ಶ್ರಾವಣಮಾಸ: ಹಂಪಿ ವಿರೂಪಾಕ್ಷೇಶ್ವರನಿಗೆ ವಿಶೇಷ ಪೂಜೆ

ಹೊಸಪೇಟೆ: ಶ್ರಾವಣ ಮಾಸದ ಪ್ರಯುಕ್ತ ದಕ್ಷಿಣ ಕಾಶಿ ಖ್ಯಾತಿಯ ಹಂಪಿ ಸೇರಿದಂತೆ ವಿಜಯನಗರ ಜಿಲ್ಲೆಯ ಪ್ರಮಖ ದೇವಸ್ಥಾನಗಳಲ್ಲಿ ವಿಶೇಷ ಪೂಜೆ, ಹೋಮ ಹಾಗೂ ಹವನ ಕಾರ್ಯಕ್ರಮಗಳು ನೆರವೇರಿಸಲಾಗುತ್ತಿದ್ದು, ಎಲ್ಲೆಡೆ ಭಕ್ತರು ದೇವರ ಆರಾಧನೆ ಮಾಡುತ್ತಿದ್ದಾರೆ.

ಹೊಸಪೇಟೆ ತಾಲೂಕಿನ ಬುಕ್ಕಸಾಗರ ಗ್ರಾಮದ ಏಳೆಡೆ ನಾಗಪ್ಪ, ಕಮಲಾಪುರ ಗ್ಯಾರೆಬಾವಿ ಆಂಜನೇಯ, ನಗರೇಶ್ವರ, ಜಂಬುನಾಥೇಶ್ವರ, ಹೊಸೂರಮ್ಮದೇವಿ, ವಡಕರಾಯ ರಂಗನಾಥ ಸ್ವಾಮಿ, ಕಣವಿರಾಯ, ಗ್ರಾಮ ದೇವತೆ ಊರಮ್ಮ ದೇವಿ, ನೀಲಕಂಠೇಶ್ವರ, ಸಣ್ಣಕ್ಕಿ ವೀರಭದ್ರೇಶ್ವರ, ರಾಮಲಿಂಗೇಶ್ವರ ಸೇರಿದಂತೆ ವಿವಿಧ ದೇಗುಲಗಳಿಗೆ ಭಕ್ತರು ತೆರಳಿ, ಪೂಜೆ ಸಲ್ಲಿಸಿದರು.

ಪಂಚಲಿಂಗಗಳ ದರ್ಶನ:

ಶ್ರೀ ಹಂಪಿ ವಿರೂಪಾಕ್ಷನ ಈ ಪಂಪಾಕ್ಷೇತ್ರದ ಮಹಿಮೆಗಳು ಇನ್ನು ಅಪಾರ ಈ ಪಂಪಾಕ್ಷೇತ್ರದ ಗಡಿಭಾಗಕ್ಕೆ ನಾಲ್ಕು ದಿಕ್ಕುಗಳಲ್ಲಿ ಒಂದೊಂದು ಅವತಾರದಲ್ಲಿ ಶ್ರೀ ವಿರೂಪಾಕ್ಷನು ನೆಲೆಸಿದ್ದಾನೆ. ಈ ನಾಲ್ಕು ಅಂಗಗಳ ದರ್ಶನ ವಿರೂಪಾಕ್ಷನ ದರ್ಶನದಷ್ಟೇ ಶ್ರೇಷ್ಠವಾದುದು. ಈ ವಿರೂಪಾಕ್ಷನ ಸ್ಥಾನಗಳು ಕವಿವರ್ಯರಿಂದಲೂ ಸ್ತುತಿಸಲ್ಪಟ್ಟಿವೆ. ಹರಿಹರನ ಮಹಾಕಾವ್ಯ ಗಿರಿಜಾಕಲ್ಯಾಣದಲ್ಲಿ ವಿರೂಪಾಕ್ಷನನ್ನು ಹಂಪಿಯಾಳ ಇಲ್ಲದೆ ಹಂಪಿಯರಸನೆಂದು ಹೇಳಲಾಗಿದೆ.

ಶ್ರಾವಣ ಮಾಸದ ಪ್ರಯುಕ್ತ ಭಕ್ತ ಮಹಾಜನರು ಪಂಚಲಿಂಗಗಳ ದರ್ಶನ ಮಾಡಿಕೊಳ್ಳಬೇಕು ಎಂದು ಕೋರಿರುವ ಶಾಸಕ ಎಚ್.ಆರ್. ಗವಿಯಪ್ಪ ಪ್ರತಿ ಶ್ರಾವಣ ಸೋಮವಾರ ದಿನದಂದು ವಿಶೇಷ ಬಸ್‌ ವ್ಯವಸ್ಥೆ, ಪ್ರಸಾದ ವ್ಯವಸ್ಥೆ ಮಾಡಲಾಗಿದೆ ಎಂದು ತಿಳಿಸಿದ್ದಾರೆ.