ಸಂಸ್ಕೃತ ಅಧ್ಯಯನದಿಂದ ಮಾನಸಿಕ ಸದೃಢತೆ ವೃದ್ಧಿ

ಶಿವಮೊಗ್ಗ: ಬಾಲ್ಯದಲ್ಲಿಯೇ ಮಕ್ಕಳು ಸಂಸ್ಕೃತ ಅಧ್ಯಯನ ಮಾಡಿದರೆ, ಆ ಮಕ್ಕಳಿಗೆ ಉತ್ತಮ ಸಂಸ್ಕಾರ ಸಿಗುತ್ತದೆ. ಅಂತಹ ಶಕ್ತಿ ಸಂಸ್ಕೃತಕ್ಕಿದೆ ಎಂದು ಜಿಲ್ಲಾ ಬ್ರಾಹ್ಮಣ ಮಹಾ ಸಭಾದ ಅಧ್ಯಕ್ಷ ನಟರಾಜ್ ಭಾಗವತ್ ತಿಳಿಸಿದರು.

ಗೀತೆ, ಸುಭಾಷಿತ, ನಿತ್ಯ ಪಠಣ ಶ್ಲೋಕಗಳನ್ನು ಚಿಕ್ಕ ವಯಸ್ಸಿನಲ್ಲಿಯೇ ಮಕ್ಕಳು ಕಲಿತರೆ ಅದು ಅವರ ಜೀವನದ ಕಡೆಯವರೆಗೂ ಆ ಸಂಸ್ಕಾರ ಉಳಿಯುತ್ತದೆ. ಇದರಿಂದ ಅವರ ಮಾನಸಿಕತೆಯು ದೃಢವಾಗುತ್ತದೆ ಎಂದರು.

ಸಂಸ್ಕೃತ ಕೇವಲ ಮೇಲ್ವರ್ಗದ ಜನರ ಭಾಷೆ ಎಂದು ತಿರುಚುವ ಮಂದಿಯೂ ಇದ್ದಾರೆ. ಆದರೆ ರಾಮಾಯಣ ಬರೆದ ವಾಲ್ಮೀಕಿ ಕೂಡ ಸಂಸ್ಕೃತದಲ್ಲಿಯೇ ಕಾವ್ಯ ರಚಿಸಿದ್ದು. ಇದೇ ರೀತಿ ಎಲ್ಲ ವರ್ಗಕ್ಕೆ ಸೇರಿದ ಕವಿಗಳು ಕೂಡ ಸಂಸ್ಕೃತದಲ್ಲಿಯೇ ಕಾವ್ಯ ರಚಿಸಿದ್ದರು ಎಂದು ತಿಳಿಸಿದರು.

ಕಾರ್ಯಕ್ರಮದಲ್ಲಿ ಸಂಸ್ಕೃತ ಭಾರತೀ ಹಿರಿಯ ಕಾರ್ಯಕರ್ತ ರಾಮಕೃಷ್ಣ ಮಾತನಾಡಿದರು.

ಸಂಸ್ಕೃತ ಭಾರತಿಯ ನಗರ ಅಧ್ಯಕ್ಷ ಎಮ್.ಎಸ್.ಗುರುರಾಜ್ ಪ್ರಾಸ್ತಾವಿಕವಾಗಿ ಮಾತನಾಡಿದರು. ವಸಂತ ಮತ್ತು ಭಾಗ್ಯ ಪ್ರಾರ್ಥನೆ ಮಾಡಿದರು, ಮನು ಚವ್ಹಾಣ್ ಸ್ವಾಗತಿಸಿದರು, ಪದ್ಮಿನಿ ವಂದಿಸಿದರು.