ಮೂಲಭೂತ ಸೌಲಭ್ಯದಿಂದ ವಂಚಿತಗೊಂಡ ಗ್ರಾಮಗಳು

ಅಧಿಕಾರಿಗಳ ನಿಷ್ಕಾಳಜಿಗೆ ಹಿಡಿದ ಕನ್ನಡಿ । ಮಳೆಗಾಲ ಬಂತೆಂದರೆ ಶಾಪ ಕಾಡಿದಂತಹ ಅನುಭವ

ತಾಲೂಕಿನ ಕರಂಜೆ, ಸಿಸೈ, ಡಿಗ್ಗಿ, ಧೂಧಮಳ ಸೇರಿದಂತೆ ಬಜಾರಕುಣಂಗ ಗ್ರಾಮ ಪಂಚಾಯಿತಿ ಮತ್ತು ಕಾತೇಲಿ ಗ್ರಾಪಂ ವ್ಯಾಪ್ತಿಯ ಹಲವಾರು ಹಳ್ಳಿಗಳಿಗೆ ರಸ್ತೆಗಳಿಲ್ಲ. ಬಹುತೇಕ ಗ್ರಾಮಗಳು ಮೂಲಭೂತ ಸೌಲಭ್ಯದಿಂದ ವಂಚಿತಗೊಂಡಿವೆ.

ಇದರಿಂದಾಗಿ ಜೋಯಿಡಾದ ಜನತೆ ಇನ್ನೂ ಹಿಂದುಳಿಯಲು ಕಾರಣವಾಗಿದೆ. ಜನತೆಗೆ ಬೇಕಾದ ರಸ್ತೆ ಸೇತುವೆ, ವಿದ್ಯುತ್ ಸರಿಯಾಗಿ ಇಲ್ಲದ ಕಾರಣ ಜನತೆ ಅತಂತ್ರ ಸ್ಥಿತಿಯಲ್ಲಿದ್ದಾರೆ. ಹಿಂದೆ ಸುಪಾದ ಕಾಳಿ ನದಿಗೆ ಕಟ್ಟಲಾದ ಜಲಾಶಯದಲ್ಲಿ 47 ಹಳ್ಳಿಗಳು ಮುಳುಗಡೆಯಾದವು. ಇಲ್ಲಿನ ಹಳ್ಳಿಗಳ ರಸ್ತೆ, ಸೇತುವೆ ಮುಳುಗಿದವು. ಆದರೆ ಕರ್ನಾಟಕ ವಿದ್ಯುತ್ ನಿಗಮ ಇವುಗಳನ್ನು ಸರಿ ಮಾಡಿಕೊಡಬೇಕಿತ್ತು. ಸರಿಮಾಡಲೇ ಇಲ್ಲ. ಇದರಿಂದ ಗ್ರಾಮಗಳಿಗೆ ಹೋಗುವ ರಸ್ತೆ ಸಂಪರ್ಕ ಕಡಿತಗೊಂಡು ಜನರು ಅತಂತ್ರರಾದರು. ಇಂತವರ ಸಮಸ್ಯೆಗೆ ಅಧಿಕಾರಿಗಳು ಸಭೆ ನಡೆಸಿದರೂ ಅವೆಲ್ಲ ಕಡತಗಳಾದವು ವಿನಃ ಕೆಲಸ ಆಗಲೇ ಇಲ್ಲ. ಹೀಗಾಗಿ ಬಜರಾಕುಣಂಗ ಮತ್ತು ಕಾತೇಲಿ ಮತ್ತು ಅಣಶಿ ಗ್ರಾಪಂಗಳ ಹಲವಾರು ಹಳ್ಳಿಗಳಿಗೆ ಮಳೆಗಾಲ ಬಂತೆಂದರೆ ಶಾಪ ಕಾಡಿದಂತಹ ಅನುಭವ ಆಗುತ್ತದೆ. ಮಕ್ಕಳ ವಿದ್ಯಾಭ್ಯಾಸ, ಆರೋಗ್ಯ, ಸರಕಾರಿ ಕೆಲಸ, ರೇಷನ್ ಎಲ್ಲದಕ್ಕೂ ತಿಲಾಂಜಲಿ ಇಡಬೇಕಾದ ಸ್ಥಿತಿ ಇನ್ನೂ ಇದೆ.

ಜನತೆ ಬದುಕಲು ಸರಕಾರ ಮೂಲಭೂತ ವ್ಯವಸ್ಥೆ ಮಾಡಿಕೊಡಬೇಕಾಗಿದೆ. ಇದಕ್ಕೆ ಎಲ್ಲ ಇಲಾಖೆಗಳೂ ಜವಾಬ್ದಾರರು ಎಂದು ಹಿಂದೆ ತಾಲೂಕಿನ ಸಮಸ್ಯೆಗಳ ಬಗ್ಗೆ ಚರ್ಚಿಸಲು ಡಿಗ್ಗಿಯಲ್ಲಿ ಸಭೆ ನಡೆಸಿದ ಜಿಲ್ಲಾಧಿಕಾರಿ ಗಂಗೂ ಬಾಯಿ ಮಾನಕರ ಹೇಳಿದ್ದರು. ಆದರೆ ಅವರು ಮಂಜೂರು ಮಾಡಿದ ಯಾವ ಕೆಲಸಗಳೂ ಆಗಿಲ್ಲ. ಪಡಿತರ ಅಂಗಡಿ ಕೂಡ ಆಗದೇ ಇರುವುದು ಅಧಿಕಾರಿಗಳ ಕಾಳಜಿಗೆ ಹಿಡಿದ ಕನ್ನಡಿಯಾಗಿದೆ.