ಬದುಕಿನ ಧಾವಂತದಲ್ಲಿ ಕ್ಷೀಣಿಸುತ್ತಿರುವ ಅಧ್ಯಾತ್ಮ: ಸಿದ್ದಿ

ಯಲ್ಲಾಪುರ: ಬದುಕಿನ ಧಾವಂತದ ಪ್ರಸ್ತುತ ಸಂದರ್ಭದಲ್ಲಿ ಯಾರೊಬ್ಬರಿಗೂ ಸಮಯವೇ ಇಲ್ಲದಂತಾಗಿದೆ. ಆಧ್ಯಾತ್ಮಿಕ ಚಿಂತನೆ ಕಡಿಮೆಯಾಗುತ್ತಿದೆ ಎಂದು ವಿಪ ಸದಸ್ಯ ಶಾಂತಾರಾಮ ಸಿದ್ದಿ ಹೇಳಿದರು.

ಹಿಂದುಳಿದ ಸಮೂದಾಯದ ಸಂಘಟನೆಗಳಿಗೆ ಕೆಲವು ಹಿತಾಸಕ್ತಿಗಳು ಧಕ್ಕೆ ಮತ್ತು ಅಡ್ಡಿ ಉಂಟು ಮಾಡುತ್ತಿರುವುದನ್ನು ಗಂಭೀರವಾಗಿ ಪರಿಗಣಿಸಿದ ಸ್ವರ್ಣವಲ್ಲಿಯ ಶ್ರೀಗಳ ನಿರ್ದೆಶನದಂತೆ ಈ ಸಂಘಟನೆಯನ್ನು ನಾವು ಆರಂಭಿಸಿದ್ದೇವೆ. ಸಮಾಜದಲ್ಲಿ ಜನರು ಉತ್ತಮ ಮಾರ್ಗದಲ್ಲಿ ಸಾಗದೇ ಒಳ್ಳೆಯತನ ಮರೆಯುತ್ತಿರುವ ಹಿನ್ನಲೆಯಲ್ಲಿ ನಾವು ಭಜನಾ ಸ್ಪರ್ಧೆಯೂ ಸೇರಿದಂತೆ ವಿವಿಧ ಧಾರ್ಮಿಕ ಮತ್ತು ಸಾಮಾಜಿಕ ಕಾರ್ಯಕ್ರಮಗಳನ್ನು ಆಯೋಜಿಸುತ್ತಿದ್ದೇವೆ. ಭಜನೆಯಲ್ಲಿ ತಲ್ಲೀನರಾದ ಭಕ್ತರಿಗೆ ಒಂದು ರೀತಿಯ ಅಮಲು ಉಂಟಾಗಬೇಕು ಅಂದಾಗ ಭಗವಂತನ ಸಾಮಿಪ್ಯ ದೊರಕುತ್ತದೆ'''' ಎಂದರು.

ಅತಿಥಿಗಳಾಗಿದ್ದ ತಾಪಂ ಮಾಜಿ ಉಪಾಧ್ಯಕ್ಷೆ ಸುಜಾತಾ ಸಿದ್ದಿ ಸಾಂದರ್ಭಿಕ ಮಾತನ್ನಾಡಿದರು. ಟ್ರಸ್ಟಿಗಳಾದ ಸೋಮನಾಥ ಸಿದ್ದಿ, ಪರಶುರಾಮ ಸಿದ್ದಿ, ಪ್ರಮುಖರಾದ ಗಣೇಶ ಕೈಗಡಿ, ಚಂದ್ರಶೇಖರ ಶೀಗೆಹಳ್ಳಿ ಉಪಸ್ಥಿತರಿದ್ದರು.

ಐದು ತಂಡಗಳು ಪಾಲ್ಗೊಂಡಿದ್ದ ಭಜನಾ ಸ್ಪರ್ಧೆಯಲ್ಲಿ ಹಸೇಕಲ್ಲಿನ ಮಹಾಗಣಪತಿ ಭಜನಾ ಮಂಡಳಿ; ಶೀಗೇಹಳ್ಳಿ ಕಪ್ಪರಮನೆಯ ಬಟ್ಟೆವಿನಾಯಕ ಭಜನಾ ಮಂಡಳಿ; ಕೈಗಡಿಯ ಸಿದ್ದಿವಿನಾಯಕ ಭಜನಾ ಮಂಡಳಿ ಅನುಕ್ರಮ ಸ್ಥಾನ ಗಳಿಸಿ ಬಹುಮಾನ ಪಡೆದರು.

ಸಮಾರೋಪದಲ್ಲಿ ಶ್ರೀರಾಮ ವನವಾಸಿ ವಿದ್ಯಾರ್ಥಿ ನಿಲಯದ ಕಾರ್ಯದರ್ಶಿಭಾಗು ಶೆಳಕೆ ವಂದಿಸಿದರು. ಶಾಂತಿ ಮಂತ್ರದೊಂದಿಗೆ ಕಾರ್ಯಕ್ರಮ ಸಂಪನ್ನಗೊಂಡಿತು.