ಪರಿಶೀಲನೆಗೆ ತೆರಳಿದ್ದ ಮುಖ್ಯಾಧಿಕಾರಿಗೆ ಮುತ್ತಿಗೆ

ಗಜೇಂದ್ರಗಡ: ಪಟ್ಟಣದಲ್ಲಿ ಪರವಾನಗಿ ಪಡೆಯದ,ನವೀಕರಣ ಮಾಡಿಸದ, ಟೆಸ್ಟಿಂಗ್ ಪೌಡರ್, ಪ್ಲಾಸ್ಟಿಕ್ ಮತ್ತು ತಂಬಾಕು ಉತ್ಪನಗಳ ಮಾರಾಟ ಮಳಿಗೆಗಳ ಪರಿಶೀಲನೆಗೆ ತೆರಳಿದ್ದ ಪುರಸಭೆ ಪ್ರಭಾರಿ ಮುಖ್ಯಾಧಿಕಾರಿ ಬಸವರಾಜ ಬಳಗಾನೂರ ಅವರಿಗೆ ಇಲ್ಲಿನ ವ್ಯಾಪಾರಸ್ಥರು ಮುತ್ತಿಗೆ ಹಾಕಿದ ಘಟನೆ ಗುರುವಾರ ನಡೆಯಿತು.

ಇದಕ್ಕೆ ಕೆಲ ವ್ಯಾಪಾರಸ್ಥರು ಅಂಗಡಿಗಳ ಮೇಲೆ ದಾಳಿ ಮಾಡುತ್ತಿದ್ದೀರೋ ಅಥವಾ ಪರಿಶೀಲನೆ ಮಾಡುತ್ತಿದ್ದೀರೋ ಎನ್ನುವದನ್ನು ಮೊದಲು ಸ್ಪಷ್ಟ ಪಡಿಸಿ. ಅಲ್ಲದೆ ಮೊದಲು ಜಾಗೃತಿ ಅಥವಾ ಪ್ರಚಾರ ಮಾಡಬೇಕಿತ್ತು ಅಲ್ಲವೇ, ಹೀಗೆ ಏಕಾಏಕಿ ಬಂದು ತಂಬಾಕು ಒಯ್ದರೆ ಹೇಗೆ. ರಾಜ್ಯದಲ್ಲಿ ತಂಬಾಕು, ಗುಟ್ಕಾ ಬ್ಯಾನ್ ಆಗಿದೆಯಾ ಎಂದು ಪ್ರಶ್ನಿಸಲು ಆರಂಭಿಸಿದರು. ಆಗ ನಿನ್ನೆ ತಹಸೀಲ್ದಾರ್ ನೇತೃತ್ವದಲ್ಲಿ ನಡೆದ ದಾಳಿಯಲ್ಲಿ ಟೆಸ್ಟಿಂಗ್ ಪೌಡರ್ ಹಾಗೂ ತಂಬಾಕು ಉತ್ಪನ್ನ ಮಾರಾಟ ಸ್ಥಳಗಳ ಮೇಲೆ ದಾಳಿ ನಡೆಸಿ ಎಚ್ಚರಿಕೆ ನೀಡಲಾಗಿದೆ. ಗುಟ್ಕಾ ಹಾಗೂ ತಂಬಾಕು ಉತ್ಪನಗಳ ಮಾರಾಟ ನಿಷೇಧವಿದೆ. ಹೀಗಾಗಿ ಇಂದು ಅಂಗಡಿಗಳ ಪರಿಶೀಲನೆ ಜತೆಗೆ ಪರವಾನಗಿ ನವೀಕರಣ ಮಾಡಿಕೊಳ್ಳಲು ಸೂಚಿಸಲಾಗುತ್ತಿದೆ ಎಂದರು.

ಪಟ್ಟಣದಲ್ಲಿ ಪ್ಲಾಸ್ಟಿಕ್ ಮಾರಾಟ ಮಾಡುವ ಅಂಗಡಿಕಾರರಿಗೆ ದಂಡ ಹಾಕುವ ಬದಲು ಸಾರ್ವಜನಿಕರಿಗೆ ದಂಡ ಹಾಕಬೇಕು ಎಂದು ಒರ್ವ ವ್ಯಾಪಾರಸ್ಥ ಸಲಹೆ ನೀಡಿದರೆ, ಇನ್ನೊರ್ವ ವ್ಯಾಪಾರಸ್ಥ ನಾವು ಗುಟ್ಕಾ ಯಾವಾಗಲೂ ಮಾರುತ್ತಿದ್ದೇವೆ, ಏಕಾಏಕಿ ರೇಡ್ ಮಾಡಿದರೆ ಹೇಗೆ ಎಂದು ಪ್ರಶ್ನಿಸಿದರೆ ಮತ್ತೊರ್ವ ವ್ಯಾಪಾರಸ್ಥರ ಭಯದಲ್ಲಿ ನಮ್ಮ ಅಂಗಡಿಗೆ ರೇಡ್ ಆಗುತ್ತೆ ಎಂದು ಅಂಗಡಿಗಳ ಬಾಗಿಲು ಹಾಕಿಕೊಂಡು ಮನೆಗೆ ಹೋಗಿದ್ದಾರೆ ಎಂದಾಗ ಆಕ್ರೋಶಗೊಂಡ ಪುರಸಭೆ ಅಧಿಕಾರಿಗಳು ನಿಮಗೆ ಭಯಪಡಿ ಎಂದವರು ಯಾರು, ಭಯ ಪಡುವ ಪ್ರಶ್ನೆ ಏನಿದೆ. ತಪ್ಪು ಮಾಡಿದ್ದರೆ ಭಯ ಪಡಬೇಕು. ಅಂಗಡಿಗಳನ್ನು ಬಂದ್ ಯಾಕೆ ಮಾಡಿದ್ದೀರಿ ಎಂದು ಮರು ಪ್ರಶ್ನಿಸಿದರು. ಮಧ್ಯ ಪ್ರವೇಶಿಸಿದ ಪೊಲೀಸ್ ಅಧಿಕಾರಿ ಘಟನೆಯ ತಪ್ಪು ಮಾಹಿತಿಯಿಂದ ಗೊಂದಲ ಸೃಷ್ಠಿಯಾಗಿದೆ. ಪುರಸಭೆಯವರು ಪರವಾನಗಿ ಮತ್ತು ಪರಿಶೀಲನೆಗೆ ಬಂದಿದ್ದಾರೆ.ಅವರಿಗೆ ಸಹಕಾರ ನೀಡಿ ಎಂದಾಗ ನಾವು ಅವರಿಗೆ ಸಹಕಾರ ನೀಡುತ್ತೇವೆ ಎಂದು ತಮ್ಮ ಅಂಗಡಿಗಳತ್ತ ಮುಖ ಮಾಡಿದರು.

ಪುರಸಭೆಯ ಶಿವಕುಮಾರ ಇಲಾಳ, ಎನ್.ಎ.ಸಾಂಗ್ಲೀಕರ, ರಾಘವೇಂದ್ರ ಮಂತಾ ಹಾಗೂ ಪರಶುರಾಮ ಧಲಬಂಜನ, ಮಂಜುನಾಥ ದಾನಿ, ಶ್ರೀನಿವಾಸ ಅಂಬೋರೆ, ವೀರೇಶ ಯಂಡಿಗೇರಿ, ಅಲಿ ಸಾಗರ, ಮಹೇಶ, ಪ್ರಕಾಶ ರಂಗ್ರೇಜ, ಸಿದ್ದು ಬಳಿಗೇರ ಸೇರಿ ಇತರರು ಇದ್ದರು.