ನಮ್ಮೂರಿಗೆ ಬಸ್ಸಿಲ್ಲ, ಬಸ್ ಬಿಡಿ, ಇಲ್ಲವೇ ಸೈಕಲ್ ಕೊಡಿಸಿರಿ

ದಾಬಸ್‌ಪೇಟೆ: ನಮ್ಮೂರಿಗೆ ಬಸ್ ಇಲ್ಲ ಸರ್‌ ಹಾಗಾಗಿ ನಾವು ಶಾಲೆಗೆ 3-4 ಕಿ.ಮೀ. ನಡೆದುಕೊಂಡು ಹೋಗಬೇಕಾಗಿದೆ. ಬಸ್ ಬಿಡಿ, ಇಲ್ಲವೇ ಸೈಕಲ್ ಕೊಡ್ಸಿ ಎಂದು ಕೆಂಗಲ್ ಗೊಲ್ಲರಹಟ್ಟಿ ಗ್ರಾಮದ ವಿದ್ಯಾರ್ಥಿ ರಾಮಕೃಷ್ಣ ಗ್ರಾಮ ಸಭೆಯಲ್ಲಿ ಕೇಳಿದನು.

ಕೃಷಿ ಅಧಿಕಾರಿ ಶಬಾನಾ ಡಿ.ನದಾಫ್ ಮಾತನಾಡಿ, ಈ ಬಾರಿ ಅನಾವೃಷ್ಟಿಯಿಂದಾಗಿ ಇಳುವರಿ ಕಡಿಮೆಯಾಗಿದ್ದು ವಿಮೆ ಮಾಡಿಸಿರುವ ರೈತರು ಇದರ ಸದುಪಯೋಗ ಪಡೆದುಕೊಳ್ಳಬೇಕು. ಜೊತೆಗೆ ಆಧಾರ್ ಹಾಗೂ ಪಹಣಿ ನೀಡಿ ಇ-ಕೆವೈಸಿ ಮಾಡಿಸಿ ಎಫ್.ಐ.ಡಿ ಯಲ್ಲಿ ದಾಖಲಿಸಿದರೆ ಮಾತ್ರವೇ ಸರ್ಕಾರಿ ಸೌಲಭ್ಯಗಳು ರೈತರನ್ನು ತಲುಪಲು ಸಾಧ್ಯ. ಹಾಗಾಗಿ ರೈತರು ನಮ್ಮ ಸೋಂಪುರ ರೈತ ಸಂಪರ್ಕ ಕೇಂದ್ರವನ್ನು ಸಂಪರ್ಕಿಸಿ ಇ-ಕೆವೈಸಿ ಮಾಡಿಸಿಕೊಳ್ಳಿ ಎಂದು ಹೇಳಿದರು.

ಸಾರ್ವಜನಿಕರ ನಿರಾಸಕ್ತಿ: ಗ್ರಾಮ ಸಭೆಗೆ ಕೇವಲ ಬೆರಳೆಣಿಕೆಯಷ್ಟು ಜನರು ಮಾತ್ರ ಆಗಮಿಸಿದ್ದರಿಂದ ಖಾಲಿ ಕುರ್ಚಿಗಳು ಎದ್ದು ಕಾಣುತ್ತಿದ್ದವು. ಅಲ್ಲದೇ ಹಲವು ಇಲಾಖೆಗಳ ಅಧಿಕಾರಿಗಳೂ ಗೈರಾಗಿ ಗ್ರಾಮಸಭೆಗೆ ನಿರಾಸಕ್ತಿ ತೋರಿದ್ದು ಕಂಡು ಬಂದಿತು.