ವಿವಿಧ ಭಾಷೆಗಳಿಗೆ ಮಹಾಕಾವ್ಯ ರಾಮಾಯಣ ಅನುವಾದ

ರಾಮನಗರ: ಪ್ರಪಂಚದ ಲಿಪಿ ಇರುವ ಎಲ್ಲಾ ಭಾಷೆಗಳಿಗೂ ಮಹಾಕಾವ್ಯ ರಾಮಾಯಣ ಅನುವಾದಗೊಂಡಿದೆ. ಇದನ್ನು ರಚಿಸಿದ ಆದಿ ಕವಿ ವಾಲ್ಮಿಕಿ ಮಹರ್ಷಿಗಳು ಮಹಾತ್ಮರು ಎಂದು ಅಪರ ಜಿಲ್ಲಾಧಿಕಾರಿ ಆರ್‌. ಚಂದ್ರಯ್ಯ ಅಭಿಪ್ರಾಯಪಟ್ಟರು.

ರಾಮಾಯಣ ಮತ್ತು ಮಹಾಭಾರತ ಈ ದೇಶದ ಎರಡು ಮಹಾ ಕಾವ್ಯಗಳು. ರಾಮನ ಪಾತ್ರ ಮತ್ತು ವ್ಯಕ್ತಿತ್ವವನ್ನು ರಾಮಾಯಣದ ಮೂಲಕ ಕಟ್ಟಿಕೊಟ್ಟು, ಅದನ್ನು ಅದ್ಭುತವಾದ ರೀತಿಯಲ್ಲಿ ವ್ಯಾಖ್ಯಾನಿಸಿದ ವ್ಯಕ್ತಿ ವಾಲ್ಮೀಕಿ ಮಹರ್ಷಿಗಳು.

ತಳ ಸಮುದಾಯಗಳು ಒಂದಾಗಬೇಕು. ಶಿಕ್ಷಣ ಸೇರಿದಂತೆ ಬೇರೆ ಬೇರೆ ಕ್ಷೇತ್ರಗಳಲ್ಲಿ ಅವಕಾಶ ಗಿಟ್ಟಿಸಿಕೊಳ್ಳಬೇಕು. ಈ ಮೂಲಕ ಸರ್ಕಾರದ ಯೋಜನೆಗಳು ಅರ್ಹರನ್ನು ತಲುಪಬೇಕು ಎನ್ನುವ ಉದ್ದೇಶದಿಂದ ಈ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿದೆ ಎಂದು ಚಂದ್ರಯ್ಯ ತಿಳಿಸಿದರು.

ರಾಮಾಯಣವನ್ನು ಬರೆಯಬೇಕಾದರೆ ಅದ್ಭುತವಾದ ಜ್ಞಾನ ಹೊಂದಿರಬೇಕು, ಜೀವ ಜ್ಞಾನಿ ತತ್ವಜ್ಞಾನಿ ಆಗಿರಬೇಕು, ಅರಣ್ಯ ಪ್ರೇಮಿಯಾಗಿರಬೇಕು, ಕಾನೂನು ಪಂಡಿತನಾಗಿರಬೇಕು.64 ವಿದ್ಯೆ ತಿಳಿದವನಾಗಿರಬೇಕು, ಮಾನವೀಯ ಕಳಕಳಿ, ಜೀವಪರ ಚಿಂತನೆ ಬಂಧು-ಬಳಗ ಅಥವಾ ಕುಟುಂಬ,ಸ್ನೇಹ ಸಂಬಂಧದ ಬಗ್ಗೆ ಎಲ್ಲವನ್ನು ಅರ್ಥಮಾಡಿಕೊಂಡವನಾಗಿರಬೇಕು ಆಗ ಮಾತ್ರ ಅತ್ಯದ್ಭುತ ಗ್ರಂಥವನ್ನು ರಚಿಸುವುದಕ್ಕೆ ಸಾಧ್ಯ ಎಂದರು.

ಇದೇ ವೇಳೆ 2024-25ನೇ ಸಾಲಿನ ಎಸ್ಸೆಸ್ಸೆಲ್ಸಿ ಮತ್ತು ಪಿಯುಸಿಯಲ್ಲಿ ಅತಿ ಹೆಚ್ಚು ಅಂಕ ಗಳಿಸಿದ ವಿದ್ಯಾರ್ಥಿಗಳಿಗೆ ಬಹುಮಾನ ವಿತರಿಸಲಾಯಿತು.

ವೇದಿಕೆ ಕಾರ್ಯಕ್ರಮಕ್ಕೂ ಮುನ್ನ ನಗರದ ಸರ್ಕಾರಿ ಜೂನಿಯರ್ ಕಾಲೇಜು ಮೈದಾನದಿಂದ ಡಾ. ಅಂಬೇಡ್ಕರ್ ಭವನದವರೆಗೆ ಮಹರ್ಷಿ ವಾಲ್ಮೀಕಿ ಭಾವಚಿತ್ರವನ್ನು ಬೆಳ್ಳಿರಥದಲ್ಲಿರಿಸಿ ಕಲಾತಂಡದೊಂದಿಗೆ ಮೆರವಣಿಗೆ ಮಾಡಲಾಯಿತು.

ರಾಮನಗರದ ಡಾ. ಬಿ.ಆರ್. ಅಂಬೇಡ್ಕರ್ ಭವನದಲ್ಲಿ ನಡೆದ ಶ್ರೀ ಮಹರ್ಷಿ ವಾಲ್ಮೀಕಿ ಜಯಂತಿ ಕಾರ್ಯಕ್ರಮವನ್ನು ಅಪರ ಜಿಲ್ಲಾಧಿಕಾರಿ ಚಂದ್ರಯ್ಯ ಉದ್ಘಾಟಿಸಿದರು.