ಕಲೆ ಆರಾಧಿಸಿ ಭವಿಷ್ಯ ಉಜ್ವಲಗೊಳಿಸಿಕೊಳ್ಳಿ

ಗದಗ: ಕಲೆ ಎಂಬ ಶಕ್ತಿ ಸಿದ್ದಿಸಿಕೊಳ್ಳುವುದು ಮಹಾ ಕಠಿಣ ತಪಸ್ಸಿನಿಂದ ಮಾತ್ರ ಸಾಧ್ಯ. ಅಂತಹ ಕಲೆ ಆರಾಧಿಸುತ್ತ ನಿಮ್ಮ ಭವಿಷ್ಯ ಉಜ್ವಲಗೊಳಿಸಿಕೊಳ್ಳಿ ಎಂದು ನಗರಸಭೆ ಮಾಜಿ ಅಧ್ಯಕ್ಷ ಬಿ.ಬಿ. ಅಸೂಟಿ ಹೇಳಿದರು.

ಟಿ.ಪಿ. ಅಕ್ಕಿಯವರ ಶ್ರಮದ ಫಲವಾಗಿ ಕಲಾ ಮಂದಿರ ಅಪಾರವಾಗಿ ಬೆಳೆದಿದೆ. ಕಲಾ ಕ್ಷೇತ್ರಕ್ಕೆ ಸರ್ಕಾರ ಹಲವಾರು ವರ್ಷಗಳಿಂದ ಶಿಕ್ಷಕರ ನೇಮಕಾತಿ ಮಾಡಿಲ್ಲ.ಈ ಕ್ರಮವಾಗಿ ಕಲಾವಿದರು ಸರ್ಕಾರದ ಗಮನಕ್ಕೆ ತರುವುದರ ಮೂಲಕ ಶೀಘ್ರದಲ್ಲಿ ನೇಮಕಾತಿ ಪ್ರಕ್ರಿಯೆ ಕೈಗೊಳ್ಳಲಿದೆ. ಈ ಕುರಿತು ಸಚಿವರ ಗಮನಕ್ಕೆ ಪ್ರಸ್ತಾಪ ಮಾಡಲು ಸಹಕಾರ ಮಾಡುತ್ತೇವೆ ಎಂದರು.

ಭವ್ಯ ಪರಂಪರೆ ಹೊಂದಿದ ಕಲಾ ಪರಂಪರೆಯ ಇತಿಹಾಸ ಅರಿಯಬೇಕು ಅಂದರೆ ಮಾತ್ರ ಇತಿಹಾಸ ಸೃಷ್ಠಿಸಲು ಸಾಧ್ಯ.ಸರ್ಕಾರ ಕೊಡುವ ಅವಕಾಶಕ್ಕಿಂತಲೂ ಕಲಾಕ್ಷೇತ್ರಕ್ಕೆ ವಾಣಿಜ್ಯ ಕ್ಷೇತ್ರದಲ್ಲಿ ಅವಕಾಶ ಇರುವುದರ ಜತೆಗೆ ವಾಣಿಜ್ಯ ಬೆಳವಣಿಗೆಯ ಶಕ್ತಿಯಾಗಿ ಕಲೆ ಬೆಳೆದಿದೆ. ಏಕೆಂದರೆ ಇಂದು ಆಕರ್ಷಣೆಯೇ ವಾಣಿಜ್ಯ ಕ್ಷೇತ್ರದ ಜೀವಾಳವಾಗಿರುವುದರಿಂದ ಕಲೆ ಕಲಾವಿದ ಅವಶ್ಯಕವಾಗಿದ್ದಾನೆ ಎಂದು ತಿಳಿಸಿದರು.

ಹಿರಿಯ ತೆರಿಗೆ ಸಲಹೆಗಾರ ಮುಕುಂದ ಪೋತ್ನಿಸ್, ಕರ್ನಾಟಕ ಲಲಿತಕಲಾ ಅಕಾಡೆಮಿ ಸದಸ್ಯ ಡಾ. ಬಸವರಾಜ ಕಲೆಗಾರ, ಸಂಸ್ಥೆಯ ಕಾರ್ಯದರ್ಶಿ ಪ್ರಕಾಶ ಟಿ.ಅಕ್ಕಿ, ಪ್ರಾ.ಕೆ.ಎಂ.ಕೃಷ್ಣ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಪ್ರೊ. ಬಸವರಾಜ ನೆಲಜೇರಿ ನಿರೂಪಿಸಿದರು. ಪ್ರೊ. ಶರಣಪ್ಪ ಬಿ.ಎಚ್. ವಂದಿಸಿದರು.