ಕುಡಿಯುವ ನೀರಿನ ಸಮಸ್ಯೆ ನಿವಾರಣೆಗೆ ಮುಂಡರಗಿ, ಡಂಬಳದಲ್ಲಿ ತಂಡ ರಚನೆ

ರಿಯಾಜಅಹ್ಮದ ಎಂ. ದೊಡ್ಡಮನಿ

ಪ್ರತಿ ಮಂಗಳವಾರ ಮತ್ತು ಬುಧವಾರ ಗ್ರಾಮಮಟ್ಟದ ಕಾರ್ಯಪಡೆ ಮತ್ತು ಪ್ರತಿ ಗುರುವಾರ ತಾಲೂಕು ಮಟ್ಟದ ಕಾರ್ಯಪಡೆ ಸಭೆ ನಡೆಯುತ್ತದೆ. ಜಿಲ್ಲಾಮಟ್ಟದಲ್ಲಿ ಪ್ರತಿ ಶುಕ್ರವಾರ ವಿಡಿಯೋ ಸಭೆ ನಡೆಯುತ್ತದೆ. ಎಲ್ಲ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿಗಳು, ಗ್ರಾಮ ಆಡಳಿತಾಧಿಕಾರಿಗಳು ಪಾಲ್ಗೊಂಡು ನೀರಿನ ಸಮಸ್ಯೆ ಮತ್ತು ಪಶುಗಳಿಗೆ ಆಹಾರದ ಕೊರತೆಯಾಗದಂತೆ ಕ್ರಮ ಕೈಗೊಳ್ಳುತ್ತಾರೆ. ಸಭೆಯಲ್ಲಿನ ನಡಾವಳಿಯನ್ನು ಸಾರ್ವಜನಿಕರ ಮಾಹಿತಿಗಾಗಿ ಜಿಲ್ಲಾ ವೆಬ್‌ಸೈಟ್‌ನಲ್ಲಿ ಅಪ್‍ಲೋಡ್ ಮಾಡುವ ವ್ಯವಸ್ಥೆ ಮಾಡಲಾಗಿದೆ.

ನೀರಿಗಾಗಿ 52 ಲಕ್ಷ: ತುಂಗಭದ್ರಾ ನದಿಯ ಮೂಲಕ ಬಹುಗ್ರಾಮ ಕುಡಿಯುವ ನೀರು (ಡಿಬಿಒಟಿ) ಮೂಲಕ ಗ್ರಾಮಗಳಿಗೆ ನೀರು ಒದಗಿಸಲಾಗುತ್ತಿದೆ. ಈ ನೀರು ಕೇವಲ 10 ದಿನಗಳ ವರೆಗೆ ಮಾತ್ರ ಸಾಕಾಗಲಿದೆ. ಈ ಹಿನ್ನೆಲೆಯಲ್ಲಿ ಇಲಾಖೆಯ ಅಧಿಕಾರಿಗಳು ಭದ್ರ ಅಣೆಕಟ್ಟೆಯಿಂದ ನೀರು ಬಿಡುವಂತೆ ಪ್ರಸ್ತಾವನೆ ಸಲ್ಲಿಸಿದ್ದರು. ಆ ನೀರು ಸಹ ಬಂದಿದೆ. ಮುಂಡರಗಿಯ 9 ಗ್ರಾಪಂ, ಡಂಬಳ ಹೋಬಳಿಯ 10 ಗ್ರಾಪಂಗಳಲ್ಲಿ 694 ಸರ್ಕಾರಿ ಬೋರ್‌ವೆಲ್‌ಗಳು, ಅಲ್ಲದೆ ಕೆಲವು ಖಾಸಗಿ ಬೋರ್‌ವೆಲ್‍ಗಳನ್ನು ಕುಡಿಯುವ ನೀರಿಗಾಗಿ ಗುರುತಿಸಲಾಗಿದೆ. ಮುಂಡರಗಿಯಲ್ಲಿ 88 ಶುದ್ಧ ನೀರಿನ ಘಟಕಗಳು ಇದ್ದು, ಅದರಲ್ಲಿ 10 ರಿಪೇರಿಗಾಗಿ ಕಾದಿವೆ. ಗ್ರಾಮೀಣ ಮಟ್ಟದಲ್ಲಿ ಅತಿಯಾಗಿ ಕುಡಿಯುವ ನೀರಿನ ಸಮಸ್ಯೆಯಾದರೆ ಟ್ಯಾಂಕರ್ ಮೂಲಕ ಕುಡಿಯುವ ನೀರು ಸರಬರಾಜು ಮಾಡಿಕೊಳ್ಳಲು ತಹಸೀಲ್ದಾರ್‌ ಪಿಡಿ ಖಾತೆಯ ಮೂಲಕ ತಲಾ ₹52 ಲಕ್ಷ ಕಾಯ್ದಿರಿಸಲಾಗಿದೆ.ಮೇವು ಬ್ಯಾಂಕ್: ಡಂಬಳ ಹೋಬಳಿಯ ಗ್ರಾಮಗಳು ಸೇರಿದಂತೆ ತಾಲೂಕಿನಾದ್ಯಂತ 5000 ಮೆಟ್ರಿಕ್ ಟನ್ ಮೇವು ಲಭ್ಯ ಇದೆ. ಅಲ್ಲದೆ ಮೇವು ಕೊರತೆಯಾಗಬಾರದು ಎನ್ನುವ ಹಿನ್ನೆಲೆ ಅಧಿಕಾರಿಗಳಿಂದ ಡಂಬಳ ಮತ್ತು ಬಾಗೇವಾಡಿ ಗ್ರಾಮಗಳಲ್ಲಿ ಮೇವು ಬ್ಯಾಂಕ್‌ ಪ್ರಾರಂಭವಾಗಿದೆ. ಹಂತ ಹಂತವಾಗಿ ಎಲ್ಲ 19 ಗ್ರಾಪಂಗಳ ಆವರಣಗಳಲ್ಲಿ ಮೇವಿನ ಬ್ಯಾಂಕ್‍ಗಳನ್ನು ತೆರೆಯುವ ತಯಾರಿಯಲ್ಲಿ ಇದ್ದು, ₹2ರಂತೆ ಒಂದು ವಾರಕ್ಕೆ 42 ಕೆಜಿ ಮೇವು ಕೊಡುವುದು, ಪ್ರತಿ ಮೇವು ಬ್ಯಾಂಕಿನಲ್ಲಿ 4ರಿಂದ 5 ಟನ್ ಮೇವು ಸಂಗ್ರಹವಿರುವಂತೆ ನೋಡುಕೊಳ್ಳಲಾಗುತ್ತಿದ್ದು ಅತ್ಯಂತ ಅವಶ್ಯಕತೆ ಇರುವ ರೈತರು ಸದುಪಯೋಗ ಪಡೆದುಕೊಳ್ಳಬಹುದಾಗಿದೆ.ಸಹಾಯವಾಣಿ ಆರಂಭ: ಮುಂಡರಗಿ ತಾಲೂಕಿನ ಕಚೇರಿಯ ಮೂಲಕ ವಿಪತ್ತು ನಿರ್ವಣೆಯ ಸಹಾಯವಾಣಿ 262237 ಸಂಖ್ಯೆಯಾಗಿದ್ದು, ರೈತರು ಸಾರ್ವಜನಿಕರು ನೀರಿನ ಮತ್ತು ಮೇವು ಪಡೆಯಲು ಈ ಸಹಾಯವಾಣಿಗೆ ಕರೆ ಮಾಡಿ ಸಹಾಯ ಪಡೆದುಕೊಳ್ಳಬೇಕು.