ರಾಣಿಬೆನ್ನೂರಿನ ವಿವಿಧ ಸರ್ಕಾರಿ ಕಚೇರಿಗಳಿಗೆ ಲೋಕಾಯುಕ್ತ ಅಧಿಕಾರಿಗಳ ಭೇಟಿ

ರಾಣಿಬೆನ್ನೂರು: ಇಲ್ಲಿನ ತಹಸೀಲ್ದಾರ್ ಕಚೇರಿ, ಸರಕಾರಿ ಸಾರ್ವಜನಿಕ ಆಸ್ಪತ್ರೆ ಹಾಗೂ ಸ್ಥಳೀಯ ನಗರಸಭೆ ಸೇರಿದಂತೆ ವಿವಿಧ ಕಡೆಗಳಲ್ಲಿ ಕರ್ನಾಟಕ ರಾಜ್ಯ ಲೋಕಾಯುಕ್ತ ಸಿಬ್ಬಂದಿ ಮಂಗಳವಾರ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಇಲ್ಲಿನ ತಹಸೀಲ್ದಾರ್ ಕಚೇರಿಯಲ್ಲಿ ಲೋಕಾಯುಕ್ತಕ್ಕೆ ಬಂದ ದೂರುಗಳನ್ನು ಪರಿಶೀಲಿಸಿದರು. ಕೆಲವು ಸಿಬ್ಬಂದಿಗಳ ವಿಭಾಗದ ಕಡತಗಳ ವಿಲೇವಾರಿ ಕುರಿತು ಮಾಹಿತಿ ಪಡೆಯುವಾಗ ತಡಬಡಿಸಿದ ಸಿಬ್ಬಂದಿಗಳನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು. ಜೊತೆಗೆ ಕೆಲ ಸಿಬ್ಬಂದಿಗಳ ಮೊಬೈಲ್ ಪರಿಶೀಲಿಸಿದ್ದು ಕಂಡು ಬಂದಿತು. ದೂರುಗಳ ಹಿನ್ನೆಲೆಯಲ್ಲಿ ತಹಸೀಲ್ದಾರ್ ಆರ್.ಎಚ್ ಭಾಗವಾನ್ ಅವರಿಂದ ಮಾಹಿತಿ ಪಡೆದುಕೊಂಡರು.

ನಗರಸಭೆಗೆ ಭೇಟಿ ನೀಡಿದ ಎ.ವಿ. ಪಾಟೀಲ ಮತ್ತವರ ಅಧಿಕಾರಿಗಳು ಉದ್ಯಾನ, ನಗರಸಭೆಯ ಸ್ವತ್ತಿನ ಕುರಿತಂತೆ ಒತ್ತುವರಿಯಾದ ಜಾಗಗಳ ಬಗ್ಗೆ ಹಾಗೂ ಸ್ವಚ್ಛತೆಯ ಕುರಿತು ಮತ್ತು ಹೋಟೆಲ್, ಬೇಕರಿ ಅಂಗಡಿಗಳಲ್ಲಿಯ ಆಹಾರದ ಗುಣಮಟ್ಟ ಕುರಿತಂತೆ ಪೌರಾಯುತ್ತ ಎಫ್ ಐ ಇಂಗಳಗಿ ಅವರಿಂದ ವಿವರವಾದ ಮಾಹಿತಿ ಪಡೆದರು. ರಾಜ್ಯದಲ್ಲಿಯೇ ರಾಣಿಬೆನ್ನೂರು ನಗರದಲ್ಲಿ ಅತ್ಯುತ್ತಮವಾಗಿ 24*7 ನೀರು ಪೂರೈಕೆಯಾಗುತ್ತಿರುವುದರ ಬಗ್ಗೆ, ದಾಖಲೆ ಪ್ರಮಾಣದಲ್ಲಿ ನೀರಿನ ಕರ, ತೆರಿಗೆ ಕರ ವಸೂಲಿ, ಬೀದಿಬದಿ ತಿಂಡಿ ತಿನಿಸುಗಳ ಅಂಗಡಿ ಮತ್ತು ಹೋಟೆಲ್‌ಗಳ ಮೇಲೆ ದಾಳಿ ನಡೆಸಿ ದಂಡ ಹಾಕಿ ನೋಟಿಸ್ ನೀಡಿ ತುರ್ತು ಕ್ರಮ ಕೈಗೊಂಡ ಬಗ್ಗೆ ಹಾಗೂ ಯಾವುದೇ ಕಡತಗಳು ಬಾಕಿ ಇರದ ನಗರಸಭೆಯ ಕಾರ್ಯ ವೈಖರಿ ಕುರಿತು ಲೋಕಾಯುಕ್ತರು ಪ್ರಶಂಶಿಸಿ ಮೆಚ್ಚುಗೆ ವ್ಯಕ್ತಪಡಿಸಿದರು. ದೊಡ್ಡಕೆರೆಗೆ ಹೋಗುತ್ತಿರುವ ಅನುಪಯುಕ್ತ ನೀರನ್ನು ತಡೆಯಲು ಮತ್ತು ನಗರದಲ್ಲಿನ ಸ್ವಚ್ಛತೆ ಕಾಪಾಡಲು ಹೆಚ್ಚಿನ ಆದ್ಯತೆ ನೀಡಲು ಸೂಚನೆ ನೀಡಿದರು. ಹೋಟೆಲ್ ಡಾಬಾಗಳಲ್ಲಿ ಕೃತಕ ಪನ್ನೀರ ಬಳಸುತ್ತಾರೆಯೇ? ಎಂಬುದನ್ನು ಪರಿಶೀಲಿಸಲು ಪೌರಾಯುಕ್ತರಿಗೆ ವಿಶೇಷವಾಗಿ ಸೂಚನೆ ನೀಡಿದರು.