ಮಾರುಕಟ್ಟೆಯಲ್ಲಿ ಅಲಂಕಾರಿಕ ವಸ್ತುಗಳದ್ದೇ ಭರಾಟೆ

ಶಶಿಕಾಂತ ಮೆಂಡೆಗಾರ

ಅತಿವೃಷ್ಠಿ, ಅನಾವೃಷ್ಠಿಗಳ ಮಧ್ಯೆಯೂ ಸಹ ಜಿಲ್ಲೆಯ ಜನತೆ ಬೆಳಕಿನ ಹಬ್ಬ ದೀಪಾವಳಿಯನ್ನು ಸಂಭ್ರಮದಿಂದಲೇ ಆಚರಿಸುತ್ತಿದ್ಧಾರೆ. ನಿತ್ಯ ಬೆಳಗ್ಗೆ ಹಾಗೂ ಸಂಜೆ ಗೃಹಿಣಿಯರೆಲ್ಲ ಮನೆಗಳ ಮುಂದೆ ಸಾಲುಸಾಲು ದೀಪಗಳ ಅಲಂಕಾರ ಹಾಗೂ ಅಂಗಡಿಗಳ ಮೇಲೆಲ್ಲ ಕಲರ್‌ಫುಲ್ ಬೆಳಕಿನ ಚಿತ್ತಾರದ ಲೈಟಿಂಗ್‌ಗಳ ಮೂಲಕ ಅಲಂಕರಿಸಿ ಹಬ್ಬದ ಆಚರಣೆಗೆ ಕಳೆ ನೀಡುತ್ತಿದ್ದಾರೆ.

ನಗರದ ಲಾಲ್‌ಬಹದ್ದೂರ್‌ ಶಾಸ್ತ್ರೀ ಮಾರುಕಟ್ಟೆ, ಎಸ್‌ಎಸ್‌ ರಸ್ತೆ, ಸರಾಫ್ ಬಜಾರ್‌ ಏರಿಯಾ ಸೇರಿದಂತೆ ವಿವಿಧೆಡೆ ಆಕಾಶಬುಟ್ಟಿ, ಮಾಳಾ ಸೇರಿದಂತೆ ಅಲಂಕಾರಿಕ ಲೈಟಿಂಗ್ಸ್ ವಸ್ತುಗಳು ಹಾಗೂ ವಿವಿಧ ಬೆಳಕು ಚೆಲ್ಲುವ ವಿಶೇಷ ಬಲ್ಬ್‌ಗಳ ಖರೀದಿ ಜೋರಾಗಿತ್ತು. ಅದರಲ್ಲೂ ₹ 300 ರಿಂದ ಒಂದು ಸಾವಿರ ಬೆಲೆಗೆ ಆಕಾಶ ಬುಟ್ಟಿಗಳು ಮಾರಾಟವಾಗುತ್ತಿದೆ. ಮನೆಗಳ ಮುಂದೆ, ಅಂಗಡಿಗಳು ಸೇರಿದಂತೆ ಎಲ್ಲೆಡೆ ಬೆಳಕು ಚೆಲ್ಲಲು ಬೇಕಾಗಿರುವ ದೀಪಗಳು (ಹಣತೆಗಳು) ₹ 50 ರಿಂದ 200 ಕ್ಕೆ ಒಂದು ಡಜನ್‌ ನಂತೆ ಮಾರಾಟವಾಗುತ್ತಿವೆ.

ಪರಿಸರ ಸ್ನೇಹಿ ಹಸಿರು ಪಟಾಕಿಗಳನ್ನೇ ಮಾರಾಟ ಮಾಡಬೇಕು ಹಾಗೂ ಜನರು ಸಹ ಅವುಗಳನ್ನೇ ಖರೀದಿಸಬೇಕು ಎಂದು ಜಿಲ್ಲಾಡಳಿತ ಆದೇಶ ಹೊರಡಿಸಿದೆ. ಜೊತೆಗೆ ಮಾರುಕಟ್ಟೆಯಲ್ಲಿ ಅವಘಡ ಸಂಭವಿಸಬಾರರು ಎಂದು ಪಟಾಕಿ ಅಂಗಡಿಗಳಿಗೆ ನಗರದ ಡಾ.ಅಂಬೇಡ್ಕರ ಕ್ರೀಡಾಂಗಣದ ಹೊರಭಾಗದಲ್ಲಿರುವ ಖಾಲಿ ಜಾಗೆಯಲ್ಲಿ ಮಾರಾಟಕ್ಕೆ ವ್ಯವಸ್ಥೆ ಮಾಡಲಾಗಿದೆ. ಹೀಗಾಗಿ ಇಲ್ಲಿರುವ ಹತ್ತಾರು ಅಂಗಡಿಗಳಲ್ಲಿ ಗ್ರೀನ್‌ ಪಟಾಕಿಗಳದ್ದೇ ಸದ್ದು. ನಿತ್ಯ ನಗರದಲ್ಲಿ ರಾತ್ರಿ 10ಗಂಟೆವರೆಗೂ ಎಲ್ಲೆಂದರಲ್ಲಿ ಅಂಗಡಿಗಳ ಮುಂದೆ ಪಟಾಕಿ ಮಾರಾಟ, ಬೆಳಕಿನ ಚಿತ್ತಾರಗಳೇ ಕಂಡುಬರುತ್ತಿವೆ. ಇದರೊಟ್ಟಿಗೆ ಜೋಡಿ ಬಾಳೆ ಗಿಡಗಳು ₹ 100 ರಿಂದ 200 ವರೆಗೆ ಮಾರಾಟವಾದರೆ, ಜೋಡಿ ಕಬ್ಬುಗಳಿಗೆ ₹ 50ರಿಂದ 100ರವರೆಗೆ ಮಾರಾಟ ಮಾಡಲಾಗುತ್ತಿದೆ. ಹಣ್ಣು ಹಂಪಲಿನ ದರ ಗಗನಕ್ಕೇರಿದ್ದು, ಯಾವುದೇ ಹಣ್ಣು ಖರೀದಿಸಿದರೂ ಕೇಜಿಗೆ ₹ 100 ಮೇಲೆಯೇ ಇರುವುದು ಕಂಡು ಬಂದಿತು.