ಪೈಪೋಟಿ ಕಣವಾದ ನೌಕರರ ಸಂಘದ ಚುನಾವಣೆ

ಕನ್ನಡಪ್ರಭ ವಾರ್ತೆ ರಾಯಚೂರುಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಹಾಗೂ ಅದರಡಿಯ ವಿವಿಧ ಇಲಾಖೆಗಳ ತಾಲೂಕು, ಜಿಲ್ಲಾ ಸಮಿತಿಗಳ ಹುದ್ದೆಗೆ ಹಾಗೂ ನಿರ್ದೇಶಕರ ಸ್ಥಾನಗಳಿಗೆ ಕಳೆದ ಒಂದೆರಡು ತಿಂಗಳಿನಿಂದ ನಡೆಯುತ್ತಿರುವ ಚುನಾವಣೆ ಕೊನೆ ಹಂತಕ್ಕೆ ಬಂದು ತಲುಪಿದ್ದು, ಸಂಘದ ಜಿಲ್ಲಾಧ್ಯಕ್ಷ, ಖಜಾಂಚಿ ಹಾಗೂ ರಾಜ್ಯ ಪರಿಷತ್‌ ಸದಸ್ಯ ಸ್ಥಾನಗಳಿಗೆ ಬುಧವಾರ ಮತದಾನ ನಡೆಯುತ್ತಿದೆ.ಯಾವುದೇ ರಾಜಕೀಯ ಪಕ್ಷಗಳಿಗೆ ಕಡಿಮೆಯಿಲ್ಲ ಎನ್ನುವ ರೀತಿಯಲ್ಲಿ ಜರುಗುತ್ತಿರುವ ಸರ್ಕಾರಿ ನೌಕರರ ಸಂಘದ ಚುನಾವಣೆಯಲ್ಲಿ ಮೂರೂ ಬಣಗಳ ನಡುವೆ ತೀವ್ರ ಪೈಪೋಟಿ ಸೃಷ್ಠಿಯಾಗಿದ್ದು, ಇವರಲ್ಲಿ ನಿರ್ದೇಶಕ ಮತದಾರ ಯಾರು ಯಾರ ಮೇಲೆ ಒಲವು ತೋರಲಿದ್ದಾನೆ ಎನ್ನುವ ಕುತೂಹಲ ಸೃಷ್ಟಿಯಾಗಿದೆ.ಯಾರ ನಡುವೆ ಸ್ಪರ್ಧೆ:

ನೌಕರರ ಸಂಘದ ಚುನಾವಣೆಯಲ್ಲಿ ಸಮರ್ಥರ ಆಯ್ಕೆಯ ಸವಾಲು 72 ಜನ ನಿರ್ದೇಶಕರ ಮುಂದಿದೆ. ಕಳೆದ ಹಲವು ದಶಕಗಳಿಂದ ನೌಕರರ ಸಂಘಟನೆಯಲ್ಲಿ ಸಕ್ರಿಯ ವಾಗಿರುವ ಶಿಕ್ಷಕ ಮಹಾಂತೇಶ ಬಿರಾದಾರ್‌ ಅವರು ಕಳೆದ ಸಲ ನಿರ್ದೇಶಕರಾಗಿ ಹಾಗೂ ಜಿಲ್ಲಾ ಸಮಿತಿ ಪ್ರಧಾನ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸುತ್ತಾ ಬಂದಿದ್ದು, ಅದೇ ವಿಶ್ವಾಸದ ಮೇಲೆ ಜಿಲ್ಲಾಧ್ಯಕ್ಷ ಸ್ಥಾನಕ್ಕೆ ಸ್ಪರ್ಧಿಸಿದ್ದಾರೆ. ಆಂಜನೇಯ್ಯ ಕಾವಲಿ ಅವರು ಶಿಕ್ಷಕರ ಸಂಘದಲ್ಲಿರುವ ಆಂಜನೇಯ್ಯ ಕಾವಲಿ ಹಾಗೂ ಆಹಾರ ಇಲಾಖೆ ಡಿಡಿಯಾಗಿರುವ ಕೃಷ್ಣ ಅವರು ಇದೇ ಮೊದಲ ಬಾರಿಗೆ ಸಂಘದ ಚುನಾವಣೆಯಲ್ಲಿ ಸ್ಪರ್ಧಿಸಿ ತಮ್ಮ ಲಕ್ಕನ್ನು ಪರೀಕ್ಷಿಸಿಕೊಳ್ಳುತ್ತಿದ್ದಾರೆ. ಚುನಾವಣೆ ಹಿನ್ನೆಲೆಯಲ್ಲಿ ಮತದಾರರನ್ನು ಸೆಳೆಯಲು ಅಧಿಕಾರಿ, ಹಣ, ಜಾತಿ ಹಾಗೂ ಅನ್ಯ ಬಲಪ್ರದರ್ಶನ ಜೋರಾಗಿ ಸಾಗಿದ್ದು, ಜೊತೆಗೆ ಪಾರ್ಟಿಗಳ ಮೇಲೆ ಪಾರ್ಟಿ ನೀಡಿ ನಾವೇನು ರಾಜಕೀಯ ನಾಯಕರಿಗಿಂತ ನಾವೇನು ಕಡಿಮೆಯಿಲ್ಲ ಎನ್ನುವುದನ್ನು ತೋರಿಸಿಕೊಟ್ಟಿದ್ದಾರೆ.