ಡಿಕೆಶಿಗೆ ಮಂಡಿಯೂರಿಸುವ ಶಕ್ತಿ ರೈತ ಚಳವಳಿಗಿದೆ

ರಾಮನಗರ: ಈ ದೇಶದ 56 ಇಂಚಿನ ಪ್ರಧಾನಿ ಮೋದಿ ಅವರೇ ರೈತ ಚಳವಳಿ ಮುಂದೆ ಮಂಡಿಯೂರಿ ಮೂರು ಕರಾಳ ಕೃಷಿ ಕಾಯಿದೆಗಳನ್ನು ಹಿಂಪಡೆದರು. ಇನ್ನು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ನೀವ್ಯಾವ ಲೆಕ್ಕ ಹೇಳಿ. ನಿಮಗೆ ಮಂಡಿಯೂರಿಸುವುದು ರೈತ ಚಳವಳಿಗೆ ಕಷ್ಟ ಅಲ್ಲ ಎಂದು ಕರ್ನಾಟಕ ರಾಜ್ಯ ಸಂಘ ರಾಜ್ಯಾಧ್ಯಕ್ಷ ಬಡಗಲಪುರ ನಾಗೇಂದ್ರ ಎಚ್ಚರಿಕೆ ನೀಡಿದರು.

ಡಿಕೆಶಿ ಮಣ್ಣು ಹಿಡಿದು ತೀರ್ಮಾನಿಸಲಿ:

ಡಿಕೆಶಿ ರೈತನಾಗಲ್ಲ ಬ್ಯುಸಿನೆಸ್ ಮ್ಯಾನ್ ಆಗಿ ಆಲೋಚನೆ ಮಾಡುತ್ತಿದ್ದಾರೆ. ವ್ಯಾಪರಸ್ಥರಿಗೆ ಯಾವುದೇ ವಸ್ತು ಸರಕಾಗಿ ಕಾಣುತ್ತದೆ. ಅದೇ ರೀತಿ ಡಿಕೆಶಿಗೆ ಅನ್ನ ಹಾಕುವ, ರೈತರು ಭಾವನಾತ್ಮಕ ಸಂಬಂಧ ಹೊಂದಿರುವ, ಜೀವನಾಧಾರವಾಗಿರುವ ಹಾಗೂ ಉದ್ಯೋಗ ಸೃಷ್ಟಿಸುವ ಭೂಮಿ ಸರಕಾಗಿ ಕಾಣುತ್ತಿದೆ. ಅದಕ್ಕಾಗಿಯೇ 2 ಕೋಟಿ ಪರಿಹಾರ ನೀಡಲು ಮುಂದಾಗಿದ್ದಾರೆ ಎಂದು ವಾಗ್ದಾಳಿ ನಡೆಸಿದರು.

ರೈತ ಕುಲಕ್ಕೆ ಕೈ ಹಾಕಿದ್ರೆ ದೇವ್ರು ಕೈ ಹಿಡಿಯಲ್ಲ:

ಈ ಹಿಂದೆ ಗುಂಡೂರಾವ್ ಸರ್ಕಾರ ರೖೆತರಿಗೆ ಗುಂಡಿಟ್ಟಿತು. ಆ ಸರ್ಕಾರವನ್ನೇ ರೈತರು ಕಿತ್ತೊಗೆದರು. ಇಲ್ಲಿವರೆಗೆ ರೈತರ ವಿರುದ್ಧ ಬಂದವರ ಕುರ್ಚಿ ಹೋಗಿದಿಯೇ ಹೊರತು, ಯಾರೂ ರೈತರನ್ನು ಸೋಲಿಸಲು ಸಾಧ್ಯವಾಗಿಲ್ಲ. ರೈತ ಕುಲದ ಬದುಕನ್ನು ಕಸಿದುಕೊಳ್ಳಲು ಕೈ ಹಾಕಿದ ಯಾವುದೇ ಪ್ರಧಾನಿಯಾಗಲಿ ಅಥವಾ ಮುಖ್ಯಮಂತ್ರಿಯಾಗಲಿ ರಾಜಕೀಯದಲ್ಲಿ ಮುಂದುವರೆದ ಉದಾಹರಣೆ ಇಲ್ಲ. ಅಂತಹ ಕೆಟ್ಟ ಇತಿಹಾಸಕ್ಕೆ ರೈತನ ಮಗನಾಗಿ ನೀವು ಸೇರಬೇಡಿ ಎಂದು ಬಡಗಲಪುರ ನಾಗೇಂದ್ರ ಹೇಳಿದರು.

ಜಯ ಕರ್ನಾಟಕ ಜನಪರ ವೇದಿಕೆ ರಾಜ್ಯ ಸಲಹೆಗಾರ ಕುಮಾರಸ್ವಾಮಿ ಮಾತನಾಡಿ, ಬಿಡದಿ ಟೌನ್ ಶಿಪ್ ಯೋಜನೆ ವಿರೋಧಿಸಿ ಭೂಮಿ ಉಳಿಸಿಕೊಳ್ಳಲು ರೈತರು 470 ದಿನಗಳಿಂದ ಹೋರಾಟ ನಡೆಸುತ್ತಿದ್ದಾರೆ. ಇಲ್ಲಿವರೆಗೆ ಯಾವುದೇ ಮಠಾಧೀಶರಾಗಲಿ ಅಥವಾ ಚಲನಚಿತ್ರ ನಟರಾಗಲಿ ಬೆಂಬಲ ನೀಡದೆ ರೈತ ವಿರೋಧಿ ನಿಲುವು ತಾಳಿದ್ದಾರೆ ಎಂದು ವಾಗ್ದಾಳಿ ನಡೆಸಿದರು.

ಕರ್ನಾಟಕ ರಾಜ್ಯ ರೈತಸಂಘ ನಾಯಕರಾದ ಶಾಸಕ ದರ್ಶನ್ ಪುಟ್ಟಣ್ಣಯ್ಯ, ಉಪಾಧ್ಯಕ್ಷ ಕೆ.ಮಲ್ಲಯ್ಯ, ಬೆಂಗಳೂರು ವಿಭಾಗೀಯ ಉಪಾಧ್ಯಕ್ಷ ಲಕ್ಷ್ಮಿನಾರಾಯಣ ರೆಡ್ಡಿ, ಪ್ರಧಾನ ಕಾರ್ಯದರ್ಶಿ ಎನ್.ಡಿ.ವಸಂತ್ ಕುಮಾರ್, ಕಾರ್ಯಾಧ್ಯಕ್ಷರಾದ ಮಹೇಶ್ ಪ್ರಭು, ಗೋವಿಂದರಾಜು, ರಾಜ್ಯ ಉಪಾಧ್ಯಕ್ಷ ಕೆಂಪುಗೌಡ, ವಿಭಾಗೀಯ ಕಾರ್ಯದರ್ಶಿ ಹೊಸಕೋಟೆ ಬಸವರಾಜು, ಮಹಿಳಾ ಪ್ರಧಾನ ಕಾರ್ಯದರ್ಶಿ ನೇತ್ರಾವತಿ, ಭೂ ಹಿತರಕ್ಷಣಾ ಸಮಿತಿ ಅಧ್ಯಕ್ಷ ರಾಮಯ್ಯ, ಕರ್ನಾಟಕ ಪ್ರಾಂತ ರೖತಸಂಘ ರಾಜ್ಯ ಪ್ರಧಾನ ಕಾರ್ಯದರ್ಶಿ ಟಿ. ಯಶವಂತ್, ಕನಕಪುರ ನಗಸಭೆ ಸದಸ್ಯ ಸ್ಟುಡಿಯೋ ಚಂದ್ರು, ಮುಖಂಡರಾದ ಚೀಲೂರು ಮುನಿರಾಜು, ಕುಮಾರಸ್ವಾಮಿ, ಕೃಷ್ಣಯ್ಯ, ಗೋಪಾಲ್, ಶ್ರೀಶೖೆಲಾ, ರಮ್ಯಾ ರಾಮಣ್ಣ ಮತ್ತಿತರರು ಉಪಸ್ಥಿತರಿದ್ದರು.

ಬೈರಮಂಗಲ ವೃತ್ತದಲ್ಲಿ ಬಿಡದಿ ಟೌನ್ ಶಿಪ್ ವಿರೋಧಿಸಿ ನಡೆಯುತ್ತಿರುವ ಪ್ರತಿಭಟನೆಯಲ್ಲಿ ಬಡಗಲಪುರ ನಾಗೇಂದ್ರ ಮಾತನಾಡಿದರು.