ಚಳ್ಳಕೆರೆ ತಾಲೂಕು ಆಸ್ಪತ್ರೆಗೆ ದಾರಿ ಯಾವುದಯ್ಯ?

ಜಡೇಕುಂಟೆ ಮಂಜುನಾಥ್

ಚಳ್ಳಕೆರೆ ನಗರದ ಹೃದಯ ಭಾಗದಲ್ಲಿರುವ ತಾಲೂಕು ಆಸ್ಪತ್ರೆಗೆ ತುರ್ತು ಚಿಕಿತ್ಸಾ ವಾಹನಗಳು ಹೋಗಲು ಮತ್ತು ಬರಲು ದಾರಿ ಯಾವುದಯ್ಯ ಎಂದು ಹುಡುಕಬೇಕಾದಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.

ಸುಮಾರು 130 ಹಾಸಿಗೆಯುಳ್ಳ ತಾಯಿ ಮಕ್ಕಳ ಆಸ್ಪತ್ರೆಗೆ ದಿನನಿತ್ಯ ಏನಿಲ್ಲವೆಂದರೂ ಆಂಬ್ಯುಲೆನ್ಸ್ ನಲ್ಲಿ ತುರ್ತು ಚಿಕಿತ್ಸೆಗೆಂದು ಹತ್ತಾರು ರೋಗಿಗಳು ಬಂದು ಹೋಗುತ್ತಾರೆ. ಆಂಧ್ರದ ಗಡಿಯಂಚಿನ ಗ್ರಾಮಗಳಿಂದಲೂ ರೋಗಿಗಳು ಚಳ್ಳಕೆರೆ ಆಸ್ಪತ್ರೆಗೆ ಬರುವುದು ಮಾಮೂಲಿಯಾಗಿದೆ. ಇಂತಹ ತಾಯಿಮಕ್ಕಳ ಆಸ್ಪತ್ರೆಯಲ್ಲಿ ಹೆರಿಗೆ ಸೇರಿದಂತೆ ಮಕ್ಕಳ ಅನಾರೋಗ್ಯದಿಂದ ದಾಖಲಾಗುವವರ ಸಂಖ್ಯೆ ದಿನಾಲು ಇದ್ದೇ ಇರುತ್ತದೆ. ಸರ್ಕಾರಿ ಆರ್ಯವೇದ ಆಸ್ಪತ್ರೆ, ಸಾರ್ವಜನಿಕ ಆಸ್ಪತ್ರೆ ಸೇರಿದರೆ ಇಲ್ಲಿ ದಿನನಿತ್ಯ ನೂರಾರು ರೋಗಿಗಳು ಬಂದು ಹೋಗುತ್ತಾರೆ. ಇಂತಹ ಆಸ್ಪತ್ರೆಯ ಒಳಗೆ ಹೋಗಲು ಖಾಸಗಿ ಬಸ್‌ಗಳದ್ದೇ ದೊಡ್ಡ ಅಡಚಣೆಯಾಗಿದೆ.

ತಾಲೂಕು ಕೇಂದ್ರದಲ್ಲಿ ನೆಲೆಸಿರುವ ನೌಕರರು ಗ್ರಾಮೀಣ ಭಾಗಗಳಿಗೆ ನೌಕರಿಗೆ ತೆರಳುವಾಗ ತಮ್ಮ ದ್ವಿಚಕ್ರ ವಾಹನಗಳನ್ನು ಇಲ್ಲಿಯೇ ನಿಲ್ಲಿಸಿ ಹೋಗುತ್ತಿದ್ದುದು ಸಮಸ್ಯೆ ಆಗಿದ್ದರಿಂದ ಮೊದಲನೆಯ ದ್ವಾರವನ್ನು ವಾಹನಗಳಿಂದ ಮುಕ್ತಿ ಸಿಗುವಂತೆ ಮಾಡಲಾಯಿತು ಎನ್ನುತ್ತಾರೆ ಇಲ್ಲಿನ ಕೆಲ ಸಿಬ್ಬಂದಿ.

ಆಸ್ಪತ್ರೆಯ ಬಲಭಾಗದಲ್ಲಿರುವ ಕಣಿವೆ ಮಾರಮ್ಮನ ದೇವಸ್ಥಾನಕ್ಕೆ ಬರುವ ಭಕ್ತರದು ಮತ್ತೊಂದು ರೀತಿಯ ಸಮಸ್ಯೆ. ಮಂಗಳವಾರ, ಶುಕ್ರವಾರ ಬಂತೆಂದರೆ ಸಾಕು ಇಲ್ಲಿ ಜನಜಂಗುಳಿಯೇ ನೆರೆದಿರುತ್ತದೆ. ಇವೆಲ್ಲಾ ಸಮಸ್ಯೆಗಳು ಹೊರಗಿನವೇ ಆದರೂ ಒಳ ಹೊಕ್ಕರೆ ರೋಗಿಗಳಿಗೆ ರೋಗವೇ ಸುಧಾರಿಸಿದಷ್ಟು ಅನುಭವವಾಗದೇ ಇರದು. ಆದಷ್ಟು ಬೇಗ ಇಲ್ಲಿನ ಎರಡೂ ದ್ವಾರಗಳು ವಾಹನಗಳ ಮುಕ್ತ ಓಡಾಟಕ್ಕೆ ವ್ಯವಸ್ಥೆ ಮಾಡಬೇಕು. ಖಾಸಗಿ ಬಸ್ ಗಳ ನಿಲುಗಡೆ ಆಸ್ಪತ್ರೆಗೆ ಹೋಗುವ ದಾರಿಯಿಂದ ಮುಕ್ತಗೊಳಿಸಬೇಕು. ಖಾಸಗಿ ದ್ವಿಚಕ್ರ ವಾಹನಗಳನ್ನು ಆಸ್ಪತ್ರೆ ವರಾಂಡದಲ್ಲಿ ನಿಲ್ಲಿಸಿ ಹೋಗುವುದನ್ನು ತಡೆಯಬೇಕು. ಇದೆಲ್ಲಾವೂ ಇಲ್ಲಿ ಕಾರ್ಯಗತವಾಗಬೇಕಾದರೆ ಪೋಲೀಸರ ನಿಯೋಜನೆ ಖಾಯಂ ಆಗಿ ಇರಬೇಕು. ಆಸ್ಪತ್ರೆ ಆವರಣದಲ್ಲಿ ಪೋಲೀಸ್ ಚೌಕಿ ಆರಂಭಿಸಿ ಅಲ್ಲಿಬ್ಬರು ಪೋಲಿಸರನ್ನು ಹಾಕಿದರೆ ಇಲ್ಲಿನ ಸಮಸ್ಯೆಗಳು ತಹಬದಿಗೆ ಬರಬಹುದು ಎಂಬುದು ಸಾರ್ವಜನಿಕರ ಅಭಿಪ್ರಾಯವಾಗಿದೆ.ದಿನದಿಂದ ದಿನಕ್ಕೆ ರೋಗಿಗಳು ಬಂದು ಹೋಗುವುದರಿಂದ ಇಲ್ಲಿನ ಆಸ್ಪತ್ರೆ ಸದಾ ಗಿಜಿಗಿಜಿ ಎನ್ನುವಂತೆ ಕಂಡುಬರುತ್ತದೆ. ಗ್ರಾಮೀಣ ಭಾಗದಿಂದ ಇಲ್ಲಿಗೆ ಬರುವವರ ಸಂಖ್ಯೆ ದೊಡ್ಡದಿದೆ. ತಾಯಿ ಮಕ್ಕಳ ಆಸ್ಪತ್ರೆ ಸುಸಜ್ಜಿತವಾಗಿದೆ. ಸಾರ್ವಜನಿಕ ಆಸ್ಪತ್ರೆಗೂ ಬಂದು ಹೋಗುವವರ ಸಂಖ್ಯೆ ಹೆಚ್ಚಿದೆ. ಆದ್ದರಿಂದ ಒಳ ಹೋಗಿ ಬರಲು ಗೇಟ್‌ನಲ್ಲಿ ಸಮಸ್ಯೆ ಆಗುತ್ತಿರುವುದು ನಿಜ. ಎರಡೂ ಗೇಟ್ ಗಳನ್ನು ಮುಕ್ತವಾಗಿಸಿದರೆ ವಾಹನಗಳ ದಟ್ಟಣೆ ಕಡಿಮೆ ಆಗಬಹುದು. ಒಂದು ದ್ವಾರದಿಂದ ಒಳಗೆ ಹೋಗಲು, ಮತ್ತೊಂದು ದ್ವಾರದಿಂದ ಹೊರಗೆ ಬರುವ ವ್ಯವಸ್ಥೆ ಮಾಡಬೇಕಿದೆ.