ವಿಘ್ನ ವಿನಾಶಕ ವಿಘ್ನೇಶ್ವರ ಪ್ರಥಮ ಪೂಜೆಯ ಅಧಿದೇವತೆ

ರಾಮನಗರ: ಗಣಪತಿಯ ಅನುಮತಿಯಿಲ್ಲದೆ ಯಾವುದೇ ದಿಕ್ಕಿನಿಂದ ಇತರ ದೇವತೆಗಳು ಪೂಜಾಸ್ಥಳಕ್ಕೆ ಬರಲಾರರು. ಆದುದರಿಂದ ಎಲ್ಲ ಮಂಗಳ ಕಾರ್ಯಗಳಲ್ಲಿ ಅಥವಾ ಇತರ ಯಾವುದೇ ದೇವತೆಯ ಪೂಜೆ ಮಾಡುವಾಗ ಮೊದಲು ಗಣಪತಿಯ ಪೂಜೆ ಮಾಡಲಾಗುತ್ತದೆ ಎಂದು ಶ್ರೀ ಗುರುಗುಂಡ ಬ್ರಹ್ಮೇಶ್ವರ ಮಹಾಸಂಸ್ಥಾನ ಮಠದ ಪೀಠಾಧ್ಯಕ್ಷ ಶ್ರೀ ನಂಜಾವಾಧೂತ ಸ್ವಾಮೀಜಿ ಹೇಳಿದರು.

ಹಿಂದೂ ಧರ್ಮದಲ್ಲಿ ಗಣಪನಿಗೆ ವಿಶೇಷ ಸ್ಥಾನವಿದೆ. ಯಾವುದೇ ಶುಭ ಸಮಾರಂಭಗಳಿಗೆ ಪ್ರಥಮ ಪೂಜೆಯ ಅಧಿದೇವತೆ. ನಾವು ಮಾಡುವ ಯಾವುದೇ ಕೆಲಸದಲ್ಲಿ ವಿಘ್ನಗಳಾಗದಂತೆ ಗಣನಾಯಕನಿಗೆ ಮೊದಲು ಪೂಜೆ ನೆರವೇರಿಸುತ್ತೇವೆ ಎಂದರು.

ಶಾಸಕ ಬಾಲಕೃಷ್ಣ ಮಾತನಾಡಿ, ದೇವತೆಗಳ ಪೈಕಿ ಮೊದಲ ಪೂಜೆ ವಿಘ್ನೇಶ್ವರ ದೇವರಿಗೆ ಸಲ್ಲುತ್ತದೆ. ಮಕ್ಕಳಿಬ್ಬರಿಗೆ ಶಿವ ಪಾರ್ವತಿ ಪ್ರಪಂಚವೆಲ್ಲ ಯಾರು ಮೊದಲು ಸುತ್ತಿ ಬರುತ್ತಾರೆಂದು ಹೇಳಿದಾಗ ಸುಬ್ರಹ್ಮಣ್ಯಸ್ವಾಮಿ ನವಿಲಿನ ಮೇಲೆ ಪ್ರಪಂಚ ಪರ್ಯಾಟನೆಗೆ ಹೋಗುತ್ತಾನೆ. ಆದರೆ, ಗಣಪತಿ, ಸುಬ್ರಹ್ಮಣ್ಯಸ್ವಾಮಿ ಬರುವ ಹೊತ್ತಿಗೆ ಶಿವ - ಪಾರ್ವತಿ ಸುತ್ತಲು ಮೂರು ಸುತ್ತು ಹಾಕಿ ಗಣಪ ತನ್ನ ಬುದ್ಧಿವಂತಿಕೆ ಪ್ರದರ್ಶಿಸುತ್ತಾನೆ. ಇದರರ್ಥ ಪ್ರಪಂಚ ಅಂದರೆ ತಂದೆ ತಾಯಿ. ತಂದೆ ತಾಯಿಯನ್ನು ಗೌರವಿಸಿದರೆ ಎಲ್ಲರಿಗೂ ಗೌರವ ಸಲ್ಲಿಸಿದಂತಾಗುತ್ತದೆ. ಆದ್ದರಿಂದಲೇ ಗಣಪತಿಗೆ ಮೊದಲ ಪೂಜೆ ನೆರವೇರುತ್ತದೆ ಎಂದರು.

ತಾಪಂ ಮಾಜಿ ಅಧ್ಯಕ್ಷೆ ಶೋಭಾ, ಮಂಚನಾಯಕನಹಳ್ಳಿ ಗ್ರಾಪಂ ಅಧ್ಯಕ್ಷೆ ಪವಿತ್ರ, ಸದಸ್ಯರಾದ ಲೀಲಾವತಿ, ಬಳಗದ ಅಧ್ಯಕ್ಷ ಕೃಷ್ಣ ಭಗವಾನ್, ಉಪಾಧ್ಯಕ್ಷ ಎಚ್.ಕೆ.ಧನಂಜಯ್, ಲವಕುಮಾರ್, ಪ್ರಧಾನ ಕಾರ್ಯದರ್ಶಿ ಪುಷ್ಪರಾಜ್, ಖಜಾಂಚಿ ಸಂತೋಷ್ ಕುಮಾರ್, ಸಹಕಾರ್ಯದರ್ಶಿ ಎಚ್.ಆರ್.ಕೃಷ್ಣಮೂರ್ತಿ, ಸಂಘಟನಾ ಕಾರ್ಯದರ್ಶಿ ಕಾಂತರಾಜ್ ಅರಸ್, ಜಂಟಿ ಕಾರ್ಯದರ್ಶಿ ವಸಂತ್ ಕುಮಾರ್, ಕಾರ್ಯದರ್ಶಿ ಕಿರಣ್ ಅಶೋಕ್ ಇತರರಿದ್ದರು.

ರಾಮನಗರ ತಾಲೂಕಿನ ಬಿಡದಿ ಹೋಬಳಿಯ ಹೊಸದೊಡ್ಡಿಯಲ್ಲಿ ಶ್ರೀ ವರಸಿದ್ಧಿ ವಿನಾಯಕ ದೇವಸ್ಥಾನ ಪ್ರತಿಷ್ಠಾಪನ ಮಹೋತ್ಸವ ಹಾಗೂ ಕುಂಭಾಭಿಷೇಕ ಉದ್ಘಾಟನಾ ಸಮಾರಂಭದಲ್ಲಿ ಶ್ರೀ ನಂಜಾವಾದೂತ ಸ್ವಾಮೀಜಿ ಅವರನ್ನು ಶಾಸಕ ಬಾಲಕೃಷ್ಣ ಹಾಗೂ ರಾಜ್ಯ ಅಲೇಮಾರಿ ಸಮುದಾಯಗಳ ಒಕ್ಕೂಟದ ರಾಜ್ಯಾಧ್ಯಕ್ಷ ಶೇಷಪ್ಪ ಅಭಿನಂದಿಸಿದರು.