ಕಡೂರನ್ನು ಜಿಲ್ಲಾ ಕೇಂದ್ರ ಮಾಡಲು ಹೋರಾಟದ ಅಗತ್ಯವಿದೆ: ಶಾಸಕ ಆನಂದ್‌

ಯಗಟಿ ಗ್ರಾಮದ ಸರ್ಕಾರಿ ಪದವಿ ಪೂರ್ವ ಕಾಲೇಜಿನಲ್ಲಿ 55 ಲಕ್ಷ ರು. ವೆಚ್ಚದ ನೂತನ ಕೊಠಡಿ ಉದ್ಘಾಟನೆಯಲ್ಲಿ

ನಮ್ಮ ಹಕ್ಕುಗಳನ್ನು ಪಡೆಯಲು ವೇಗವಾಗಿ ಬೆ‍ಳೆಯುತ್ತಿರುವ ಕಡೂರನ್ನು ಹಿಂದಿನಂತೆ ಜಿಲ್ಲಾ ಕೇಂದ್ರ ಮಾಡುವ ಸಮಯ ಬಂದಿದ್ದು ಹೋರಾಟಕ್ಕೆ ಸಜ್ಜಾಗುವ ಅಗತ್ಯವಿದೆ ಎಂದು ಶಾಸಕ ಕೆ.ಎಸ್.ಆನಂದ್ ಹೇಳಿದರು. ಬುಧವಾರ ಕಡೂರು ವಿಧಾನಸಭಾ ಕ್ಷೇತ್ರದ ಯಗಟಿ ಗ್ರಾಮದ ಸರ್ಕಾರಿ ಪದವಿ ಪೂರ್ವ ಕಾಲೇಜಿನಲ್ಲಿ 55 ಲಕ್ಷ ರು. ವೆಚ್ಚದ ನೂತನ ಕೊಠಡಿ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಕಡೂರು ಜಿಲ್ಲಾ ಕೇಂದ್ರ ವಾಗಿದ್ದು ಇತಿಹಾಸ. ಅದೇಕೋ ನಮ್ಮ ಬಯಲು ಪ್ರದೇಶವನ್ನು ಸೇರಿಸಿಕೊಂಡು ಚಿಕ್ಕಮಗಳೂರು ಜಿಲ್ಲೆಯಾಗಿ ಘೋಷಣೆ ಮಾಡಿದರೂ ನಮಗೆ ಯಾವುದೇ ಲಾಭವಿಲ್ಲ. ಸಾಕಷ್ಟು ಸವಲತ್ತು ಪಡೆಯುವಲ್ಲೂ ವಂಚಿತರಾಗುತ್ತಿದ್ದೇವೆ. ಕಡೂರನ್ನು ಹಿಂದಿನಂತೆ ಜಿಲ್ಲಾ ಕೇಂದ್ರ ಮಾಡುವ ಹೋರಾಟಕ್ಕೆ ಈಗ ಸಮಯ ಬಂದಿದೆ ಎಂದರು.

ಇಂಗ್ಲೀಷ್ ಮಾಧ್ಯಮದ ಕೆಪಿಎಸ್ (ಕರ್ನಾಟಕ ಪಬ್ಲಿಕ್ ಸ್ಕೂಲ್) ನೀಡಲು ಈಗಾಗಲೇ ಸಚಿವರೊಂದಿಗೆ ಚರ್ಚಿಸಿದ್ದು. ಯಗಟಿ ಶಾಲೆಯಲ್ಲಿ 4 ನೇ ತರಗತಿವರೆಗೆ ಇರುವ ಆಂಗ್ಲ ಮಾಧ್ಯಮವನ್ನು 10ನೇ ತರಗತಿವರೆಗೆ ವಿಸ್ತರಿಸಲು ಗಮನ ಹರಿಸುತ್ತೇನೆ ಎಂದರು.

ಯಗಟಿ ಗ್ರಾಪಂ ಮಾಜಿ ಅಧ್ಯಕ್ಷ ವೈ.ಎಸ್. ರವಿಪ್ರಕಾಶ್ ಮಾತನಾಡಿ, ಶಾಸಕ ಆನಂದ್ ಅವರು ಹೋರಾಟ ಮತ್ತು ರಾಜಕೀಯ ಬದ್ಧತೆಯಿಂದ ಶಾಸಕರಾದವರು, ಕೆ.ಎಂ.ಕೃಷ್ಣಮೂರ್ತಿ, ವೈಎಸ್ ವಿ ದತ್ತ ಸೇರಿದಂತೆ ಆಯಾ ಕಾಲ ಘಟ್ಟದಲ್ಲಿ ಶಾಸಕರಾದವರು ಯಗಟಿ ಹೋಬಳಿ ಅಭಿವೃದ್ಧಿಗೆ ಶ್ರಮಿಸಿದ್ದಾರೆ. ಅದರಂತೆ ನೂತನ ಶಾಸಕರು, ಕಾಲೇಜಿಗೆ ವಾಣಿಜ್ಯ ವಿಭಾಗ ತೆರೆಯುವಿಕೆ, ಗ್ರಾಮ ಪಂಚಾಯ್ತಿ ಮಾದರಿ ಶಾಲೆಗೆ ಒತ್ತು ನೀಡಲಿ. ಕಡೂರು ಜಿಲ್ಲೆಯನ್ನು ಮರಳಿ ಪಡೆಯಲು ಶಾಸಕರು ಪ್ರಯತ್ನ ನಡೆಸುತ್ತಿದ್ದು ಇದಕ್ಕೆ ನಮ್ಮೆಲ್ಲರ ಬೆಂಬಲವಿದೆ ಎಂದರು.

ಕಾಲೇಜು ಪ್ರಾಚಾರ್ಯ ಜಿ.ರೇವಣ್ಣ ಮಾತನಾಡಿ, ಇನ್ನು 2 ಹೆಚ್ಚುವರಿ ಕೊಠಡಿಗಳ ಅವಶ್ಯಕತೆ ಕಾಲೇಜಿಗೆ ಇದೆ. ಕಾಂಪೌಂಡ್ ಅವಶ್ಯವಾಗಿ ಬೇಕಾಗಿದ್ದು ಶಾಸಕರು ಕ್ರಮ ವಹಿಸಬೇಕು ಎಂದು ಮನವಿ ಮಾಡಿದರು.

ರಾಜ್ಯ ಸರ್ಕಾರದ 5 ಗ್ಯಾರಂಟಿಗಳ ಹೆಸರನ್ನು ಯಾರು ಹೇಳುತ್ತಿರಿ ಕೈ ಎತ್ತಿ ಹೇಳಿ ಎಂದು ಶಾಸಕರು ಪ್ರಶ್ನಿಸಿದಾಗ ಯಾರೊಬ್ಬ ವಿದ್ಯಾರ್ಥಿಯು 5 ಗ್ಯಾರಂಟಿಗಳ ಹೆಸರನ್ನು ಹೇಳಲಿಲ್ಲ. ಬದಲಾಗಿ ತಕ್ಷಣವೇ ಶಾಸಕರು ಮುಖ್ಯಮಂತ್ರಿ ಹೆಸರನ್ನು ಹೇಳಿ ಎಂದಾಗ ಮಕ್ಕಳೆಲ್ಲಾ ಸಿದ್ದರಾಮಯ್ಯ ಎಂದು ಪದೇಪದೇ ಕೂಗಿದರು..

ಕಡೂರು ಕ್ಷೇತ್ರದ ಯಗಟಿ ಗ್ರಾಮದ ಸರಕಾರಿ ಪದವಿ ಪೂರ್ವ ಕಾಲೇಜಿನ ನೂತನ ಹೆಚ್ಚುವರಿ ಕೊಠಡಿ ಉದ್ಘಾಟನಾ ಕಾರ್ಯಕ್ರಮ ನಡೆಯಿತು.