ಯುವಕರು ಅಧ್ಯಾತ್ಮ, ಸೇವಾ ಮನೋಭಾವನೆ ಅಳವಡಿಸಿಕೊಳ್ಳಿ-ರಾಜೇಂದ್ರ ಘೋರ್ಪಡೆ

ಗಜೇಂದ್ರಗಡ: ಸಮಾಜವು ಸದೃಢವಾಗಬೇಕಾದರೆ ಯುವಕರು ಆಧ್ಯಾತ್ಮ ಹಾಗೂ ಸೇವಾಮನೋಭಾವನೆ ಅಳವಡಿಸಿಕೊಂಡು ಸಮಾಜದ ಬದಲಾವಣೆಗೆ ಮುಂದಾದಾಗ ಮಾತ್ರ ವಿವೇಕಾನಂದರು ಕಂಡ ಕನಸು ಸಾಕಾರವಾಗಲಿದೆ ಎಂದು ಬಿಜೆಪಿ ನಗರ ಘಟಕದ ಅಧ್ಯಕ್ಷ ರಾಜೇಂದ್ರ ಘೋರ್ಪಡೆ ಹೇಳಿದರು.ಬಿಜೆಪಿ ರೋಣ ಮಂಡಲದ ವತಿಯಿಂದ ಸ್ಥಳೀಯ ಬಿಜೆಪಿ ಕಾರ್ಯಾಲಯದಲ್ಲಿ ಶುಕ್ರವಾರ ನಡೆದ ಸ್ವಾಮಿ ವಿವೇಕಾನಂದರ ಜಯಂತಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡು ಮಾತನಾಡಿದರು.

ಆಧುನಿಕ ತಂತ್ರಜ್ಞಾನದಲ್ಲಿ ಸಿಲುಕಿರುವ ಯುವಕರು ಮನಸ್ಸನ್ನು ಹತೋಟಿಯಲ್ಲಿ ಇಟ್ಟುಕೊಳ್ಳದ ಪರಿಣಾಮ ಸಮಾಜವು ಇಂದು ಅಮಾನವೀಯ ಘಟನೆಗಳನ್ನು ಕಾಣುವಂತಾಗಿದೆ ಎಂದು ಬೇಸರ ವ್ಯಕ್ತಪಡಿಸಿದರು. ರಾಷ್ಟ್ರಾಭಿಮಾನ ಬಗ್ಗೆ ವಿವೇಕಾನಂದರು ಕಂಡ ಕನಸು ಸಾಕಾರವಾಗಬೇಕಾದರೆ ಪ್ರತಿಯೊಬ್ಬ ಯುವಕರು ಆಧ್ಯಾತ್ಮ, ಸೇವಾ ಮನೋಭಾವನೆ ಹಾಗೂ ಆತ್ಮಾಭಿಮಾನವನ್ನು ರೂಢಿಸಿಕೊಂಡು ಉತ್ತಮ ರಾಷ್ಟ್ರಕ್ಕೆ ಮುನ್ನಡಿ ಬರೆಯಬೇಕಾದ ಅವಶ್ಯಕತೆಯಿದೆ ಎಂದರು.

ಈ ವೇಳೆ ಯು.ಆರ್. ಚನ್ನಮ್ಮನವರ, ಕನಕಪ್ಪ ಅರಳಿಗಿಡದ, ರವಿ ಶಿಂಗ್ರಿ, ಮಹಾಂತೇಶ ಪೂಜಾರ, ಸುಭಾಷ ಮ್ಯಾಗೇರಿ, ಸಿದ್ದಣ್ಣ ಚೋಳಿನ್, ಯಮನೂರು ತಿರಕೋಜಿ, ಬಾಲಾಜಿ ಬೋಸ್ಲೆ, ಶರಣಪ್ಪ ಉಪ್ಪಿನಬೇಟಗೇರಿ, ದುರ್ಗಪ್ಪ ಮುಧೋಳ, ಕುಮಾರ ರಾಥೋಡ ಸೇರಿ ಇತರರು ಇದ್ದರು.