ಕಂದಾಯ ಗ್ರಾಮ ಸರ್ವೇ ಕಾರ್ಯ ನಿಲ್ಲಿಸಿ

ಗಜೇಂದ್ರಗಡ: ರಾಜೂರು ಗ್ರಾಪಂ ವ್ಯಾಪ್ತಿಯ ಭೈರಾಪೂರ ಗ್ರಾಮದಲ್ಲಿ ನಿವೇಶನ ಮತ್ತು ಭೂಮಿ ಅಳೆಯುವ ಕಾರ್ಯಕ್ಕೆ ತಕರಾರಿದ್ದು, ಅಧಿಕಾರಿಗಳು ಸರ್ವೆ ಕಾರ್ಯ ನಿಲ್ಲಿಸಬೇಕು ಎಂದು ಒತ್ತಾಯಿಸಿ ಪಟ್ಟಣದ ತಹಸೀಲ್ದಾರ್‌ಗೆ ಬುಧವಾರ ಭೈರಾಪೂರ ಗ್ರಾಮಸ್ಥರು ಮನವಿ ನೀಡಿದರು.

ಅನೇಕ ಗೊಂದಲ ಸೃಷ್ಠಿಯಾಗಿದೆ ಎಂದ ದೂರಿದ ಗ್ರಾಮಸ್ಥರು, ಕಳೆದ ಕೆಲ ತಲೆಮಾರುಗಳಿಂದ ನಾವು ಭೈರಾಪೂರ ಗ್ರಾಮದಲ್ಲಿ ಬದುಕು ಕಟ್ಟಿಕೊಂಡಿದ್ದು ಅದಕ್ಕೆ ಪೂರಕವಾದ ನಮ್ಮ ಮನೆಯ ಅಳತೆ, ಉತಾರ ಸೇರಿ ಇತರ ದಾಖಲೆಗಳು ರಾಜೂರು ಗ್ರಾಪಂನಲ್ಲಿವೆ. ಆದರೆ ಅಧಿಕಾರಿಗಳು ಕಂದಾಯ ಗ್ರಾಮ ಮಾಡುತ್ತೇವೆ ಎಂದು ಸರ್ವೆ ಕಾರ್ಯಕ್ಕೆ ನಡೆಸುತ್ತಿದ್ದು, ಸರ್ವೆ ಬಳಿಕ ನೀಡುವ ಅಳತೆ ಹಾಗೂ ಗ್ರಾಪಂನಲ್ಲಿನ ದಾಖಲೆಗಳಲ್ಲಿ ವ್ಯತ್ಯಾಸವಾದರೆ ಹೊಸ ಸಮಸ್ಯೆ ಸೃಷ್ಠಿಯಾಗಲಿದೆ ಎಂದರು.

ಮನವಿ ಸ್ವೀಕರಿಸಿ ತಹಸೀಲ್ದಾರ್ ಕಿರಣಕುಮಾರ ಕುಲಕರ್ಣಿ, ಭೈರಾಪೂರ ಗ್ರಾಮದಲ್ಲಿ ನಡೆಯುತ್ತಿರುವ ಸರ್ವೆಗೆ ಗ್ರಾಮಸ್ಥರು ಸಹಕಾರ ನೀಡಬೇಕು. ಕಂದಾಯ ಗ್ರಾಮ ಆಗುವದರಿಂದ ನಿಮಗೆ ಲಾಭವಾಗಲಿದೆ ಹೊರತು ನಷ್ಟವಾಗುವದಿಲ್ಲ. ಅಲ್ಲದೆ ಗ್ರಾಮಸ್ಥರ ಮಾಲಿಕತ್ವದ ದಾಖಲೆಗಳು ರಾಜೂರು ಗ್ರಾಪಂನಲ್ಲಿ ಲಭ್ಯವಾಗಲಿವೆ. ಹೀಗಾಗಿ ಗ್ರಾಮಸ್ಥರು ಸರ್ವೆ ಕಾರ್ಯಕ್ಕೆ ಸಹಕಾರ ನೀಡಬೇಕು ಎಂದು ಮನವಿ ಮಾಡಿದರು. ಆದರೆ ಗ್ರಾಮಸ್ಥರು ಸರ್ವೆ ಕಾರ್ಯಕ್ಕೆ ನಮ್ಮ ತಕರಾರು ಇದೆ ಎಂದು ಪುನರುಚ್ಚರಿಸಿ ತೆರಳಿದರು.