ಶಿಕ್ಷಕರಿಂದಲೇ ಮುಖ್ಯ ಶಿಕ್ಷಕಿ ಕೊಠಡಿಗೆ ಬೀಗ!

ಲಕ್ಷ್ಮೇಶ್ವರ: ಸಮೀಪದ ಶಿಗ್ಲಿಯ ಸರ್ಕಾರಿ ಮಾದರಿ ಪ್ರಾಥಮಿಕ ಶಾಲೆ ನಂ 1ರಲ್ಲಿ ಶಿಕ್ಷಕರೇ ಮುಂದಾಗಿ ಮುಖ್ಯ ಶಿಕ್ಷಕಿಯ ಕೊಠಡಿಗೆ ಬೀಗ ಹಾಕಿದ ಘಟನೆ ಶುಕ್ರವಾರ ಬೆಳಕಿಗೆ ಬಂದಿದೆ.

ಸಹ ಶಿಕ್ಷಕರಿಗೆ ಹಾಜರಿ ಪುಸ್ತಕ ನೀಡುತ್ತಿಲ್ಲ. ಹೀಗಾಗಿ ಅವರು ತಾವೇ ಒಂದು ಹಾಜರಿ ಪುಸ್ತಕ ತಂದು ಸಹಿ ಮಾಡುತ್ತಿದ್ದಾರೆ. ಪರಸ್ಪರ ನಿತ್ಯ ಮಾತಿನ ಚಕಮಕಿ, ಬೈಗುಳ ಹಾಗೂ ಗಲಾಟೆಯೊಂದಿಗೆ ಶಾಲೆ ಆರಂಭವಾಗುತ್ತಿದೆ. ಜ. 26ರಂದು ಗಣರಾಜ್ಯೋತ್ಸವದ ಧ್ವಜಾರೋಹಣಕ್ಕೆ ರಾಷ್ಟ್ರಧ್ವಜ ನೀಡದೆ ಸತಾಯಿಸಿದ ಘಟನೆಯೂ ನಡೆದಿದೆಯಂತೆ.ಈ ಶಾಲೆಯಲ್ಲಿ 1ನೇ ತರಗತಿಯಿಂದ 7ನೇ ತರಗತಿಯವರೆಗೆ 105 ಮಕ್ಕಳು ಇದ್ದು, 6 ಜನ ಶಿಕ್ಷಕರು ಇದ್ದಾರೆ. ಈ ವಿಷಯ ಬಿಇಒ ಹಾಗೂ ಎಸ್‌ಡಿಎಂಸಿ ಅಧ್ಯಕ್ಷರಿಗೆ ಕಳೆದ ಹಲವು ತಿಂಗಳ ಹಿಂದೆಯೇ ಗೊತ್ತಾಗಿ ಪರಸ್ಪರರ ನಡುವೆ ರಾಜಿ ಪಂಚಾಯ್ತಿ ಮಾಡಿಸಿದ್ದಾರೆ. ಆದರೆ ಇದು ಯಾವುದು ಫಲ ನೀಡಿಲ್ಲ.