ದುಷ್ಟಗುಣಗಳ ಸಂಹಾರವೇ ನವರಾತ್ರಿಯ ಆಚರಣೆ: ಯೋಗಿನ ಅಕ್ಕ

ಕೊಪ್ಪಳ: ದುಷ್ಟಗುಣ ಸಂಹರಿಸಿ ಸದ್ಗುಣ ಧರಿಸುವುದೇ ನವರಾತ್ರಿಯ ಉದ್ದೇಶ, ಸರ್ವ ಶಕ್ತಿವಂತ ಪರಮಾತ್ಮ ಶಿವನಿಂದ ಶಕ್ತಿ ಪಡೆದು ಅಸುರಿ ಗುಣ ನಾಶ ಮಾಡುವವರೇ ಶಿವಶಕ್ತಿಯರು ದೇವಿಯರು ಎಂದು ಕೊಪ್ಪಳ ಈಶ್ವರಿಯ ವಿಶ್ವ ವಿದ್ಯಾಲಯ ಸೇವಾ ಕೇಂದ್ರದ ಸಂಚಾಲಕಿ ಬ್ರಹ್ಮಕುಮಾರಿ ಯೋಗಿನಿ ಅಕ್ಕ ಹೇಳಿದ್ದಾರೆ.

ನವರಾತ್ರಿಯ ಆಧ್ಯಾತ್ಮಿಕ ರಹಸ್ಯ ತಿಳಿಸಿದ ಅವರು, ಕಾಮ,ಕ್ರೋಧ,ಲೋಭ, ಮೋಹ, ಅಹಂಕಾರ, ದುರಾಭಿಮಾನ, ದ್ವೇಷ, ಈರ್ಷೆ, ಮದ, ಮತ್ಸರ ಎಂಬ ಹತ್ತು ತಲೆಯ ರಾವಣನ ಮೇಲೆ ವಿಜಯ ಸಾಧಿಸುವುದೇ ವಿಜಯದಶಮಿ ಎಂದರು.

ಈಶ್ವರಿಯ ವಿಶ್ವವಿದ್ಯಾಲಯದ ದೈವೀ ಪರಿವಾರದವರಿಂದ ದಶಕಂಠ ರಾವಣನ ಸಂಹಾರ ಚೈತನ್ಯ ದೇವಿಯರ ದರ್ಶನ ರೂಪಕ ಹಾಗೂ ವಿಶ್ವಪಿತನಿಗೆ ರಾಷ್ಟ್ರಗೀತೆ ರೂಪಕ ಹಾಗೂ ಜ್ಞಾನ ನೃತ್ಯ ಸರ್ವರ ಮನ ಹರ್ಷಿತಗೊಳಿಸಿತು. ಇದೇ ಸಂದರ್ಭದಲ್ಲಿ ನಗರಸಭೆ ಸದಸ್ಯ ಅರುಣ್ ಶೆಟ್ಟಿ, ದುರ್ಗಾ ಮಿತ್ರ ಮಂಡಳಿಯ ಅಂಬರೀಶ್, ಸಂಗಯ್ಯ ಮುಂತಾದವರಿದ್ದರು. ಬಿಕೆ ಸ್ನೇಹಕ್ಕ ಕಾರ್ಯಕ್ರಮ ನಿರೂಪಿಸಿದರು.