ಪ್ರಭುದೇವರ ಕಾರ್ಯ ನಮ್ಮೆಲ್ಲರಿಗೂ ಮಾದರಿ

ಕನ್ನಡಪ್ರಭ ವಾರ್ತೆ ಬಾಗಲಕೋಟೆ

ಬಸವೇಶ್ವರ ವೀರಶೈವ ವಿದ್ಯಾವರ್ಧಕ ಸಂಘ ಹಾಗೂ ವಿದ್ಯಾಗಿರಿಯ ಬಿವಿವಿಎಸ್ ಕಲಾ, ವಿಜ್ಞಾನ, ಹಾಗೂ ವಾಣಿಜ್ಯ ಸ್ವತಂತ್ರ ಪದವಿ-ಪೂರ್ವ ಮಹಾವಿದ್ಯಾಲಯದಿಂದ ಶುಕ್ರವಾರ ಎಂಜಿನಿಯರಿಂಗ್ ಕಾಲೇಜಿನ ನೂತನ ಸಭಾಭವನದಲ್ಲಿ ಚರಂತಿಮಠದ ಪೂಜ್ಯರು ಸಂಘದ ಅಧ್ಯಕ್ಷರಾದ ಪ್ರಭುಸ್ವಾಮಿಗಳಿಗೆ ರಾಣಿ ಚನ್ನಮ್ಮ ವಿಶ್ವವಿದ್ಯಾಲಯವು ಗೌರವ ಡಾಕ್ಟರೇಟ್ ನೀಡಿದ ಪ್ರಯುಕ್ತ ಶ್ರೀಗಳಿಗೆ ಗೌರವಾಭಿನಂಧನೆ ಹಾಗೂ 2025-26ನೇ ಶೈಕ್ಷಣಿಕ ಸಾಲಿನ ಕ್ರೀಡಾ ಮತ್ತು ಸಾಂಸ್ಕೃತಿಕ ಚಟುವಟಿಕೆಗಳ ಉದ್ಘಾಟನಾ ಸಮಾರಂಭದ ಅಧ್ಯಕ್ಷತೆ ವಹಿಸಿ, ಪೂಜ್ಯರಿಗೆ ಸಂಘದ ಪರವಾಗಿ ಗೌರವಾಭಿನಂದನೆ ಸಲ್ಲಿಸಿ ಅವರು ಮಾತನಾಡಿದರು.

ಸಾನ್ನಿಧ್ಯ ವಹಿಸಿದ ಇಳಕಲ್ಲಿನ ಚಿತ್ತರಗಿ ಸಂಸ್ಥಾನಮಠದ ಪೂಜ್ಯರು ಸಂಘದ ಉಪಾಧ್ಯಕ್ಷರಾದ ಗುರುಮಹಾಂತ ಸ್ವಾಮೀಜಿಗಳು ಮಾತನಾಡಿ, ಪ್ರಭುಸ್ವಾಮಿಗಳು ಬಾಗಲಕೋಟೆಗೆ ಬಂದು 40 ವರ್ಷವಾಗಿದೆ. ಪೂಜ್ಯರು ಅತ್ಯಂತ ಕ್ರೀಯಾಶೀಲರಾಗಿ, ಅಧ್ಯಯನಶೀಲರಾಗಿರುವ ಅವರ ಹೊಸ ಹೊಸ ಚಿಂತನೆಗಳಿಂದ ನಿತ್ಯನೂತನರಾಗಿದ್ದಾರೆ. ಭಕ್ತರು ತನ್ನಂತೆಯೆಂದು ನೋಡುವ ಮನೋಭಾವ, ಅವರ ವಿಚಾರಗಳು ಇಂದಿನ ಯುವ ಪೀಳಿಗೆಗೆ ಮಾದರಿಯಾಗಿವೆ. ಅಂತರಂಗದಲ್ಲಿ ಅಧ್ಯಾತ್ಮಿಕ ಜೀವಿಯಾದ ಅವರು ಎಲ್ಲರ ಪ್ರೀತಿಗೆ ಪಾತ್ರರಾಗಿದ್ದಾರೆ. ಸಂಘದ ಕಾರ್ಯಾಧ್ಯಕ್ಷರಾದ ಡಾ.ವೀರಣ್ಣ ಚರಂತಿಮಠ ಅವರು ಒಳಗು ಹೊರಗು ಒಂದೇ ಇದ್ದವರು. ಅವರಿಗೆ ದಿನನಿತ್ಯದ ಲಿಂಗ ಪೂಜೆಯಿಂದ ಅನುಭಾವದ ಶಕ್ತಿ ಪ್ರಾಪ್ತಿಯಾಗಿದೆ. ಇದರಿಂದ ತಪ್ಪನ್ನು ಕಂಡಿಸುವ, ಇದ್ದದ್ದನ್ನು ಇದ್ದಹಾಗೆ ಹೇಳುವ ಶಕ್ತಿ ಅವರಿಗೆ ಒಲಿದಿದೆ. ಅದರಂತೆ ಪ್ರಭುಮಹಾಸ್ವಾಮೀಜಿಗಳು ತ್ರಿಕಾಲ ಲಿಂಗಪೂಜೆ ಮಾಡುವುದರಿಂದ ಅವರಿಗೆ ಅನುಭಾವ ಪ್ರಾಪ್ತಿಯಾಗಿದೆ. ಈ ಅನುಭಾವದಿಂದ ಭಕ್ತರು ಮತ್ತು ಶಿಷ್ಯರು ನಡುವೆ ಅಂತರ ಇರುವುದಿಲ್ಲ. ಈ ಅಂತರ ಹೋದರೆ ಅಂತರಂಗದಲ್ಲಿ ಸಾಮರಸ್ಯ ಬರುತ್ತದೆ. ಅಂತರಂಗದಲ್ಲಿ ಸಾಮರಸ್ಯ ಬಂದರೆ ಬಹಿರಂಗದಲ್ಲಿಯೂ ಸಾಮರಸ್ಯ ಬರುತ್ತದೆ ಎಂದು ನಂಬಿರುವ ಪ್ರಭುಮಹಾಸ್ವಾಮೀಜಿಗಳ ಈ ಸರಳ ಸ್ವಭಾವವೇ ಭಕ್ತ ಜನರ ಪ್ರೀತಿಗೆ ಕಾರಣವಾಗಿದೆ. ಪಾಶ್ಚಿಮಾತ್ಯ ಪ್ಯಾಶನ್ ನಮ್ಮ ಜೀವನವಲ್ಲ. ತಂದೆ ತಾಯಿಗೆ ಭಾರವಾಗದೆ ಆರ್ಥಿಕತೆ ಗಮನದಲ್ಲಿಟ್ಟುಕೊಂಡು ವಿದ್ಯಾರ್ಥಿಗಳು ಜ್ಞಾನವಂತರಾಗಿ ಸಾಧನೆಯತ್ತ ಗಮನ ಹರಿಸಿ ಎಂದರು.

ಇದೇ ಸಂದರ್ಭದಲ್ಲಿ ದ್ವೀತಿಯ ಪಿಯುಸಿಯಲ್ಲಿ ಹೆಚ್ಚು ಅಂಕ ಪಡೆದ 6 ಜನ ವಿದ್ಯಾರ್ಥಿಗಳಿಗೆ ನಗದು ಬಹುಮಾನ ವಿತರಿಸಿದರು. ಸಂಘದ ಗೌರವ ಕಾರ್ಯದರ್ಶಿ ಮಹೇಶ ಅಥಣಿ ಸ್ವಾಗತಿಸಿ, ಎಸ್.ಆರ್.ಮುಗನೂರಮಠ, ಡಾ.ಎಸ್.ಎಂ.ಗಾಂವಕರ ವಂದಿಸಿದರು. ನಂತರ ಕಾಲೇಜು ವಿದ್ಯಾರ್ಥಿಗಳಿಂದ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು. ಸಮಾರಂಭದಲ್ಲಿ ಗುರುಬಸವ ಸೂಳಿಬಾವಿ ಸೇರಿದಂತೆ ಸಂಘದ ಎಲ್ಲ ಸದಸ್ಯರುಗಳು, ವಿವಿಧ ಮಹಾವಿದ್ಯಾಲಯಗಳ ಪ್ರಾಚಾರ್ಯರು ಹಾಗೂ ವಿದ್ಯಾರ್ಥಿಗಳು ಭಾಗವಹಿಸಿದ್ದರು.