಳ ಸಹಿತ ಶ್ರೀ ಮಹಾಪಾದುಕೆಗೆ ಸ್ವತಃ ರಾಘವೇಶ್ವರ ಭಾರತೀ ಶ್ರೀಗಳು ಮಹಾಪೂಜೆ ನೆರವೇರಿಸಿ, ೧೦೦೮ ವಸ್ತುಗಳ ನೈವೇದ್ಯ ಅರ್ಪಿಸುವರು.

ಮೇ ೪ರಂದು ಗೋಸ್ವರ್ಗದಲ್ಲಿ ಬೆಳಗ್ಗೆ ೧೦ಕ್ಕೆ ಶ್ರೀ ರಾಘವೇಶ್ವರ ಮಹಾಸ್ವಾಮಿಗಳ ಸಾನ್ನಿಧ್ಯದಲ್ಲಿ ಗೋವುಗಳ ಮೇಲೆ ನಡೆಯುವ ದೌರ್ಜನ್ಯದ ವಿಮುಕ್ತಿ, ಅತಿವೃಷ್ಟಿ, ಅನಾವೃಷ್ಟಿಗಳ ವಿಮೋಚನೆ, ಬೆಳೆಗಳಿಗೆ ಬರುತ್ತಿರುವ ರೋಗಗಳ ಪರಿಮಾರ್ಜನೆಗೆ ಏಕಕಾಲದಲ್ಲಿ ೩೦ ಕುಂಡಗಳಲ್ಲಿ ಕಾಮಧೇನು ಹವನ ಜರುಗುವುದು. ಇದಲ್ಲದೆ ೪೦ಕ್ಕೂ ಹೆಚ್ಚು ಹವನಗಳು ಜರುಗುವುದು. ಆನಂತರ ಮಾತೃತ್ವಮ್ ಸಮಾವೇಶ, ಗೋಸೇವೆಯಲ್ಲಿ ತೊಡಗಿಕೊಂಡ ೫ ಸಾಧಕರಿಗೆ ಗೋಪಾಲ ಗೌರವ ಪ್ರಶಸ್ತಿ ಪ್ರದಾನ, ಮಾತೃತ್ವಮ್ ದಾನಿಗಳಿಗೆ ದಾನ-ಮಾನ, ಲಕ್ಷ ಭಾಗಿನಿಯರಿಗೆ ಆಶೀರ್ವಾದ ಕಾರ್ಯಕ್ರಮಗಳು ನಡೆಯಲಿವೆ ಎಂದು ಜಿ.ಕೆ. ಹೆಗಡೆ ಗೋಳಗೋಡ ಕೋರಿಕೊಂಡರು.