ಕರಾವಳಿಯಲ್ಲಿ ಮುಂಗಾರು ಚುರುಕು, ಇನ್ನು ಮೂರು ದಿನ ಯೆಲ್ಲೋ ಅಲರ್ಟ್‌

ಮಂಗಳೂರು: ಕರಾವಳಿಯಲ್ಲಿ ಮುಂಗಾರು ಮಳೆ ಮುಂದುವರಿದಿದ್ದು, ಮಂಗಳವಾರ ಅಪರಾಹ್ನ ಮಳೆ ಬಿರುಸು ಪಡೆದುಕೊಂಡಿದೆ. ಇದೇ ವೇಳೆ ಜೂ.12ರಿಂದ 14ರ ವರೆಗೆ ಮೂರು ದಿನಗಳ ಕಾಲ ಕರಾವಳಿಯಲ್ಲಿ ಯೆಲ್ಲೋ ಅಲರ್ಟ್‌ನ್ನು ಭಾರತೀಯ ಹವಾಮಾನ ಇಲಾಖೆ ಘೋಷಿಸಿದೆ.

ಬೆಳ್ತಂಗಡಿ 23.5 ಮಿ.ಮೀ, ಬಂಟ್ವಾಳ 22.5 ಮಿ.ಮೀ, ಮಂಗಳೂರು 44.6 ಮಿ.ಮೀ, ಪುತ್ತೂರು 36.8 ಮಿ.ಮೀ, ಸುಳ್ಯ 43.4 ಮಿ.ಮೀ, ಮೂಡುಬಿದಿರೆ 36.1 ಮಿ.ಮೀ, ಕಡಬ 31.2 ಮಿ.ಮೀ. ಮೂಲ್ಕಿ 50 ಮಿ.ಮೀ. ಮಳೆ ದಾಖಲಾಗಿದೆ.

ಇನ್ನೂ ಎರಡು ದಿನ ಭಾರಿ ಮಳೆಯಾಗುವ ಮುನ್ನೆಚ್ಚರಿಕೆಯ ಹಿನ್ನೆಲೆಯಲ್ಲಿ ಜಿಲ್ಲೆಯಲ್ಲಿ ರೆಡ್ ಅಲರ್ಟ್ ಘೋಷಿಸಲಾಗಿದೆ. ಇಂದು ಮತ್ತು ನಾಳೆ ಕರಾವಳಿಯಲ್ಲಿ 64 ಮಿ.ಮೀ.ಯಿಂದ 114 ಮಿ.ಮೀ.ನಷ್ಟು ಮಳೆಯಾಗುವ ಬಗ್ಗೆ ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ಸೋಮವಾರದ ಮಳೆಗೆ ಕುಂದಾಪುರ ತಾಲೂಕಿನ ಬೇಳೂರು ಗ್ರಾಮದ ಶಂಕರ ರಾಮ ದೇವಾಡಿಗ ಅವರ ಮನೆಗೆ 45,000 ರು., ಬಸ್ರೂರು ಗ್ರಾಮದ ಚಂದ್ರಕಲಾ ಕಿಣಿ ಅವರ ಮನೆಗೆ 25,000 ರು., ಕಾವ್ರಡಿ ಗ್ರಾಮದ ಸಲಿಮಾಬಿ ಅವರ ಮನೆಗೆ 25,000 ರು., ಕಾರ್ಕಳ ತಾಲೂಕಿನ ಕಡ್ತಲ ಗ್ರಾಮದ ಸುಶೀಲ ನಾಯ್ಕ್ ಅವರ ಮನೆಗೆ ಸಿಡಿಲು ಬಡಿದು 10,000 ರು., ಕಾಪುತಾಲೂಕಿನ ನಡ್ಸಾಲು ಗ್ರಾಮದ ನಜೀರ್ ಅವರ ಮನೆಯ ಮೇಲೆ ಮರ ಬಿದ್ದು 25,000 ರು., ಬ್ರಹ್ಮಾವರ ತಾಲೂಕಿನ ಕುಮೃಗೋಡು ಗ್ರಾಮದ ಅಮೃತ ಕಲಾ ರೈ ಅವರ ಮನೆಗೆ 45,000 ರು., ಹಿಲಿಯಾಣ ಗ್ರಾಮದ ಶಾಮಿಮ್ ಬಾನು ಅವರ ಮನೆಯ ಮೇಲೆ ಮರ ಬಿದ್ದು 8,000 ರು., ನಾಲ್ಕೂರು ಗ್ರಾಮದ ಪಾಂಡು ನಾಯ್ಕ ಅವರ ಮನೆಗೆ ಸಿಡಿಲು ಬಡಿದು 40,000 ರು. ನಷ್ಟ ಸಂಭವಿಸಿದೆ.ಸೋಮವಾರ ರಾತ್ರಿ ಉಡುಪಿ ಜಿಲ್ಲಾದ್ಯಂತ ಸರಾಸರಿ 35.50 ಮಿ.ಮೀ. ಮಳೆಯಾಗಿದೆ. ತಾಲೂಕುವಾರು ಕಾರ್ಕಳ 37.60, ಕುಂದಾಪುರ 39.40, ಉಡುಪಿ 35.20, ಬೈಂದೂರು 19.50, ಬ್ರಹ್ಮಾವರ 50.50, ಕಾಪು 51.90, ಹೆಬ್ರಿ 23.90 ಮಿ.ಮೀ. ಮಳೆಯಾಗಿದೆ.