ಶ್ರೀಗ್ರಾಮದೇವತೆಯೇ ತವರು ಮನೆ ಸುಂಕಾಪುರ ಮನೆತನ…!

ಮಹೇಶ ಛಬ್ಬಿ ಮುಳಗುಂದ

ಪಟ್ಟಣದ ಭೋಗೇರಿ ಓಣಿಯ ಸುಂಕಾಪುರ ಮನೆತನದಲ್ಲಿ ಅನಾದಿ ಕಾಲದಿಂದಲೂ ವಾಸವಾಗಿರುವ ಶ್ರೀದೇವಿಗೆ ಇಲ್ಲಿ ಪೂಜ್ಯನೀಯ ಸ್ಥಾನವಿದೆ. ಭಕ್ತರ ಕಷ್ಟ ಕಾರ್ಪಣ್ಯ ಕಳೆಯುತ್ತಾಳೆ ಎಂಬ ಅಚಲವಾದ ನಂಬಿಕೆ ಈ ಮನೆತನ ಹಾಗೂ ಜನರಲ್ಲಿ ನೆಲೆಯೂರಿದೆ.

ಸುಂಕಾಪುರ ಮನೆಗೆ ಮೊದಲು ಭೇಟಿ ನೀಡುವ ಕಾರಣದಿಂದ ಗ್ರಾಮದೇವತೆಯ ತವರು ಮನೆ ಸುಂಕಾಪುರ ಮನೆತನ ಎನ್ನಲಾಗುತ್ತದೆ.

ಸುಂಕಾಪುರ ಮನೆಯಲ್ಲಿ ನವರಾತ್ರಿಯ 9 ದಿನಗಳ ಕಾಲ ಮನೆತನದ ಸರ್ವ ಸದಸ್ಯರು ಮಡಿ ಉಡಿಯಿಂದ ವಿಶೇಷವಾಗಿ ಶ್ರೀದೇವಿ ಆರಾಧನೆ ಮಾಡಿ ಕೊನೆ ದಿನ ದಾಸೋಹದ ಸೇವೆ ಮಾಡುತ್ತಾರೆ.

ಕಾರಹುಣ್ಣಿಮೆ ಸಮಯದಲ್ಲಿ ಗ್ರಾಮ ದೇವತೆಯಿಂದ ಈ ಮನೆತನದ ದೇವಿಗೆ ಬಾಸಿಂಗ್, ಉಲುಪಿ ಮೊದಲು ನೀಡಿ ನಂತರ ಊರಿನ 4 ಮನೆತನಕ್ಕೆ ನೀಡಿ ಕರಿ ಹರಿಯುವ ಪದ್ಧತಿ ಇದೆ. ರೈತರು ಹೊಲ ಬಿತ್ತನೆ ಸಮಯದಲ್ಲಿ ದೇವಿಗೆ ಬಿತ್ತನೆ ಬೀಜಗಳನ್ನು ನೈವೇದ್ಯ ಮಾಡಿದ ನಂತರ ಬಿತ್ತನೆ ಮಾಡುವುದು ಸಹ ವಿಶೇಷವಾಗಿದೆ.