ಗುಂಡಿ ಮುಚ್ಚಲು, ಬಸ್‌ಗೆ ಡಿಸೇಲ್ ಹಾಕಲು ಸರ್ಕಾರದಲ್ಲಿ ಹಣವಿಲ್ಲ: ವಿಜಯೇಂದ್ರ

ಬಿಜೆಪಿ ರೋಣ ಮತಕ್ಷೇತ್ರ ಸೇವಾ ಸಂಕಲ್ಪ ಅಭಿಯಾನ ಬೂತ್ ವಿಜಯ ಸಂಕಲ್ಪ ಯಾತ್ರೆ ಸಭೆ ಉದ್ಘಾಟನೆ

ಪಟ್ಟಣದ ಮಾಜಿ ಸಚಿವ ಕಳಕಪ್ಪ ಬಂಡಿ ಗೃಹ ಕಚೇರಿಯಲ್ಲಿ ಬುಧವಾರ ಬಿಜೆಪಿ ರೋಣ ಮತಕ್ಷೇತ್ರ ಸೇವಾ ಸಂಕಲ್ಪ ಅಭಿಯಾನ ಬೂತ್ ವಿಜಯ ಸಂಕಲ್ಪ ಯಾತ್ರೆ ಸಭೆ ಉದ್ಘಾಟಿಸಿ ಮಾತನಾಡಿ, ಹಣಕಾಸು ಇಲಾಖೆ ಪತ್ರ ಬರೆದು, ಪುಕ್ಸಟ್ಟೆ ಘೋಷಣೆ ಮಾಡಬೇಡಿ, ರೈತರಿಗೆ ಬರ ಪರಿಹಾರ ಕೊಡಲಿಕ್ಕೂ ನಮ್ಮ ಹತ್ತಿರ ದುಡ್ಡಿಲ್ಲ ಎಂದು ಕಪಾಳಮೋಕ್ಷ ಮಾಡಿದೆ ಎಂದು ವಿಜಯೇಂದ್ರ ಹೇಳಿದರು.

ರಾಜ್ಯದಲ್ಲಿ ಭೀಕರ ಬರಗಾಲ ಸಂದರ್ಭ ರೈತರಿಗೆ ಪರಿಹಾರ ನೀಡದೆ ಕುಂಬಕರ್ಣ ನಿದ್ರೆಯಲ್ಲಿದ್ದ ಸರ್ಕಾರದ ವಿರುದ್ಧ ಪಾದಯಾತ್ರೆ ಮಾಡಿ ಸರ್ಕಾರವನ್ನು ಬಡಿದೆಬ್ಬಿಸುವ ಕೆಲಸವನ್ನು ನಾವು ಮಾಡಿದ್ದೇವೆ. ರೈತರಿಗೆ ₹೫೦ ಸಾವಿರ ಪರಿಹಾರ ನೀಡಿ ಎಂದರೆ ರೈತವಿರೋಧಿ ಕಾಂಗ್ರೆಸ್ ಸರ್ಕಾರ ಕೇವಲ ₹೨೫೦೦ ಪರಿಹಾರ ಬಿಡುಗಡೆ ಮಾಡಿದ್ದು ವಿಪರ್ಯಾಸ. ಈ ಹಿಂದೆ ರಾಜ್ಯದಲ್ಲಿ ಭೀಕರ ನೆರೆಯ ಉಂಟಾದಾಗ ಸಿಎಂ ಯಡಿಯೂರಪ್ಪ ಮನೆ ಕಟ್ಟಿಕೊಳ್ಳಲು ₹೫ ಲಕ್ಷ ಪರಿಹಾರ ನೀಡಿದ್ದರು. ಆದರೆ ಇಂದಿನ ಸಿಎಂ ಕೇಂದ್ರ ಸರ್ಕಾರಕ್ಕೆ ಪತ್ರ ಬರೆಯುತ್ತಿದ್ದಾರೆ. ಜಿಲ್ಲೆಯಲ್ಲಿ ೨೦ ದಿನಗಳಿಗೊಮ್ಮೆ ನೀರು ಕೊಡುವುದು ಗಮನಿಸಿದರೆ ಜಿಲ್ಲೆಯ ಅಭಿವೃದ್ಧಿ ತಿಳಿಯುತ್ತದೆ ಎಂದು ಟೀಕಿಸಿದರು.

ಸಂಸದ ಬಸವರಾಜ ಬೊಮ್ಮಾಯಿ, ಕಾಂಗ್ರೆಸ್ ಆಡಳಿತದಿಂದ ಜನತೆ ಆತಂಕಗೊಂಡಿದ್ದಾರೆ. ಇಂತಹ ಭ್ರಷ್ಟ ಸರ್ಕಾರ ಕಿತ್ತೊಗೆಯುವವರೆಗೆ ವಿಶ್ರಮಿಸುವುದಿಲ್ಲ ಎಂದರು.

ಬಿಜೆಪಿ ಜಿಲ್ಲಾಧ್ಯಕ್ಷ ತೋಟಪ್ಪ (ರಾಜು) ಕುರಡಗಿ, ಶಾಸಕ ಚಂದ್ರು ಲಮಾಣಿ, ಪ್ರೀತಂಗೌಡ, ಕೊಪ್ಪಳ ಬಿಜೆಪಿ ಜಿಲ್ಲಾಧ್ಯಕ್ಷ ನವೀನ ಗುಳಗಣ್ಣವರ, ಮುಖಂಡರಾದ ಅನಿಲ ಮೆಣಸಿನಕಾಯಿ, ಅಂದಪ್ಪ ಹಾರೋಗೇರಿ, ಬೋಜರಾಜ ಕರೊದಿ, ನಿಂಗಪ್ಪ ಕೆಂಗಾರ, ಬಿ.ಎಂ. ಸಜ್ಜನ, ಅಮರೇಶ ಬಳಿಗೇರ, ಎಚ್.ಕೆ. ಹಟ್ಟಿಮನಿ, ಮಹಾಂತೇಶ ಸೋಮನಕಟ್ಟಿ, ಮುದ್ದಿಂಗಪ್ಪ ಕೊರ್ಲಳ್ಳಿ, ಇಂದಿರಾ ತೇಲಿ, ನಿರ್ಮಲಾ ಕೊಳ್ಳಿ, ಬಸವರಾಜ ಬೆಲ್ಲದ, ರಂಗನಾಥ ಮೇಟಿ, ಸಲೀಮ ಕಲಾದಗಿ, ಆರ್.ಕೆ. ಚವ್ಹಾಣ, ರೂಪ್ಲೇಶ ರಾಠೋಡ, ಬಾಳಾಜೀರಾವ್ ಭೋಸಲೆ, ಲೀಲಾ ಸವಣೂರ, ವಿಜಯಲಕ್ಷ್ಮೀ ಚಟ್ಟೇರ ಸೇರಿ ಇತರರು ಇದ್ದರು.