ಜೀವನದ ಸಂಸ್ಕಾರ ಕಲಿಸುವ ಉಪನಯನ: ಕೇಂದ್ರ ಸಚಿವ ಜೋಶಿ

ಹುಬ್ಬಳ್ಳಿ: ಮಕ್ಕಳು ತಮ್ಮ ಮುಂದಿನ ಜೀವನವನ್ನು ಹೇಗೆ ಸಾಗಿಸಬೇಕು ಎನ್ನುವುದರ ಸಂಸ್ಕಾರ ಕಲಿಸುವ ವಿಧಾನವೇ ಈ ಉಪನಯನ ವಿಧಿ. ಇದು ಮಕ್ಕಳಿಗೆ ಧಾರ್ಮಿಕ ಸಂಸ್ಕಾರಗಳನ್ನು ವಿಧಿವತ್ತಾಗಿ ಪಾಲಿಸುವ ಜವಾಬ್ದಾರಿಯನ್ನು ನಿರ್ವಹಿಸುವ ಕುರಿತು ತಿಳಿವಳಿಕೆ ನೀಡುತ್ತದೆ ಎಂದು ಕೇಂದ್ರ ಸಚಿವ ಪ್ರಹ್ಲಾದ ಜೋಶಿ ಹೇಳಿದರು.

ಇಂದಿನ ದಿನಗಳಲ್ಲಿ ಉಪನಯನ ಮಾಡಿಸಿಕೊಳ್ಳಲು ಮಕ್ಕಳು ಅನೇಕ ಕಾರಣಗಳಿಂದ ಹಿಂಜರಿಯುತ್ತಾರೆ. ಆದರೆ, ಅವರಿಗೆ ಈ ಉಪನಯನದ ಮಹತ್ವವನ್ನು ಮನಗಾಣಿಸಿ ಇಂತಹ ಕಾರ್ಯಕ್ರಮವನ್ನು ಆಯೋಜಿಸಿದ್ದು ನಿಜಕ್ಕೂ ಶ್ಲಾಘನೀಯ. ಸಾಮೂಹಿಕವಾಗಿ ಉಪನಯನ ಅಥವಾ ವಿವಾಹಗಳನ್ನು ಆಯೋಜಿಸುವುದು ಸಮಾಜದಲ್ಲಿ ಒಗ್ಗಟ್ಟು ಮೂಡಿಸುತ್ತದೆ. ಮರಾಠಾ ಸಮಾಜಕ್ಕೆ ಮತ್ತು ಬಿಜೆಪಿಗೆ ಅವಿನಾಭಾವ ಸಂಬಂಧವಿದೆ. ಏಕೆಂದರೆ ಅಂದು ಛತ್ರಪತಿ ಶಿವಾಜಿ ಮಹಾರಾಜರು ಪಾಲಿಸಿದ ಆದರ್ಶಗಳಾದ ಯಾವುದೇ ಭೇದ-ಭಾವ ಅಥವಾ ಪಕ್ಷಪಾತವಿಲ್ಲದೆ ಎಲ್ಲರನ್ನೂ ಸಮಾನತೆಯಿಂದ ಕಾಣುವ ಹಿಂದುತ್ವದ ದೃಷ್ಟಿಕೋನವನ್ನು ಇಂದು ಬಿಜೆಪಿ ಪಾಲಿಸುತ್ತ ಬಂದಿದೆ. ಅಲ್ಲದೆ ಹಿಂದುತ್ವವನ್ನು ಪ್ರತಿಪಾಲಿಸುತ್ತ ಬಂದಿರುವ ಮರಾಠಾ ಸಮಾಜ ಎಂದಿಗೂ ನನ್ನ ಮತ್ತು ಬಿಜೆಪಿ ಬೆಂಬಲಕ್ಕೆ ನಿಂತಿದ್ದು, ಇದಕ್ಕೆ ನಾನು ಚಿರಋಣಿಯಾಗಿದ್ದೇನೆ ಎಂದರು.

ಮರಾಠಾ ಅಭಿವೃದ್ಧಿ ನಿಗಮದ ಅಧ್ಯಕ್ಷ ಮರಿಯೋಜಿರಾವ್‌, ವ್ಯವಸ್ಥಾಪಕ ನಿರ್ದೇಶಕ ಶಂಕರ ಪಾಗೋಜಿ, ಕೇಶವ ಯಾದವ, ರಮೇಶ ಮಹದೇವಪ್ಪನವರ, ದಿನೇಶ ವಾಘಮೊರೆ, ಸುನೀಲ ದಳವಿ ಸೇರಿದಂತೆ ಹಲವರು ಮಾತನಾಡಿದರು.